ყოველწლიურად ონლაინ ვაჭრობა სულ უფრო მოსახერხებელი და განვითარებული ხდება. შესყიდვები მსოფლიოს ნებისმიერი წერტილიდან შეგიძლიათ განახორციელოთ, შეუკვეთოთ ნივთები, რომელთა პოვნა ლოკალურ მაღაზიებში თითქმის შეუძლებელია. მართალია, შეძენილმა ნივთმა დიდხანს რომ გაგახაროთ, უნდა იცოდეთ, როგორ განსაზღვროთ ტანსაცმლის ზომა. ეს ერთი შეხედვით მარტივი პროცესია, მაგრამ ასე არ არის.
რამდენიმე დღის წინ მესტუმრა მეგობარი, რომელიც თითქმის მთელი თვე ელოდა ჩინეთის სავაჭრო საიტიდან გამოწერილ კაბას. როცა ამანათი მიიღო, გაოგნდა, რადგან კაბა იმდენად ფართო იყო, რამდენჯერმე შეეძლო გახვეულიყო, არადა ზომა სწორი იყო. ავუხსენი მეგობარს, რომ ონლაინ ვაჭრობისას მნიშვნელოვანია არა მხოლოდ ტანსაცმლის ზომის ცოდნა, არამედ სხვადასხვა ქვეყნის ზომის ცხრილებში გარკვევა. მსგავსი კაზუსი თქვენც რომ არ შეგემთხვათ, „პაპარაცის“ დღევანდელ სტატიას გაეცანით.
როგორ განვსაზღვროთ ტანსაცმლის ზომა?
უნდა გვესმოდეს, რომ ზომების ცხრილი არა მხოლოდ მწარმოებლებს შორის განსხვავდება. სხვადასხვა ქვეყანაში ტანსაცმლის ზომების გრადაცია აბსოლუტურად განსხვავებული შეიძლება იყოს. თუმცა თქვენი ძირითადი პარამეტრების ცოდნა დაგეხმარებათ განსაზღვროთ თქვენი ზომა კონკრეტული ზომების ცხრილში. ამისთვის აიღეთ სანტიმეტრი და მიჰყევით ჩვენს რჩევებს.
როგორ ავიღოთ ძირითადი ზომები?
1. მკერდის გარშემოწერილობა
პირველ ადგილზე ყოველთვის მკერდის გარშემოწერილობის გაგებაა. ონლაინ მაღაზიებში მკერდის გარშემოწერილობა მოიხსენიება სიტყვით bust. დამოუკიდებლად შეგიძლიათ გაიზომოთ, მაგრამ სხვისი დახმარებით უფრო ზუსტ მაჩვენებელს მიიღებთ. გაზომვისას სანტიმეტრი მკაცრად იატაკის პარალელურად უნდა დაიჭიროთ. აი, სწორედ აქ გჭირდებათ დახმარება.
სანტიმეტრი მოათავსეთ მკერდის გარშემო ისე, რომ იღლიებში გაატაროთ. ყურადღება მიაქციეთ, რომ წინ სანტიმეტრმა უნდა გაიაროს მკერდის ყველაზე ამობურცული ნაწილის გასწვრივ, უკან – ბეჭების გასწვრივ. გაზომვისას სასურველია გეცვათ მაისური ან რბილი ბიუსტჰალტერი დანამატების გარეშე. წინააღმდეგ შემთხვევაში, ზუსტ ზომებს ვერ მიიღებთ.
2. წელის გარშემოწერილობა
შემდეგ წელის გარშემოწერილობას ზომავენ. ინგლისურენოვან მაღაზიებში აღინიშნება, როგორც waist. წელის გარშემოწერილობა იზომება ყველაზე წვრილ წერტილში. როგორც წესი, წელის ზონა ჭიპიდან 2 თითით ზემოთ მდებარეობს. სანტიმეტრი ძალიან არ უნდა მოუჭიროთ, მაგრამ არც მოშვებული უნდა გქონდეთ.
