არაჟანი ერთ-ერთი ყველაზე გავრცელებული რძის პროდუქტია. მისგან ამზადებენ ცომეულს, არაჟანს ამატებენ სოუსში, სალათაში, ბლინებში, ფუნჩულებში და სხვა კერძებში. მაგრამ ბევრ მწარმოებელს შორის ნამდვილად ხარისხიანი პროდუქტის პოვნა ძალიან რთულია. თუმცა მაღაზიაში არაჟნის ყიდვა აუცილებელი არაა. გასწავლით, როგორ მოამზადოთ არაჟანი სახლის პირობებში. ასე მიიღებთ არა მხოლოდ ხარისხს, არამედ გემოს.
ეს რეცეპტი სამსახურში კოლეგამ გამაცნო. როცა სოფლიდან დიდი ქილა რძე გამომიგზავნეს, არ ვიცოდი, სად წამეღო ამდენი. ყავაში ძალიან ცოტას ვამატებ, ბლინებს და ფაფებს იშვიათად ვჭამთ. მაშინ კოლეგამ მირჩია არაჟნის გაკეთება. ეს პროდუქტი თავისი ცხიმიანობის წყალობით უფრო დიდხანს ინახება, ვიდრე ნედლი რძე. თან ჩემს ოჯახში არაჟანი უფრო უყვართ. აღმოჩნდა, რომ ამ პროდუქტის სახლში მომზადება ძალიან მარტივია.
როგორ მოვამზადოთ არაჟანი სახლის პირობებში?
მესაქონლეობის განვითარებასთან ერთად რძის პროდუქტების შენახვის სხვადასხვა ვარიანტების ძებნა დაიწყეს. არაჟანი, ცხიმის შემცველობის გამო, რძეზე დიდხანს ინახება, ამიტომ სუფრაზე ხშირად ჩნდებოდა.
ძველად არაჟნის მოსამზადებლად ჯერ რძეს აჩერებდნენ და ნაღების ამოსვლას ელოდნენ. მათ აგროვებდნენ და გრილ ადგილას ინახავდნენ დუღილის პროცესის დასასრულებლად. ამის შემდეგ მზა არაჟანი უფრო სქელდებოდა. ახლა არაჟანი საწარმოში იწარმოება, რაც მზა პროდუქტის მიღებას აჩქარებს და ამარტივებს. თუმცა არაჟნის მომზადება სახლშიც შეგიძლიათ.
სახლის არაჟნის რეცეპტები
რა თქმა უნდა, არაჟნის მოსამზადებლად სახლის რძე საუკეთესო ვარიანტია. თუ ეს პროდუქტი არ გაქვთ, მაღაზიაში ცხიმიანი რძის ყიდვას გირჩევთ. გახსოვდეთ, რომ არაჟნის გემო პირდაპირ არის დამოკიდებული რძეში ცხიმის შემცველობის მაჩვენებელზე.
არაჟანი რძისგან
1. მინანქრის ან ალუმინის ქვაბში თხელი პირსახოცი ჩააფინეთ. მასზე ლიტრიანი ქილა მოათავსეთ და ქილა რძით შეავსეთ.
2. ქვაბში კი წყალი ჩაასხით ისე, რომ ქილა ბოლომდე წყალში აღმოჩნდეს. არ დაგავიწყდეთ, რომ წყალი გაცხელებისას ფართოვდება. წყალი რძეში რომ არ მოხვდეს, ქილის პირამდე არ გაავსოთ.
3. ქვაბი ცეცხლზე დადგით და წყლის ადუღებას დაელოდეთ. ქვაბის ქურიდან გადადგმა არ იჩქაროთ. საჭიროა, რომ ქილაში რძემ თითქმის დუღილის წერტილს მიაღწიოს, მაგრამ არ ადუღდეს. თუ სპეციალური გრადუსი გაქვთ, 85-90 გრადუს ტემპერატურაზე ორიენტაცია გქონდეთ. როგორც კი ეს მოხდება, ქილა წყლიდან ამოიღეთ და ოთახის ტემპერატურაზე გასაცივებლად გააჩერეთ.
4. თბილ რძეს კვეთი დაუმატეთ. ამ მიზნით მაღაზიაში ნაყიდი მზა პროდუქტი შეგიძლიათ გამოიყენოთ ან ჩვეულებრივი არაჟნით ჩაანაცვლოთ. 3 სუფრის კოვზი არაჟანი 1 ლიტრი რძის ფერმენტაციაში დაგეხმარებათ. რძეს კარგად აურიეთ და სითბოში მინიმუმ 40 წუთი გააჩერეთ. უფრო დიდხანსაც შეგიძლიათ გააჩეროთ.
5. ამის შემდეგ რძის მასა მარლაზე მოათავსეთ და დაწურვა აცადეთ. როგორც კი მასა მთლიანად გაცივდება, მზა არაჟანს მიიღებთ.
არაჟანი კეფირისგან
კეფირისგან არაჟნის მოსამზადებლად დაგჭირდებათ მარლა, საწური და 1 ლ რძემჟავა პროდუქტი. საწურზე 4-6 ფენად გაკეცილი მარლა ჩააფინეთ. საწური თეფშზე დადეთ, შემდეგ კეფირი დაასხით. საწური კეფირით მთელი ღამე (მინიმუმ 8 საათი) მაცივარში გააჩერეთ. ამ დროში კეფირს შრატი გამოეყოფა და ქვემოთ ჩაიწურება, მარლაზე დარჩება გემრიელი სახლის არაჟანი. სხვათა შორის, შრატიც შეგიძლიათ გამოიყენოთ.
