ადრე, მანგო საკმაოდ ეგზოტიკურ ხილად ითვლებოდა, ახლა კი მისი ყიდვა ნებისმიერ სუპერმარკეტშია შესაძლებელი. დიასახლისები ხშირად ირჩევენ მანგოს დესერტების ან ხემსისთვის. თუმცა, მისი უჩვეულო გემოთი შეგიძლიათ მხოლოდ მაშინ დატკბეთ, თუ მწიფე ხილს იყიდით. პაპარაცის დღევანდელ სტატიაში გეტყვით, რას უნდა მიაქციოთ ყურადღება და როგორ აირჩიოთ მწიფე მანგო. ეს საკმაოდ მარტივია!
რჩევები, როგორ ავირჩიოთ მწიფე მანგო
ჩვენ გეტყვით, როგორ უნდა ამოიცნოთ მწიფე ხილი დახლზე არსებულ ყველა დანარჩენს შორის. გიზიარებთ კრიტერიუმებს, რომლითაც შეგიძლიათ განსაზღვროთ მწიფეა თუ არა მანგო. დაიმახსოვრეთ, რათა ყიდვისას შეცდომა არ დაუშვათ.
კანის ტექსტურა
მანგოს ზედაპირზე ნაოჭები ან ხორკლი ცუდი ნიშანია. დიდი ალბათობით, ეს კონკრეტული ხილი დაკრეფილია მანამ, სანამ წვნიანი გახდებოდა. რა თქმა უნდა, შეგიძლიათ იყიდოთ თუ ჩასაშუშად გჭირდებათ. თუმცა, ხილში ნაკლები სასარგებლო ელემენტები იქნება. ნამდვილად მწიფე მანგოს უნდა ჰქონდეს გლუვი კანი. თუ მასზე არის პატარა შავი წერტილები, ეს ასევე პროდუქტის სიმწიფის ნიშანია. თქვენ შეგიძლიათ თამამად შეიძინოთ ეს მანგო.
ფერი
ამ შემთხვევაში ყველაფერი საკმაოდ ლოგიკურია: რაც უფრო გაჯერებული და კაშკაშა იქნება კანის ფერი, მით უფრო ტკბილი და წვნიანი იქნება მისი შიდა ნაწილი. თუ ნაყოფი უპირატესად მწვანე ფერისაა, აშკარაა, რომ ის ჯერ ბოლომდე არ არის დამწიფებული. სწორ ფერებს, რომლებიც განსაზღვრავს მანგოს სიმწიფეს, შეგვიძლია მივაკუთვნოთ გაჯერებული ნარინჯისფერი, მოწითალო და მუქი ყვითელი ფერები.
სიმაგრე
მანგოს შემთხვევაში ყურადღება უნდა მიაქციოთ იმასაც, თუ როგორია ნაყოფი შეხებისას. ბევრი უშვებს შეცდომას და ფიქრობს, რომ ჯობია, რაც შეიძლება რბილი მანგო იყიდოს. მაგრამ მაშინ არსებობს რისკი, რომ პროდუქტი უბრალოდ გადამწიფებული იქნება. ასეთი მანგო ისეთივე სარგებელს მოგვიტანს, როგორსაც მწვანე. ხილი, რომელიც ძალიან მაგარია, მოუმწიფებელი იქნება. აუცილებელია ოქროს შუალედის არჩევა. თითების დაჭერისას ხილის რბილობი უნდა იყოს ოდნავ რბილი, თუმცა მანგოზე არ უნდა დარჩეს ჩაღრმავება.
არომატი
ექსპერტები გვირჩევენ, რომ მანგო შეძენამდე დავყნოსოთ. მწიფე ხილი აუცილებლად აფრქვევს ტკბილ არომატს. ის საკმაოდ გამოხატულია მწვანე პროდუქტთან შედარებით. ეს არის მწიფე მანგოს არჩევის კიდევ ერთი გზა.
უდავოა, რომ მანგო ძალიან სასარგებლო ხილია. ტკბილი რბილობი მდიდარია მრავალი ვიტამინითა და მიკროელემენტით. მისი კურკაც კი შეიძლება გამოვიყენოთ სახლში სხვადასხვა მიზნით. ჩვენი რჩევებით, თუ როგორ უნდა აირჩიოთ მწიფე მანგო, თქვენ ნამდვილად არ შეცდებით მისი ყიდვისას.
