გსურთ რაიმე გემრიელი ჩაიზე მისაყოლებლად, მაგრამ არ გაქვთ საფუვრის ცომის მომზადების სურვილი? „პაპარაცი“ გთავაზობთ ძალიან მარტივი, მაგრამ გემრიელი ცომეულის რეცეპტს. ფუმფულა ხაჭოს რულეტი ვაშლით და დარიჩინის მსუბუქი არომატით არის ის, რაც გჭირდებათ თქვენს საყვარელ ფინჯან ცხელ სასმელზე მისაყოლებლად.
უნაზესი ცომი და ბევრი ხილის შიგთავსი! ალბათ, ყველაზე იდეალური კომბინაციაა, რომელსაც ტკბილეულის მოყვარულები სათანადოდ დააფასებენ. ახალგამომცხვარი არომატული რულეტის ნაჭერზე უარს ვერავინ იტყვის.
როგორ გამოვაცხოთ ხაჭოს რულეტი ვაშლით მარტივად და გემრიელად
ამ დესერტის მომზადებისას ფქვილის რაოდენობის დარეგულირება თავად მოგიწევთ. ფქვილის საჭირო რაოდენობა დამოკიდებულია თქვენი ხაჭოს სისველეზე. გაითვალისწინეთ ეს მომენტი რძემჟავა პროდუქტის ყიდვისას.
ინგრედიენტები:
- 400 გ ხაჭო
- 100 გ არაჟანი
- 80 გ კარაქი
- 2 კვერცხი
- 0,5 ჩ/კ მარილი
- 300 გ ხორბლის ფქვილი
- 10 გ გამაფხვიერებელი
- ვანილი გემოვნებით
- 80 გ შაქარი
- 700 გ ვაშლი
- 0,5 ჩ/კ დაფქული დარიჩინი
მომზადების წესი:
1. შიგთავსი მოამზადეთ. ვაშლი კარგად გარეცხეთ და გაამშრალეთ. თესლი მოაშორეთ. ხილი პატარა კუბებად დაჭერით.
2. ცხელ ტაფაზე 30 გ კარაქი გაადნეთ. დარიჩინი და 30 გ შაქარი დაუმატეთ. შაქრის სრულად გახსნამდე კარგად აურიეთ. ვაშლი დაუმატეთ. სითხის სრულად აორთქლებამდე ჩაშუშეთ.
3. ცომი მოზილეთ. წვრილმარცვლოვანი ხაჭო, 1 კვერცხი, 50 გრამი შაქარი და მარილი აურიეთ. დარჩენილი რბილი კარაქი და ცივი არაჟანი (15%-იანი) დაუმატეთ. ინგრედიენტებს კარგად აურიეთ.
4. თანდათან დაუმატეთ გაცრილი ხორბლის ფქვილი, გამაფხვიერებელი და ვანილი. ცომი დააგუნდავეთ. ორ თანაბარ ნაწილად გაყავით.
5. ცომის ნახევრები 8 მმ სისქის მართკუთხედებად გააბრტყელეთ. თითოეულს ვაშლის შიგთავსი დაუმატეთ, კიდიდან 2 სმ-ს დაშორებით. რულეტი დაახვიეთ. ნამზადები პერგამენტდაფარებულ საცხობ ფორმაზე გადაიტანეთ.
6. კვერცხი ათქვიფეთ. რულეტებს წაუსვით. 180 გრადუსამდე გახურებულ ღუმელში 20-25 წუთი აცხვეთ. მზადაა!
რულეტის მომზადება კბილის ჩხირით შეამოწმეთ, სანამ ღუმელიდან გამოიღებთ. თუ საჭიროა, დესერტი ღუმელში კიდევ რამდენიმე წუთი აცხვეთ. გემრიელად მიირთვით!
