ხორბლის ბალახს ადამიანებისთვის უამრავი სასარგებლო თვისება აქვს. თუმცა, ბოსტანში ის მავნე სარეველად იქცევა, რომლის მოშორებაც ზოგჯერ ძალიან რთულია. საბედნიეროდ, შეუძლებელი არაფერია! მით უმეტეს, თუ ამ საქმეს გამოცდილი მებაღე ეკიდება, რომელსაც უარესებიც უნახავს ცხოვრებაში.
პაპარაცის დღევანდელ სტატიაში გიამბობთ, როგორ უნდა მოაშოროთ ბოსტანს არასასურველი სარეველა ეფექტურად და მარტივად.
ხორბლის ბალახი
ხორბლის ბალახი – მარცვლეული მცენარეა, რომელიც იმდენად ძლიერია, რომ მას შეუძლია ხის დაფაც კი გაარღვიოს თავისი ღეროებით. ასეთი სარეველების სიმაღლემ შეიძლება 50-100 სანტიმეტრს მიაღწიოს. მთავარი პრობლემა იმაშია, რომ ის მთელ სივრცეს ავსებს და ბოსტანში მზეს არ უშვებს სხვა კულტურებამდე.
ასევე მუდმივად იზრდება ხორბლის ბალახის ფესვთა სისტემაც. ეს გავლენას ახდენს მცენარეების მოსავლიანობაზე. სარეველების გამო ნიადაგი კარგავს თავის საკვებ თვისებებს, შრება და შედეგად შეიძლება უნაყოფო გახდეს. ასევე ხორბლის ბალახის ბუჩქებში სხვადასხვა მწერებს მოსწონთ დასახლება. მათ შეუძლიათ ნარგავებს დამატებითი ზიანი მიაყენონ.
გასაგებია, რომ ბოსტანში ეს მეზობელი რაც შეიძლება მალე უნდა განადგურდეს, მაგრამ ამის სწრაფად გაკეთება ადვილი არ არის. გირჩევთ, ყოველი სააგარაკო სეზონის დაწყებამდე თავიდან აიცილოთ სარეველების გაჩენა. აუცილებელია მთელი მიწის ხარისხიანად დაბარვა და სარეველას ნებისმიერი ნარჩენების მოშორება.
როგორ ვებრძოლოთ სარეველას ბოსტანში
ხორბლის ბალახმა მთელი ბოსტანი გადაფარა? ჩვენ უნდა ვიმოქმედოთ აქ და ახლა. უმარტივესი გზა სარეველების მექანიკური განადგურებაა. ძალზე მნიშვნელოვანია მცენარის ფესვთა სისტემის განადგურება. ეს თუ არ გაკეთდა, ის კვლავ გაიზრდება.
მშრალი და ქვიშიანი ნიადაგის შემთხვევაში, ხორბლის ბალახი შეგიძლიათ უბრალოდ ხელებით ამოგლიჯოთ და დაინახავთ, რომ მიწიდან მხოლოდ მწვანე ნაწილი კი არა, ფესვებიც ამოვა. ამ შემთხვევაში, უნდა შეამოწმოთ, დარჩა თუ არა ფესვების ნაწილები მიწაში, რადგან ეს უკვე საკმარისია იმისთვის, რომ ხორბლის ბალახი კვლავ გაიზარდოს.
მძიმე და თიხიანი ნიადაგი მთლიანად უნდა დაიბაროს. მხოლოდ ამ გზით შესძლებთ სარეველას მოშორებას. ნაკლებად სავარაუდოა, რომ შეძლოთ მისი უბრალოდ ხელებით ამოგლეჯა. ამისათვის იყენებენ არა იმდენად ნიჩბებს, რამდენადაც სპეციალურ ბაღის ჩანგლებს. ფაქტიურად მთელი ტერიტორია უნდა გადათხაროთ, სადაც მიწაა. ყველა ფესვი და ღერო უნდა დაიწვას.
ხორბლის ბალახი ძალიან ბევრი თუ არ არის, მაშინ შეიძლება მცენარე რაღაცით დაიფაროს, რის შედეგადაც მას მზის სხივები ნაკლებად მიეწოდება. გავა დრო და სარეველების ფესვთა სისტემა დასუსტდება. ამის შემდეგ შეძლებთ, რომ მისი ნარჩენები მარტივად მოიშოროთ.
ნიადაგის მულჩირება და სარეველასთან ბრძოლის სხვა მეთოდები
მცირე ნაკვეთებზე ხშირად ხდება ნიადაგის მულჩირება. გაზაფხულზე მიწა უნდა დაიფაროს მულჩის სქელი ფენით, რაც ხელს შეუშლის სარეველას გაჩენას. მულჩირება ასევე გამოიყენება იქ, სადაც სუსტი ფესვთა სისტემის მქონე კულტურები იზრდება.
საქმე ისაა, რომ იქ სარეველას ამოგლეჯა ძალზე რთულია, რადგან შესაძლოა თავად მცენარეების ფესვები დაზიანდეს. დაბარვა კი საერთოდ არ ღირს. მულჩად გამოიყენება ჩამოცვენილი ფოთლები, ჩალა, სპანბონდი და სხვა.
სამწუხაროდ, მულჩირებას აზრი არ აქვს, თუ ხორბლის ბალახის ფესვები ძალიან გაზრდილია. ამ შემთხვევაში სარეველას ამოგლეჯა არ არის ყოველთვის ეფექტური. საჭირო ხდება სპეციალური საშუალებების გამოყენება, რომლებიც მებაღეობის მაღაზიებში იყიდება. ამ ამოცანას ყველაზე უკეთ ჰერბიციდები უმკლავდება.
ჰერბიციდების ამოცანაა სარეველას ფესვების შესუსტება და შემდეგ მთლიანად განადგურება. საშუალება წყალში უნდა განზავდეს გარკვეული პროპორციებით. ეს ინფორმაცია მითითებულია შეფუთვაზე. პროპორციები მწარმოებლის მიხედვით შეიძლება განსხვავდებოდეს.
7 დღის შემდეგ შენიშნავთ, რომ ხორბლის ბალახი დაიწყებს გაყვითლებას. ამ გზით მისი სრულად მოშორება 1-3 კვირაში იქნება შესაძლებელი. ეს ყველაფერი დამოკიდებულია სარეველების რაოდენობაზე და ამინდის პირობებზე, რომელშიც ის იზრდება.
