როგორ დავთესოთ რეჰანი ღია გრუნტში

მწვანილებს შორის რეჰანი ნამდვილად გამორჩეულია და მას ვერ დაეწევა ვერც უბრალო კამა და ვერც უბრალო ოხრახუში. მისი კაშკაშა ფერი და წარმოუდგენელი არომატი იპყრობს ყველა გურმანის გულს. საიდუმლო არ არის, რომ კერძში ასეთი მწვანილის დამატება მას ბევრად უფრო გემრიელს ხდის. თუ თქვენც გსურთ მოამზადოთ კერძები ასეთი სურნელოვანი ინგრედიენტით, წაიკითხეთ, როგორ უნდა დათესოთ რეჰანი ღია გრუნტში.

ამ ინფორმაციის საშუალებით, თქვენს ბოსტანში შეძლებთ ვიტამინებით მდიდარი მწვანილის მოყვანას, რომელიც შემდეგ შეგიძლიათ დაამატოთ სხვადასხვა კერძებს. პაპარაცის დღევანდელ სტატიაში ვისაუბრებთ რეჰანის დათესვის ყველა ნიუანსზე, რაც უხვი მოსავლის მიღებაში დაგეხმარებათ.

როგორ დავთესოთ რეჰანი ღია გრუნტში: ყველა ნიუანსი

თესვის თავისებურებები

თესლიდან რეჰანის მოყვანა აუცილებელია სწორ ადგილას. მას სჭირდება ხანგრძლივი დღის სინათლე. ამიტომ ასეთი მწვანილის მოსაყვანად აირჩიეთ ღია ადგილი (ჩრდილის გარეშე). რეჰანი მორწყვის დიდი მოყვარულია, რაც უნდა იყოს ხშირი, მაგრამ არა უხვი. რაც შეეხება ნიადაგს, აქაც გასათვალისწინებელია რამდენიმე ნიუანსი. აირჩიეთ მსუბუქი, ნაყოფიერი ნიადაგი ნეიტრალური მჟავა-ტუტოვანი ბალანსით. მძიმე თიხნარი ნიადაგი ამისთვის შესაფერისი არ არის.

თესვის ნიუანსები. რეჰანი უნდა დაითესოს ღარებში, სიღრმით არაუმეტეს 1 სმ-ისა. თესლები ერთმანეთისგან 10-15 სმ-ის დაშორებით უნდა ჩაიყაროს. უნდა გაითვალისწინოთ, რომ თესლი საკმაოდ წვრილია. ამიტომ, შეგიძლიათ თესლი ქვიშას შეურიოთ და ასე დათესოთ. შემდეგ ღარები მიწით უნდა შეივსოს და ცელოფანი გადაეფაროს. მნიშვნელოვანია! არ გაჟღინთოთ თესლი თესვის წინ, რადგან ერთმანეთს შეეწებება და ჟელეს მსგავს მასად იქცევა.

მწვანილის სათანადო მოვლა

იმისათვის, რომ რეჰანი იყოს წვნიანი, ხშირი და არომატული, არ დაგავიწყდეთ ნიადაგის გაფხვიერება, სარეველების მოგლეჯა და რეგულარულად მორწყვა. ამ უკანასკნელს არ გადააჭარბოთ, ვინაიდან ნიადაგი ყოველთვის უნდა იყოს ოდნავ ნესტიანი, მაგრამ გუბეების გარეშე. წინააღმდეგ შემთხვევაში, მცენარე შეიძლება დაავადდეს. მწვანილის მოსარწყავად გამოიყენეთ თბილი, ნადგამი წყალი.

როგორც კი რამდენიმე ფოთოლი გამოჩნდება, მწვანილს ზედა ნაწილი მოაჭერით. ეს მისცემს გვერდით ყლორტებს ზრდისა და განშტოების სტიმულს. არ დაგავიწყდეთ მცენარისთვის სასუქის მიცემა. რეჰანის კვება აუცილებელია ზაფხულის პირველი და მეორე თვის შუა პერიოდში. ამ მიზნისთვის შესაფერისია მწვანილებისთვის განკუთვნილი ნებისმიერი ორგანულ-მინერალური სასუქი.

რეჰანის თესვა დაიწყეთ გაზაფხულზე. როგორც კი ტემპერატურა 16–20 გრადუსს მიაღწევს, შეგიძლიათ დაიწყოთ ამ არომატული მწვანილის დათესვა.