არასოდეს მქონია ჩვევა, რომ ჩემი ქმრის პიჯაკი შემემოწმებინა, მასზე სხვა ქალის თმა ხომ არ იყო, ან მისი ტელეფონი შემემოწმებინა იმ მიზნით, რომ რაიმე საეჭვო აღმომეჩინა. გუშინდელმა დღემ კი ყველაფერი შეცვალა
ბანკში რაღაც საქმე მქონდა და დილით ადრე წავედი, რათა რიგში დიდხანს დგომა არ დამჭირვებოდა. დივანზე ჩამოვჯექი და ველოდებოდი. ჩემს სიახლოვეს ორი ქალი იჯდა. დაახლოებით 40 წლისები იქნებოდნენ. უნებურად, მათი საუბარი მოვისმინე. ერთ-ერთი ქალი ჩიოდა, რომ მის ქმარს საყვარელი ჰყავდა, მეორე კი ამშვიდებდა, თუმცა ეტყობოდა, რომ გულში უხაროდა.მოკლედ, ამ ყველაფრის მოსმენა მომიწია. რა მექნა, ქუჩაში ხომ არ გავიქცეოდი!
ქალი ამბობდა, რომ მისი ქმარი სამსახურიდან რაღაცნაირი უცნაური დაბრუნდა. მას თვალები უბრწყინავდა, პერანგზე კი ორი ღილი აკლდა. ალბათ ვნებიანმა მეტოქემ მოგლიჯა ან მოკბიჩა.
მამაკაცი სააბაზანო ოთახში შევიდა, ქალმა კი მისი ტელეფონი შეამოწმა. მან ტელეფონში უცხო ქალის ზარები და შეტყობინებები აღმოაჩინა. მიმოწერა საკმაოდ საინტერესო იყო. მამაკაცი აბაზანიდან გამოვიდა და ქალმა მას თავისივე ტელეფონი მიაწოდა. მამაკაცს თავი არ უმართლებია. მან პირდაპირ უთხრა, რომ მას უკვე დიდი ხანია სხვა ქალი უყვარდა, ის კი ეცოდებოდა. – მე მას ჩემი საუკეთესო წლები დავუთმე, ჩემი ახალგაზრდობა… – ჩიოდა ქალი.
ამ დროს ზარის ხმა გაისმა, ჩემი რიგი იყო. ავდექი და ბანკის სპეციალისტთან შევედი. მოსმენილი საუბარი მოსვენებას არ მაძლევდა. უბრალოდ, მეც 40 წლის ქალი ვარ და მალე მე და ჩემს ქმარს ვარდის ქორწილი გვექნება. ბევრს ვფიქრობდი, ვიხსენებდი, თუ როგორ იქცეოდა ჩემი ქმარი სახლში დაბრუნების შემდეგ და იცით, მისი საქციელი ცოტა უცნაურად მომეჩვენა. ამიტომ როდესაც ჩემი ქმარი მოვიდა, უკვე ყველაფერი მტკიცედ მქონდა გადაწყვეტილი.
ის ღამის 11 საათზე მოვიდა. მე მას დავაკვირდი – თვალები არ უბრწყინავდა, უბრალოდ ეხუჭებოდა. ძალიან დაღლილი იყო… მაგრამ რისგან? იმ მოტყუებული ქალივით მოვიქეცი, ქმრის ტელეფონი შევამოწმე, როდესაც ის სააბაზანო ოთახში შევიდა. ვაღიარებ, ცოტა მრცხვენოდა, რადგან ასეთი რამ ჩვენი ერთად ცხოვრების მანძილზე პირველად ხდებოდა. მაგრამ, რადგან დავიწყე, საქმე ბოლომდე უნდა მიმეყვანა. და… აი! მას ვიღაც დედოფალი სწერდა და თან უფრო ხშირად, ვიდრე ბანკი.
მიმოწერა არ წამიკითხავს – მეშინოდა, რომ რაიმე ისეთი არ მენახა. შემდეგ ზარების ჟურნალი შევამოწმე, ვნახე, რომ ამ ნომერზე უამრავი გამავალი და შემომავალი ზარი იყო.გაოგნებული დავრჩი! გულისრევის შეგრძნება მქონდა! შემდეგ კი გადავწყვიტე, რომ დამელია.ტელეფონის ტუმბოზე დადება მინდოდა და უცებ ჩემს წინ ჩემი ქმარი გაჩნდა… ამ მომენტში არ ველოდი შიშველი მოღალატის ნახვას, რომელსაც წელზე ნამიანი პირსახოცი ჰქონდა შემოხვეული.
სახეზე მეწერა, რომ რაღაც ცუდი მოხდა. ქმარმა მიზეზი მკითხა, მე კი ვეღარ მოვითმინე:
- რა მიმოწერა და ზარები გაქვს ვიღაც დედოფალთან?ქმარმა როგორც კარადას, ისე შემომხედა. ერთი წუთის შემდეგ კი მიპასუხა:
- სულ ეს არის?
- არასოდეს ვიფიქრებდი, რომ ამის გაკეთება შეგეძლო! – დავადანაშაულე ის.
ძალიან ნაწყენი ვიყავი.ათი წელია ერთად ვართ და როგორ მომექცა! უცებ, ჩემთვის მოულოდნელად მან ტელეფონი აიღო და სწორედ იმ ნომერზე დარეკა. თვალები დავხუჭე, მეგონა, ჩემს მეტოქეს ურეკავდა იმის სათქმელად, რომ ყველაფერი უკვე გარკვეული იყო და მათ დამალვა აღარ მოუწევდათ.
უცებ ჩემმა ტელეფონმა დარეკა, მისი ტელეფონის ეკრანზე კი დედოფალი ეწერა. მაშინვე ვერ მივხვდი, ჩემი ქმარი კი იდგა და მელოდა, როდის გავიაზრებდი.
მერე ნელ-ნელა მივხვდი… გამახსენდა, რას მეძახდა ის, როდესაც ერთმანეთს ვხვდებოდით… დედოფალი მარგო, რადგან მე მარგარიტა მქვია.
