ხანგრძლივი ზამთრის შემდეგ ყოველთვის ვწმენდთ სახლის ფანჯრებს და ვცდილობთ, რომ აღდგომამდე ყველაფერი მოვაწესრიგოთ. აღსანიშნავია, რომ ყველა დასუფთავებით არის დაკავებული: როგორც მორწმუნეები, ასევე ტაძრის იშვიათი სტუმრები და ათეისტებიც. შესაძლოა, ადამიანებზე ასეთ გავლენას გაზაფხული ახდენს. როგორც კი მზე გამოანათებს, ისინი მაშინვე ჭიანჭველებივით მოედებიან ყველაფერს ბაღში, ბოსტანში თუ სახლში.
სახლის დასუფთავებასთან დაკავშირებით ძირითადად სიძნელეები არ არსებობს, მაგრამ ფანჯრების წმენდა ხანდახან დაგვაფიქრებს ხოლმე, თუ როგორ უნდა გავწმინდოთ, რომ მინაზე უსიამოვნო ლაქები არ დარჩეს? სწორედ, ამაზე ვისაუბრებთ პაპარაცის დღევანდელ სტატიაში.
გავწმინდოთ სახლის ფანჯრები
მნიშვნელოვანია: ფანჯრების გაწმენდა უმჯობესია მოღრუბლულ დღეს, როცა გარეთ თბილი და მშვიდი ამინდია. ამ შემთხვევაში გამოიყენება როგორც შეძენილი, ასევე სახლში არსებული საშუალებები. მინების უნაკლო სისუფთავისთვის სხვადასხვა პროდუქტები და ნივთები გამოიყენება. გთავაზობთ დეტალურ სიას:
1. ლიმონმჟავა ან ლიმონის წვენი. ერთ ჭიქა წყალში გაწურეთ ერთი ლიმონი ან დაუმატეთ ცოტაოდენი ლიმონმჟავა (დანის წვერით). ეს ხსნარი უნდა შეასხუროთ შუშის ზედაპირს და შემდეგ გაწმინდოთ რბილი ქსოვილით.
2. ძმარი. ერთ ჭიქა წყალს დაუმატეთ 2 სუფრის კოვზი ძმარი და მინები მიღებული ხსნარით გაწმინდეთ. ამის შემდეგ, მინები მშრალი ქსოვილით მოწმინდეთ.
3. მარილი. 1 ჭიქა წყალში ხსნიან 1 კოვზ ჩვეულებრივ მარილის და ამ სითხით მინებს წმენდენ. შემდეგ ზედაპირს მშრალი ქსოვილით ამშრალებენ.
4. სახამებელი. 1 ლიტრ წყალში – 1 კოვზ სახამებელს ყრიან და ამ საშუალებით მინებს წმენდენ. გაშრობის შემდეგ ფხვნილის ლაქებს მშრალი ქსოვილით წმენდენ.
5. ქაღალდი. ფანჯრების გაწმენდის შემდეგ ჯერ კიდევ ნესტიან მინებს ქაღალდის პირსახოცით, ხელსახოცებით ან საპირფარეშოს ქაღალდით ამშრალებენ. ადრე ამ მიზნით ძველ დაჭმუჭნულ გაზეთებს იყენებდნენ.
6. ჭურჭლის სარეცხი საშუალება. 500 მლ წყალს დაუმატეთ რამდენიმე წვეთი სარეცხი საშუალება და ერთი ჭიქა ძმარი. ფანჯრები ჯერ ამ სითხით იწმინდება, შემდეგ სუფთა წყლით და შემდეგ რბილი ქსოვილით ან ხელსახოცებით.
7. კალიუმის პერმანგანატი (მარგანცოვკა). ამ საშუალების რამდენიმე კრისტალს მთლიანად ხსნიან წყალში, ვარდისფერი სითხის მიღებამდე. მიღებული სითხით წმენდენ მინებს და შემდეგ ზედაპირს ამშრალებენ.
8. ჩაის ნაყენი. ჩაის ნაყენს უმატებენ 1 სუფრის კოვზ ძმარს. საშუალებას უსვამენ მინის ზედაპირს, შემდეგ თბილი წყლით წმენდენ, ბოლოს კი – ქაღალდის პირსახოცით ამშრალებენ.
რჩევები და რეკომენდაციები
ფანჯრების გარეცხვა შეგიძლიათ არა მხოლოდ ოთახებში სისუფთავისა და სილამაზის შესანარჩუნებლად, არამედ სარგებლის მიღების მიზნითაც. თუ მიჰყვებით ნიშნებს და შეასრულებთ გარკვეულ რიტუალურ მოქმედებებს, მაშინ სახლში ოჯახურ ბედნიერებასა და კეთილდღეობას მოიზიდავთ!
ხალხში სჯეროდათ: რაც უფრო სუფთა იქნება ფანჯრები, მით უფრო მეტი კაშკაშა სხივები შეაღწევს სახლში და მზის შუქი ბოროტ ძალას დაამარცხებს. დასუფთავების დროს ხალხი გონებაში წარმოიდგენდა, თუ როგორ გადიოდა ყველაფერი ცუდი ღია ფანჯრებიდან, როგორ აშორებდა წყალი ყველა გაჭირვებას და სახლი ჰარმონიითა და სიხარულით ივსებოდა. ამის შემდეგ ფანჯრები მჭიდროდ იხურებოდა, რათა უბედურება არ დაბრუნებულიყო.
ოდითგანვე ითვალისწინებდნენ აკრძალვებს. ორსულებისთვის ფანჯრების წმენდა დაუშვებელი იყო, რადგან ეს საკმაოდ სარისკო საქმიანობაა და ძალასა და მოხერხებულობას მოითხოვს. აკრძალული იყო წვიმის დროს ფანჯრების რეცხვა, რათა ჩხუბი არ მომხდარიყო. არ შეიძლება ფანჯრების გაწმენდა მზის ჩასვლის შემდეგ, რათა ჭუჭყთან ერთად ბედნიერება და იღბალი არ ჩამოირეცხოთ.
რა წესებს იცავდნენ ფანჯრების წმენდის პროცესში? ფანჯრები ჯერ შიგნიდან იწმინდებოდა, შემდეგ გარედან. მინებს ახალი წითელი ფერის ქსოვილით წმენდდნენ. წყალს დარიჩინს უმატებდნენ სურნელისთვის, რათა სახლში სიმდიდრე მოეზიდათ. წყალში რამდენიმე მონეტას ყრიდნენ, შემდეგ კი იღებდნენ და სუფთა რაფაზე დებდნენ. ფანჯრების გაწმენდის შემდეგ სუფთა წყალს ნაყოფიანი ხის ქვეშ ასხამდნენ.
გადაყარეთ ძველი ნაგავი, მოაწესრიგეთ სახლი და ფანჯრები გაწმინდეთ. არ ვიცი, შეძლებთ თუ არა ამ გზით ფინანსური კეთილდღეობის მოზიდვას, მაგრამ სახლში სისუფთავეს აუცილებლად მოიზიდავთ!