3. თეძოს გარშემოწერილობა
უცხოურ საიტებზე ზომის ცხრილში აღინიშნება, როგორც hip ან things. თეძოს გარშემოწერილობა იზომება დუნდულების ყველაზე ამოზნექილ წერტილებზე. მცირე განმარტება: თუ თეძოებზე არის „ყურები“, ყველაზე ფართო ნაწილის გასწვრივ უნდა გაიზომოს. ეს ორი ზომა შეადარეთ და ტანსაცმლის არჩევისას გაითვალისწინეთ ის, რომელიც უფრო დიდია.
როგორ განვსაზღვროთ ტანსაცმლის ზომა: რჩევები და ხრიკები
თქვენი ტანსაცმლის ზომა სწორად რომ დაადგინოთ, უნდა იცოდეთ რამდენიმე ხრიკი:
- ზომების აღებისას რეალობა არ შეამციროთ. მუცლის შეწევით მოხდენილი ვერ გახდებით. იგივე ეხება სანტიმეტრის შემოჭერას. ტანს მჭიდროდ უნდა ეკვროდეს, მაგრამ არ გიჭერდეთ.
- თუ თქვენი ზომები ორ ზომას შორის მდებარეობს, შეუკვეთეთ ის, რომელიც უფრო დიდია. ნივთის გაწელვის ან გახდომის იმედზე ნუ დარჩებით. ჯობია თქვენი ზომის ტანსაცმელი აირჩიოთ, რომ მაშინვე შეძლოთ მისი ჩაცმა.
- თუ გამყიდველის ან მწარმოებლის ზომების ცხრილში არის რეკომენდაციები სიმაღლესთან დაკავშირებით, მას ყურადღება მიაქციეთ. ასე თავიდან აიცილებთ კონფუზს, როცა ძალიან გრძელი ან მოკლე ნივთი ჩამოდის.
- დააკვირდით ზომების ცხრილს, რომელსაც გამყიდველი გთავაზობთ. არის შემთხვევები, როცა მწარმოებელი უთითებს მზა პროდუქტის ზომებს და არა თქვენსას. ამ შემთხვევაში, აირჩიეთ ნივთი რამდენიმე სანტიმეტრის დამატებით, რომ თავისუფლად მოგერგოთ.
- მზა ნაწარმის ზომაში რომ არ შეცდეთ, გამოიყენეთ პატარა ხრიკი. თქვენს გარდერობში იპოვეთ ნივთი, რომელიც იმ ნივთის მსგავსია, რომლის შეკვეთას აპირებთ. დარწმუნდით, რომ მასში კომფორტულად ხართ და თქვენი ზომაა. ახლა ძირითადი პარამეტრების ზომები აიღეთ და მიიღებთ ზომებს, რომელსაც ყურადღება უნდა მიაქციოთ შესყიდვის დროს.
- თუ თქვენს ქალაქში არის იმ ბრენდის მაღაზია, რომლის ნივთის ონლაინ შეძენას გეგმავთ, აუცილებლად ეწვიეთ. რამდენიმე ნივთი მოირგეთ და დაიმახსოვრეთ, რომელი ზომა უფრო კომფორტულია თქვენთვის. ეს მონაცემები გაითვალისწინეთ საიტზე შეკვეთისას და პრობლემებს თავიდან აიცილებთ.
რა განსხვავებაა ზომების ცხრილებს შორის სხვადასხვა ქვეყანაში?
თუ ტანსაცმელს უცხოური მწარმოებლისგან ყიდულობთ, კონკრეტული ზომების ცხრილს ყურადღება მიაქციეთ. გახსოვდეთ, რომ ზომები შეიძლება მნიშვნელოვნად განსხვავდებოდეს ქვეყნიდან ქვეყანაში.
