„ეს კარტოფილის მოხარშვა არ გეგონოს!“ – ალბათ, ხშირად გესმით მსგავსი ფრაზა, როცა სურთ საქმის სირთულეს ხაზი გაუსვან. თითქოს ნაცნობი ბოლქვების მომზადება ასეთი მარტივი საქმე იყოს.
მართლაც, უბრალოდ ჩაყარეთ გათლილი კარტოფილი წყალში და მოხარშეთ, სანამ არ დარბილდება. ნუთუ შეიძლება აქ შეცდომის დაშვება? აღმოჩნდა, რომ შეიძლება და ჯანმრთელობისთვის შედეგები საკმაოდ უსიამოვნო შეიძლება იყოს. განვიხილოთ, რამდენ ხანს უნდა ხარშოთ კარტოფილი და როგორ გააკეთოთ ეს სწორად, რომ მისი სარგებელი შეინარჩუნოთ.
რამდენ ხანს ვხარშოთ კარტოფილი
კარტოფილიდან ათობით კერძის მომზადება შეგიძლიათ: მოხარშეთ, გამოაცხვეთ, შეწვით, გირცები გააკეთეთ, პელმენები მოამზადეთ, ბლინები და ბევრი სხვა გემრიელობა. ყველაზე ხშირად ბოსტნეულს ვხარშავთ ან პიურეს ვამზადებთ. ასე უფრო სწრაფად და მარტივად მზადდება.
თეორიაში ყველაფერი მარტივია. აი, პრაქტიკაში ხშირად გვავიწყდება მნიშვნელოვანი ელემენტი – ბოლქვის დამუშავების ტემპერატურა. რომელ წყალში უნდა მოვხარშოთ კარტოფილი, ცხელში თუ ცივში, და რატომ არის ეს მნიშვნელოვანი?
უმეტესობა ჩვენგანი კარტოფილს ოთახის ტემპერატურის წყალს ასხამს და ხარშავს დარბილებამდე. დაახლოებით 25-30 წუთი იხარშება ბოსტნეულის ჯიშისა და სიმწიფის მიხედვით. თითქოს, შეცდომის დაშვება შეუძლებელია. სინამდვილეში, კარტოფილის მოსახარშად ცივი წყლის გამოყენება საზიანოა.
საქმე იმაშია, რომ კარტოფილი დაკარგავს ბევრ სასარგებლო ნივთიერებას იმ მომენტში, როცა წყალი ადუღდება. ეს არის ღირებული მინერალები და ვიტამინები: კალიუმი, მაგნიუმი, ფოსფორი, რკინა, A, PP, B1, B5 და B6 ვიტამინები. საბოლოოდ ვიღებთ სახამებლის მასას, რომელიც დაგანაყრებთ, მაგრამ სარგებელს ვერ მოგიტანთ.
როგორ მოვხარშოთ კარტოფილი სწორად?
ყველაფერი ძალიან მარტივია: კარტოფილი ცხელ მარილიან წყალში მოათავსეთ. ასე ყველა ღირებულ ნივთიერებას შეინარჩუნებს. ბოლქვები თანაბრად რომ მოიხარშოს, საშუალო ცეცხლზე ხარშეთ და არა ძლიერზე.
ყურადღება მიაქციეთ კიდევ ერთ მნიშვნელოვან მომენტს: დროის დაზოგვის მიზნით ხშირად კარტოფილს ვთლით ვახშმამდე რამდენიმე საათით ადრე და ცივ წყალში ვტოვებთ. აღიარეთ, ასე აკეთებთ თქვენც? გონივრულად გამოიყურება, მაგრამ იმავე შეცდომას შეიცავს. რაც უფრო დიდხანს გააჩერებთ კარტოფილს ცივ წყალში, მით მეტ ვიტამინს და მინერალს დაკარგავს. ამ მიზეზით ბოლქვები გათალეთ უშუალოდ მომზადების წინ.
კიდევ რამდენიმე ხრიკი
1. კარტოფილი 5-7 წუთით უფრო სწრაფად რომ მოიხარშოს, ქვაბს რამდენიმე ნაჭერი კარაქი დაუმატეთ. ის გადნება, წყალს თხელ ფირად გადაეკვრება და აორთქლებას შეანელებს. ასე ქვაბში ტემპერატურა გაიზარდება და ბოლქვები სწრაფად მომზადდება.
2. მომავალ გარნირს დახვეწილ არომატს შემატებს რამდენიმე ნაჭერი ხახვი ან ნივრის კბილი, შუაზე გაჭრილი. ქვაბს დაფნის ფოთოლი ან საყვარელი სანელებლებიც შეგიძლიათ დაუმატოთ. უკვე მზა კარტოფილს კი შეგიძლიათ დაჭრილი კამა მოაყაროთ.
3. თუ ოთახის მცენარე გაქვთ, კარტოფილის ნახარში არ გადაღვაროთ, განსაკუთრებით თუ სწორად მოამზადეთ. ნახარში გააგრილეთ და საყვარელი მცენარის მოსარწყავად გამოიყენეთ. ამ მკვებავ სითხეში საკმარისი რაოდენობის მაგნიუმი, კალიუმი, ფოსფორი და რკინაა, რომ ნაყიდი სასუქი ჩაანაცვლოს. კარტოფილის ნახარში წყალი კვირაში ერთხელ გამოიყენეთ, ხოლო ნაადრევ გაზაფხულზე და გვიან შემოდგომაზე – თვეში ორჯერ.
4. კარტოფილის წყალი კულინარიაშიც შეგიძლიათ გამოიყენოთ. სითხე იდეალურია, როგორც ბულიონი ბოსტნეულის წვნიანისთვის, რადგან ბევრ სასარგებლო ნივთიერებას შეიცავს.
ამ მარტივი რეკომენდაციებით მოხარშული კარტოფილის მომზადების ხელოვნებაში გურუ გახდებით.
