წინასაახალწლო პერიოდში ყველა დიასახლისი იწყებს ფიქრს, რა მოამზადოს საახალწლოდ სტუმრებისთვის. აქ ყველაფერი დამოკიდებულია თითოეული ადამიანის ფანტაზიასა და გემოვნებაზე. მაგრამ არის კერძი, რომლის გარეშეც ახალი წელი ვერ წარმოგვიდგენია. რა თქმა უნდა, ვსაუბრობთ უკვდავ სალათებზე: ქაშაყი ქურქის ქვეშ და ოლივიე.
ყველა გამოცდილ დიასახლისს აქვს საყვარელი სალათის თავისი ვარიანტი. მაგრამ თუ გსურთ კლასიკური ვარიანტით მომზადება, ამაში დაგეხმარებით. ჩვენი რეცეპტით მომზადებული ქაშაყი ქურქის ქვეშ არც ერთ სტუმარს გულგრილს არ დატოვებს. მოამზადეთ და თავად დარწმუნდით!
ქაშაყი ქურქის ქვეშ – სავალდებულო ატრიბუტი საახალწლო სუფრაზე
სალათა ნამდვილად გემრიელი რომ გამოვიდეს, რამდენიმე წესი დაიცავით. პირველ რიგში, მოამზადეთ პროდუქტები.
- ხახვის გარდა ყველა ბოსტნეული კანიანად მოხარშეთ მომზადებამდე, მაგრამ არ გადახარშოთ.
- ბოსტნეული აუცილებლად გააგრილეთ. თბილმა ბოსტნეულმა სალათა შეიძლება გააფუჭოს.
- კვერცხი კარგად მოხარშეთ, წყლის ადუღებიდან დაახლოებით 6 წუთი. კვერცხის გული მაგარი უნდა იყოს. ასე ადვილად დაფშვნით.
- თუ ხახვი ძალიან ცხარეა, სალათაში დამატებამდე 10 წუთი ძმარში დაამარინადეთ. გემო გაცილებით დარბილდება.
- ქაშაყი წვნიანი და კარგად დამარილებული უნდა იყოს. არაფერია, თუ ქაშაყი ოდნავ მარილიანია, სალათაში შეუმჩნეველი დარჩება.
- შეეცადეთ თევზიდან რაც შეიძლება მეტი ძვალი ამოიღოთ.
კლასიკურ ვარიანტში სალათა მზადდება დიდ ბრტყელ თეფშზე. ზოგჯერ ამ სალათას პორციულ ფორმებში ვამზადებ ცალ-ცალკე თითოეული სტუმრისთვის. გასახსნელ საცხობ ფორმაში გაფორმებული სალათა ძალიან საინტერესოდ გამოიყურება. კერძი სადღესასწაულო იერს იძენს, ხოლო ფენები კარგად ჩანს.
ქაშაყი ქურქის ქვეშ: რეცეპტი
ინგრედიენტები:
- 2 ჭარხალი
- 3 კარტოფილი
- 2 სტაფილო
- 1 დიდი ხახვი
- 1 მსხვილი ქაშაყი
- 3 კვერცხი
- 300 გ მაიონეზი
- მცენარეული ზეთი
მომზადების წესი:
1. ყველა მოხარშული ბოსტნეული მსხვილ სახეხზე გახეხეთ. ხახვი დაჭერით და ძმარში დაამარინადეთ. თუ ძმრის გემო არ მოგწონთ, დაჭრილ ხახვს მდუღარე წყალი დაასხით და რამდენიმე წუთი გააჩერეთ. ასე სიმწარე ცოტა მოშორდება.
2. აიღეთ ფორმა, რომელშიც სალათას მოამზადებთ, და ცოტა ზეთი წაუსვით. ასე ინგრედიენტები თეფშს არ მიეწებება, ანუ სალათის აწყობა გაგიმარტივდებათ.
3. პირველ ფენად ხახვი მოათავსეთ. ფენა გაათანაბრეთ, რომ არ დარჩეს ცარიელი ადგილი. პირველ და მეორე ფენას შორის მაიონეზი შეგიძლიათ არ წაუსვათ. ასე სალათა ნაკლებად ცხიმიანი გამოვა, მაგრამ საერთო გემოზე არ იმოქმედებს.
4. მეორე ფენად წვრილად დაჭრილი ქაშაყი მოათავსეთ. სიტყვაზე, ამ ორი ფენის თანმიმდევრობა შეგიძლიათ შეცვალოთ. ზოგჯერ პირველ ფენად ქაშაყს ვათავსებ და გემო იგივე რჩება.
5. ქაშაყის ზემოთ მაიონეზის ბადე გააკეთეთ. სალათას მთელ ზედაპირზე თხელ ფენად წაუსვით.
6. შემდეგი ეტაპი – გახეხილი კარტოფილი. მსუბუქად ჩააწექით, რომ სალათა დაჭრისას არ დაიფშვნეს. ზემოდან მაიონეზის ფენა წაუსვით.
7. მეოთხე ფენა – მოხარშული კვერცხი. კვერცხი წინასწარ ჩანგლით დაჭყლიტეთ და შემდეგ კერძს დაუმატეთ ან მსხვილად ჩაახეხეთ პირდაპირ სალათაში. ფენა კოვზით ოდნავ ჩატუმბეთ და მაიონეზი წაუსვით.
8. მეხუთე ფენად გახეხილი სტაფილო მოათავსეთ. გახსოვდეთ, რომ რაც უფრო სქელი იქნება სტაფილოს ფენა, მით უფრო ტკბილი გამოვა მზა სალათა. მაიონეზის ფენა წაუსვით.
9. ბოლო ფენა – ჭარხალი. ის საკმარისად ბევრი უნდა იყოს, რომ სალათა ზემოდან კარგად დაფაროს. თუ ჭარხალი ძალიან წვნიანია, მსუბუქად გაწურეთ. ჭარხლის ფენა კოვზით გაათანაბრეთ და მაიონეზი მოასხით.
10. ზემოდან მწვანე ხახვით, გახეხილი კვერცხით ან მოხარშული ბოსტნეულით შეგიძლიათ გააფორმოთ. არ დაგავიწყდეთ, რომ სალათას გაჩერება სჭირდება. ამისთვის 2-3 საათი ან მთელი ღამე მაცივარში შეინახეთ. თქვენი საახალწლო კერძი მზადაა!
ამ რეცეპტით თქვენი საახალწლო სუფრა ყოველთვის გაახარებს სტუმრებს და ოჯახის წევრებს.
