როგორი დამოკიდებულება უნდა ჰქონდეს ქალს ქმრისადმი, რომელმაც მიატოვა

0
467

ქორწინებას აქვს როგორც დადებითი, ისე უარყოფითი მხარეები. ორ მოსიყვარულე ადამიანს შორის ურთიერთობა ყოველთვის რაღაც დიდ მოვლენაში არ გადაიზრდება ხოლმე. თუმცა, ღირს თუ არა პარტნიორის კუდში დევნა, გულუბრყვილო ლეკვივით? იქნებ, სჯობს ქმარი შორს გაუშვათ, იქ, სადაც მზე დასავლეთიდან ამოდის და აღმოსავლეთით ჩადის?

ტრადიციულად, ოჯახის მარჩენლად დღემდე ქმარი ითვლება. არადა, ქალსაც შეუძლია მუშაობა, ფულის დაგროვება, საუბარი, რეცხვაცა და დალაგებაც. ნუ დაგავიწყდებათ ამ “პატარა” წინსვლების შესახებ. თუმცა, ჩვენს ქალებს არ შეუძლიათ საკუთარი თავის დაცვა საჭირო დროს, როგორც ამას დასავლეთში აკეთებენ.

მამაკაცის გაშვება

ეს ისტორია თავს 1 კვირის წინ გადამხდა. ბაზარზე პროდუქტის საყიდლად წავედი. გამოსასვლელში საკმაოდ ბევრი ხალხი იყო. მიუხედავად იმისა, რომ დილით ადრე წავედი, შინ მხოლოდ შუადღის 2-ზე დავბრუნდი. მოკლედ, მთელი დღე დავკარგე.

კარი დაკეტილი არ იყო, ესე იგი, ქმარი არ წასულა. ბავშვები ბებიასთან არიან დასასვენებლად. მე კი ჩვევად მაქვს გამოსვლამდე ბინის დაკეტვა. ზუსტად ვიცოდი, რომ დავკეტე.

ბინაში შესვლისას, გაოფლიანებულმა და დაღლილმა, ქმარს დავუძახე, პარკების ამოლაგებაში რომ დამხმარებოდა. ავთოს პასუხი არ გაუცია. საძინებელში რომ შევედი, დავინახე, როგორ იდგა კარადის წინ და თაროებიდან ტანსაცმელს ჩემოდანში ალაგებდა. არც კი გამკვირვებია, იმდენად დაღლილი ვიყავი. უბრალოდ მინდოდა, სწრაფად გამეგო, ამჯერად რა მოხდა.

– აღარ შემიძლია, დავიღალე. ტანსაცმელს ვალაგებ და მივდივარ. არ იდარდო, ბავშვებს დღესვე დავურეკავ და ავუხსნი, ნუ გამაჩერებ, დიდი ხნის წინ გადავწყვიტე ყველაფერი.

პარკები ხელიდან დამიცვივდა, ხილი და ბოსტნეული მიმოიფანტა. ამისთვის ყურადღება საერთოდ არ მიმიქცევია. შოკი მივიღე. მოწმენდილ ცაზე მეხი გავარდა-სავით. სიახლე, რომლის მოსმენასაც არასდროს ელოდები, განსაკუთრებით, ასეთ სიტუაციებში.

– მეხუმრები? რა მოხდა? როდის გაიცანი სხვა ან სად მიდიხარ? დაჯექი, ვილაპარაკოთ, ბავშვებზე იფიქრე.

– არა, უკვე გადავწყვიტე. მთელი დღე სამსახური, სახლი, შენთან კამათი, ბავშვების ხმაური. არ მინდა, რომ ცხოვრებამ ასე ჩამიაროს. ჯერ კიდევ შემიძლია, ცხოვრება სხვა მხარეს წარვმართო, ჯერ არ დავბერებულვარ. ნახე, როგორ გამოიყურები, უკვე ვეღარ გიყურებ. სად წავიდა შენი ფიგურა და ლამაზი სახე?