1. ქართული
ზომები მითითებულია ორნიშნა რიცხვებით, დაწყებული 38-ით. ყოველ შემდეგ ზომას 2 ერთეული ემატება. ეს ციფრები აღნიშნავს გარშემოწერილობის ნახევარს სანტიმეტრებში.
2. ბრიტანული
ამ ტიპის ზომა იარლიყზე მითითებულია ასოებით UK. ზომები იწყება 4-დან და ყოველ მომდევნო ზომას ემატება 2 ერთეული. არ დაგავიწყდეთ, რომ ინგლისში სიგრძის მთავარი ერთეული არის დუიმი, რომელიც 2,54 სანტიმეტრია. ხშირად იარლიყზე დუიმებში გამოხატული ზომებია მითითებული.
3. საერთაშორისო
საერთაშორისო ზომის ცხრილი ასოებით აღნიშნავს გულისხმობს. მწარმოებლის მიხედვით, ზომები იწყება XXS ან XS-დან და გრძელდება XL ზომამდე. ყოველ მომდევნო ზომას X ემატება.
თითოეულ საერთაშორისო ზომას აქვს შესაბამისი ქართული ეკვივალენტი. ზოგჯერ ეს არის ერთი ზომა ან ორი მიმდებარე ზომის კვეთა. საერთაშორისო სქემის მიხედვით, ერთი და იმავე ასოს აღნიშვნის მქონე ქალის და კაცის ზომები ერთმანეთისგან განსხვავდება. ამიტომ, თუ გეგმავთ მაისურის შეძენას მამაკაცის განყოფილებაში, ქალის L ზომაში ორიენტაცია გქონდეთ მამაკაცის S ან M ზომაზე.
4. ამერიკული
ამერიკულ ზომის ცხრილში ზომები იწყება 6-დან, რომლის პარამეტრები შეესაბამება ქართულ 40-ს. თითოეულ ზომას 2 ერთეული ემატება. შესაბამისად, ამერიკული 8 ზომა შეესაბამება ქართულ 42 ზომას და ა.შ.
ამასთან, საგარეო ტანსაცმლის ზომების ცხრილი ისე გამოიყურება, როგორც ქართული, მხოლოდ 10-ს დამატებით. ამრიგად, 38 ამერიკული ზომის პალტო მოერგება ქართულ 48 ზომას.
5. იტალიური
იტალიაში ვაჭრობისას, თუნდაც ვირტუალური იყოს, უნდა იცოდეთ, რომ იტალიური ზომები მითითებულია ციფრებით – 42, 44 და ა.შ. იტალიური ზომები ქართულს შეესაბამება. მხოლოდ 2 ერთეულის გამოკლებით. მაგალითად, ქართული 46 ზომა იტალიურ 44 ზომას შეესაბამება.
6. ჩინური
ერთადერთი ცხრილი, რომელსაც არ აქვს კონკრეტული აღნიშვნა. სხვადასხვა მწარმოებელი თავიანთ პროდუქტზე განსხვავებულ ზომებს იყენებს. ამიტომაც, ჩინურ საიტზე ვაჭრობისას ყურადღება გაამახვილეთ გამყიდველის ან მწარმოებლის მიერ მოწოდებულ ზომების ცხრილს. თუ შესაძლებელია, კონკრეტულ ნივთზე შეფასებებს გაეცანით. მყიდველები ხშირად წერენ, როგორ ჯდება კონკრეტული ზომა და რას უნდა მიაქციოთ ყურადღება შეძენისას.
ახლა, როცა იცით, როგორ განსაზღვროთ თქვენი ტანსაცმლის ზომა, უცხოურ საიტებზე ნივთებს უფრო თავდაჯერებულად და სწრაფად შეიძენთ. აი, ფეხსაცმლის შეძენას გირჩევთ ოფლაინ მაღაზიებში, რადგან იქ შეძლებთ ზუსტად გაიგოთ, რა მასალისგან დამზადებულია ფეხსაცმელი, ტყავისგან თუ ტყავის შემცვლელისგან.
