ჩაის და ყავის მოყვარულებმა იციან, რამდენად რთულია მუქი ნადების მოშორება ჭიქებიდან. საყვარელი და ხშირად გამოყენებული ფინჯანი დროთა განმავლობაში მუქდება, ჩაის დალევისთანავე წყლის გამოვლების შემთხვევაშიც. ერთი შეხედვით, ასეთი ჭუჭყის მოშორება მხოლოდ ჯაგრისით შეიძლება, მაგრამ „პაპარაცი“ გიზიარებთ უფრო მარტივ მეთოდს ჩაის ლაქების მოსაშორებლად.
ხრიკი, როგორ მოაშოროთ ჩაის ლაქები ფინჯანს
შარშან ახალ წელს თეთრი ლამაზი ფინჯნების ნაკრები მაჩუქეს. რა თქმა უნდა, მაშინვე გამოვიყენე. რამდენიმე თვის შემდეგ შევნიშნე, რომ ფინჯნებში მუქი ნადები გამოჩნდა. იმის მიუხედავად, რომ ყველა ფინჯანი კარგად გავრეცხე, ნადები არ მოშორდა. რა თქმა უნდა, ასეთი ფინჯნების სტუმრებთან გატანის სურვილი არ მაქვს. ხომ იფიქრებენ, რომ ფინჯნები გაურეცხავია.
რჩევა ვკითხე დედამთილს, ვის სახლშიც მსგავსი პრობლემა არასდროს შემინიშნავს. თურმე იყენებს ერთ სპეციალურ ხრიკს ჩაის ლაქების მოსაშორებლად. გარდა იმისა, რომ არასდროს ტოვებს ფინჯანს სასმლით, იყენებს მარტივ ხალხურ საშუალებას. მსგავსი წმენდა რამდენიმე კვირაში ერთხელ საკმარისია, რომ ჩაის და ყავის ნაწილაკებმა კერამიკაში ჩაჯდომა ვერ მოასწროს.
ინგრედიენტები:
- სოდა
- ლიმონის წვენი ან ლიმონმჟავა
- წყალი
- ჭურჭლის სარეცხი ღრუბელი
გამოყენების წესი:
1. ინგრედიენტების რაოდენობა დამოკიდებულია გასარეცხი ჭურჭლის ზომაზე და რაოდენობაზე. პირველ რიგში, სოდა პატარა თასში ჩაყარეთ. ლიმონის წვენი გაწურეთ და სოდას დაუმატეთ. იმდენი ლიმონის წვენი დაუმატეთ, რომ შერევისას პასტის მსგავსი კონსისტენცია მიიღოთ.
2. სურვილისამებრ, ლიმონის წვენი ლიმონმჟავით შეგიძლიათ ჩაანაცვლოთ. ამ შემთხვევაში ლიმონმჟავის კრისტალები სოდას შეურიეთ და ცოტა წყალი დაუმატეთ, რომ ფაფა მიიღოთ.
3. საშუალება თითქმის მზადაა. ჭიქას გვერდებზე და ძირში ნარევი წაუსვით და თხელ ფენად გადაანაწილეთ. 7-10 წუთი გააჩერეთ.
4. ამის შემდეგ ჭიქა ჯერ მშრალი ღრუბლით შიგნიდან გაწმინდეთ, შემდეგ სველი ღრუბლით გამდინარე წყალში გარეცხეთ. ფინჯანი სწრაფად გაირეცხება.
ახლა იცით, როგორ მოაშოროთ ჩაის ან ყავის ლაქები თქვენს საყვარელ ფინჯანს. უდავოდ, შედეგი მოგეწონებათ. ამ მარტივი ხალხური საშუალების წყალობით ჭურჭელი სისუფთავით იბრწყინებს. თან მსგავსი საწმენდი პასტა შეგიძლიათ გამოიყენოთ სხვა ჩამჯდარი ჭუჭყის მოსაშორებლად. არ დაგავიწყდეთ ხელთათმანის გაკეთება, თუ მგრძნობიარე კანი გაქვთ, რათა გაღიზიანება თავიდან აიცილოთ.
