ტკბილი ცომეული ყოველთვის არ აზიანებს სხეულის ფორმებს. შეგიძლიათ მოამზადოთ დაბალკალორიული დესერტი, რომლის გემო ყველას მოეწონება. ხაჭოს მობრაწულა შაქრის და ხორბლის ფქვილის გარეშე ერთ-ერთი ასეთი დესერტია.
მის მოსამზადებლად მინიმალური ინგრედიენტები დაგჭირდებათ. დამატკბობლად შაქრის ნაცვლად თაფლი გამოიყენეთ. ასე დესერტი გამოვა არა მხოლოდ გემრიელი, არამედ ბევრად უფრო სასარგებლო! აღსანიშნავია, რომ თავად შეგიძლიათ გაზარდოთ კერძში დამატებული პროდუქტის რაოდენობა. ამ დესერტის მომზადებისას ექსპერიმენტების არ უნდა შეგეშინდეთ. დაუმატეთ გაყინული კენკრა ან ქიშმიში, მზა დესერტის გემო უფრო საინტერესო გახადეთ.
არომატული ხაჭოს მობრაწულა უშაქროდ: მომზადების თავისებურებები
ამ ზღაპრული დესერტის გამოსაცხობად გამოიყენეთ 12 სმ დიამეტრის საცხობი ფორმა. ასე დესერტი გამოვა საკმარისად მაღალი და ძალიან გემრიელი. რეკომენდებულია, რომ ცხობის დროს ღუმელის ძირში მოათავსოთ წყლით სავსე ქვაბი. ასე შექმნით წყლის აბაზანას, რომელიც აუცილებელია იდეალური მობრაწულის მისაღებად.
ინგრედიენტები:
- 250 გ უცხიმო ხაჭო
- 2 ჩ/კ თაფლი
- 70 გ შვრიის ფანტელები
- 3 კვერცხი
მომზადების წესი:
1. შვრიის ფანტელები ბლენდერის ჭიქაში მოათავსეთ. ნაფშვენის მიღებამდე დააბლენდერეთ და თასში გადაიტანეთ. შვრიის ფანტელებს 1 კვერცხი დაუმატეთ და კარგად აურიეთ.
2. უცხიმო ხაჭო, 2 კვერცხი და თაფლი აურიეთ. ინგრედიენტები ათქვიფეთ ერთგვაროვანი მასის მიღებამდე.
3. საცხობი ფორმის ძირში პერგამენტის ქაღალდი ჩააფინეთ. შვრიის მასა გადაიტანეთ და თანაბრად გაანაწილეთ.
4. ზემოდან ხაჭოს მასა მოათავსეთ. სპატულით ან კოვზით თანაბრად გაანაწილეთ. 180 გრადუსამდე გახურებულ ღუმელში 40 წუთი აცხვეთ. მზადაა!
დესერტი ღუმელიდან არ გამოიღოთ, როცა ცხობის დრო დასრულდება. ჯერ ღუმელის კარი ოდნავ შეაღეთ და 30 წუთი მოიცადეთ. ამის შემდეგ შეგიძლიათ გამოიღოთ ხაჭოს მობრაწულა ღუმელიდან და დაჭრათ ნაჭრებად. სურვილის შემთხვევაში, დესერტი გააფორმეთ პიტნის ფოთლებით, ასევე კენკრით ან ხილით. ასეთი დეკორით დესერტი კაშკაშა და მადისაღმძვრელი გამოჩნდება!
