დღეს „პაპარაცი“ გიზიარებთ კომბოსტოს ტოლმის უკრაინულ რეცეპტს, რომელიც ნებისმიერ სეზონზე შეგიძლიათ მოამზადოთ. ბრინჯით და კომბოსტოთი მომზადებული ტოლმა საოცრად ნაზი გამოდის. ამავდროულად, ძალიან ბიუჯეტურია და დამწყები დიასახლისიც ადვილად გაუმკლავდება.
თქვენ დაგჭირდებათ პატარა თავი კომბოსტო, რომელიც მდუღარე წყალში უნდა მოხარშოთ. სანამ კომბოსტო მდუღარე წყალში იხარშება, ცალკეულ ფურცლებად დაშალეთ. ამის გაკეთება ჩანგლით უფრო ადვილია. როცა კომბოსტოს ყველა ფურცელს დააცალკევებთ, კომბოსტო მდუღარე წყლიდან ამოიღეთ და გასაცივებლად გვერდზე გადადეთ. სანამ კომბოსტო ცივდება, მომავალი ტოლმის შიგთავსი მოამზადეთ.
ტოლმა ბრინჯით და კომბოსტოთი უკრაინულ სტილში
შიგთავსისთვის დაგჭირდებათ 2 ჭიქა ბრინჯი და ბოსტნეული. ბრინჯი გამდინარე წყალში რამდენჯერმე გარეცხეთ და გვერდზე გადადეთ. მომავალი ტოლმისთვის ბოსტნეული შეწვით. ტაფაზეც ცოტა მზესუმზირას ზეთი დაასხით. სანამ ზეთი ცხელდება, საშუალო ზომის ხახვი გაასუფთავეთ და პატარა კუბებად დაჭერით. ტაფაზე ზეთში მსუბუქად შეწვით.
სანამ ხახვი იწვება, 1 საშუალო ზომის სტაფილო გათალეთ და წვრილად გახეხეთ, შემდეგ ხახვს ტაფაზე დაუმატეთ. მორევა არ დაგავიწყდეთ, რომ ინგრედიენტები თანაბრად შეიწვას. 2-3 კბილი ნიორი კუბებად წვრილად დაჭერით და ტაფაში ჩაამატეთ. თუ ცხარე შეგრძნებები გიყვართ, ცხარე წიწაკა აიღეთ, მარცვლებისგან გაწმინდეთ, წვრილ ზოლებად დაჭერით და შემწვარ ბოსტნეულს დაუმატეთ. კარგად აურიეთ, 2 სუფრის კოვზი ტომატის პასტა დაუმატეთ და სუსტ ცეცხლზე კარგად ჩაშუშეთ.
როცა ბოსტნეული შეიწვება, ბრინჯი დაუმატეთ. ასევე გემოვნებით სანელებლები და მარილი დაუმატეთ. ცოტა მცენარეული ზეთი მოასხით და კარგად აურიეთ. ახლა კომბოსტოს ფურცლებს დაუბრუნდით. ფურცლებს სქელი ფენები მოაჭერით. თუ ფურცლები დიდია, რამდენიმე ნაწილად დაჭერით. პატარა ზომის ტოლმა უნდა მოამზადოთ, ამიტომ კომბოსტოს პატარა ფურცლები გაამზადეთ.
სამარხვო ტოლმა ხორცის გარეშე
აიღეთ ერთი კომბოსტოს ფურცელი, ცოტა შიგთავსი დაუმატეთ და ფრთხილად შეახვიეთ. ტოლმა უკრაინულ სტილში განსაკუთრებული მეთოდით იხვევა. თითქოს ქაღალდიდან კონუსის ფორმის ტომსიკას ახვევთ. ზემოდან ფურცლის კიდეები დაახურეთ და ტოლმაში შიგნით ჩატენეთ. ასე მიიღებთ კომბოსტოს პატარა ტომსიკებს ბრინჯის შიგთავსით. ქვაბის ძირში კომბოსტოს გადაჭრილი ფურცლები ჩააფინეთ, რომ ნაზი ტოლმა არ დაიწვას. ტოლმა ქვაბში ფრთხილად ჩააწყვეთ.
ტოლმისთვის საწებელი მოამზადეთ. 2 სუფრის კოვზი ტომატის პასტა, მწიკვი მარილი და ცოტა თბილი წყალი აურიეთ. მიღებული ნარევი ტოლმას მოასხით. ზემოდან წყალი დაასხით ისე, რომ ქვაბში ტოლმის ნახევარზე მეტი წყლით დაიფაროს. ტოლმები კარგად უნდა ჩაიშუშოს, ხოლო ბევრი საწებელი მათთვის ყოველთვის კარგია. ცოტა მზესუმზირას ზეთი ქვაბში ჩაასხით და ცეცხლზე დადგით. თავსახური დაახურეთ და ტოლმა კარგად ჩაშუშეთ. როცა წყალი ადუღდება, ცეცხლს დაუწიეთ, თავსახური მოხსენით და კიდევ 30 წუთი ცეცხლზე გააჩერეთ.
არომატული ნაზი დიეტური ტოლმა ბრინჯით და კომბოსტოთი მზადაა. ასეთი კერძი მარხვის დღეებში შეგიძლიათ მოამზადოთ ან მათთვის, ვისაც ვეგეტარიანული საკვები უყვარს.
