მეორადი ტანსაცმლის ჩაცმა უკვე ნორმაა. ზოგჯერ შეძლებული ხალხიც მეორად მაღაზიებს სტუმრობს, რომ იშვიათი ლუქს ბრენდის ნივთები იპოვოს. თუ მეორადი ტანსაცმელი ერთხელ მაინც ნაყიდი გაქვთ, იცით, რომ მას უსიამოვნო სუნი ასდის. ამ არომატის მოშორება პირველივე გარეცხვაზე რთულია. Paparazzi გასწავლით, როგორ მოაშოროთ სუნი მეორადებში ნაყიდ ტანსაცმელს.
როგორ მოვაშოროთ სუნი ტანსაცმელს – ბავშვობიდან მეორადებში ვიცვამ და ამაში სამარცხვინოს ვერაფერს ვხედავ. როცა პატარა ვიყავი, ეს ოჯახის ბიუჯეტის დასაზოგად იძულებითი ზომა იყო. ახლა მეორად ტანსაცმელს გაცნობიერებულად ვყიდულობ. ამრიგად, ნივთებს მეორე სიცოცხლეს ვანიჭებ და გარემოს ქარხნული ნაჭრების მთისგან ვიცავ. საოცარია, მაგრამ არსებობენ ადამიანები, რომლებიც მეორად მაღაზიებში შოპინგს სამარცხვინოდ თვლიან. ამავდროულად, მეორადი ტანსაცმლის მაღაზიებს არა მხოლოდ საშუალო კლასის, არამედ საკმაოდ უზრუნველყოფილი პირები სტუმრობენ. ყველაფერი მარტივია: მეორადებში ნამდვილად უნიკალური ნივთები შეგიძლიათ იპოვოთ, თან ძალიან კარგ მდგომარეობაში.
მეორადი ტანსაცმლის ერთადერთი მინუსი მისი მძაფრი და უსიამოვნო არომატია. სუნი სპეციალური სადეზინფექციო საშუალებით დამუშავების შემდეგ ჩნდება. პროცედურა დახარისხებამდე და საწყობში გაგზავნამდე ტარდება. როგორც წესი, თანამშრომლები სადეზინფექციოდ ფორმალდეჰიდს ან მეთილის რადიკალს იყენებენ. ეს ნივთიერებები სოკოს, მწერებს, ბაქტერიებს და ვირუსებს ანადგურებს. ტანსაცმლის დასამუშავებელი ნივთიერებები საკმაოდ მწვავე და მავნეა. სწორედ ამიტომ, შეძენილი ნივთი აუცილებლად უნდა გარეცხოთ. მაგალითად, ერთი რეცხვა საკმარისია, რომ სუნი გაქრეს. ეს ყოველთვის არ გვეხმარება. ყველაფერი კონკრეტულ მეორადების მაღაზიასა და გამოყენებულ სადეზინფექციო ნივთიერებაზეა დამოკიდებული.
როგორ მოვაშოროთ უსიამოვნო სუნი ტანსაცმელს: ინსტრუქცია
- მოკლედ, თუ მეორადების მაღაზიაში რამდენიმე ტანსაცმელი შეიძინეთ, სახლში მოსვლისას დაუყონებლივ მიხედეთ ან სხვა ტანსაცმლისგან მოშორებით შეინახეთ. ჭუჭყიანი თეთრეულის საერთო კალათაში არ ჩაყაროთ. დიდი ალბათობით, უსიამოვნო სუნი სხვა ნივთებს გადაედება.
- ყოველ ახალ ნივთზე იარლიყი კარგად შეისწავლეთ. შემდეგ ტემპერატურის რეჟიმის მიხედვით დაახარისხეთ. ტანსაცმელი შერჩეულ რეცხვის რეჟიმზე გარეცხეთ. ჩვეულებრივზე მეტი ფხვნილი გამოიყენეთ. გარდა ამისა, ორმაგ გავლებაზე ჩართეთ.
- იდეალურ შემთხვევაში სუფთა ტანსაცმელი გარეთ, ჰაერზე უნდა გააშროთ. ეს მნიშვნელოვანია, რომ ნივთები უკეთ განიავდეს. შემდეგ ქსოვილი ორივე მხრიდან დააუთოვეთ. მზადაა!
რედაქციის რჩევა – თუ ასეთი რეცხვის შემდეგ ტანსაცმელს სუნი არ მოშორდა, რამდენიმე რჩევას გიზიარებთ. პირველ რიგში, ნიშადურის სპირტი გამოიყენეთ. 10 მლ სპირტი 1 ლ წყალში გააზავეთ, ნაყიდი ნივთები მასში რამდენიმე საათით ჩაალბეთ. ახლა გაწურეთ და ჰაერზე გაამშრალეთ. ამიაკი დარჩენილ ფორმალდეჰიდთან ერთად აორთქლდება. მეორეც, უსიამოვნო სუნს სუფრის ძმარი გაუმკლავდება. 1 ლ წყალზე 20 მლ ძმარი გამოიყენეთ. პროცედურა იგივეა, როგორც ნიშადურის სპირტის შემთხვევაში. როგორც კი, ნივთი გაშრება, სარეცხ მანქანაში გარეცხეთ. ამის შემდეგ სუნი ნამდვილად გაქრება!