მართლაც, გარეგნობა… როდის გაიაზრებენ მამაკაცები, რომ ჩვენ, ქალები, თავს მათთვისვე ვწირავთ. ბავშვებს ვწირავთ. ოჯახის კეთილდღეობას ვწირავთ. მთელი დღეები სილამაზის სალონებში რომ ვატარო და სავარჯიშოდ დარბაზში ვიარო, ბავშვები მშივრები დაიხოცებიან.

– ბავშვები? უმამოდ როგორ იცხოვრებენ?

– ახლა ბავშვები უფრო სწრაფად იზრდებიან, ვიდრე მანამდე. თან ლიკა უკვე სკოლაში დადის. აღარაა პამპერსებიანი გოგო, როგორღაც გაუძლებს. ალიმენტებს გადავიხდი.

ალბათ, ფიქრობდა, რომ მისი ალიმენტი რამეს ეყოფოდა. ეკონომისტი. თვითონაც ორ ლარად მუშაობს. რას მივიღებთ მისგან?

– ასეთი ზარმაცი ხარ. კიდევ რისგან დაიღალე?

– მინდა სანადიროდ ვიარო, მეგობრებს შევხვდე. ყოველდღე სამსახურის მერე ამ სახლში მოსვლა და შენი წუწუნის მოსმენის თავი არ მაქვს. არაა სასიამოვნო. აღარ მაფასებ, აღარ მიღებ. ჩემს სახლში ტელევიზორსაც ვერ ვუყურებ შენი გესლის გარეშე. ცოლი, პირველ რიგში, მეგობარი უნდა იყოს!

– და შენ რა გააკეთე ამ ბოლოს ასეთი? სამსახურიდან მოხველი, ჭამე-სვი და დივანზე ჩათვლიმე. ან ტელევიზორს უყურე და ინტერნეტში რაღაც სისულელეები წაიკითხე. პოლიტიკური, ფეხბურთის და მსგავსი “მნიშვნელოვანი” სიახლეები. კიდევ ერთხელ გეკითხები, რამ დაგღალა?

სიტუაცია აუტანელი ხდებოდა. მესამე, ჩემზე უფროსი შვილი გამიჩნდა. თან ის რაღაცას ითხოვდა, მაგრამ თვითონაც ვერ ხვდებოდა, რას. რაში მჭირდება? სახლში 1 თეთრიც არ მოაქვს. მანქანის საყიდლად აგროვებს ფულს. მე არ მაფასებს. რაში მჭირდება ეს ტვირთი?

ბავშვები? დაიზრდებიან, სად წავლენ. მერე მიხვდებიან, რომ მამამ თავისი სიამოვნებისთვის მიატოვა. მე კი მათთან დავრჩები. არაუშავს, გავუძლებთ.

ახლა ბავშვები სოფლიდან ჩამოვიდნენ. მეგონა, რომ იდარდებდნენ ან, მაგალითად, მამის წასვლაში მე დამდებდნენ ბრალს. მაგრამ არა. ისინი მართლა გაზრდილან და, როგორც ყველა მიხვდით, ეს ჩემზე ადრე მოასწრეს. არ დაიჯერებთ – საჭმელიც მეტი გვაქვს, სამაგიეროდ, ნაკლები გასარეცხი ტანსაცმელი გროვდება.

ახლა აღარ მჭირდება კიდევ ერთი ასკილოიანი ბავშვის მომსახურება. საკუთარი თავისთვისაც დამრჩა დრო. არ ვიცი, ჩემგან სილამაზის დედოფალი აღარ დადგება, მაგრამ აუზზე მაინც წავალ რამდენჯერმე. ჯანმრთელობისთვისაც სასარგებლოა და ბავშვებსაც უნდოდათ წასვლა. ერთად წავალთ, მთელი ოჯახი.