გამაფხვიერებელი და სოდა: რა განსხვავებაა მათ შორის?

ჩვეულებრივ, რას უმატებთ ცომს იმისათვის, რომ კერძი ჰაეროვანი, რბილი და ნასვრეტებიანი გამოვიდეს? ნაწილი იტყვის: “რა თქმა უნდა სოდას”, ხოლო მეორე ნაწილი – “ცომის გამაფხვიერებელს”. რაშია არსებითი განსხვავება მათ შორის? და რომელი უფრო პოპულარულია დიასახლისებს შორის – სოდა თუ გამაფხვიერებელი?

სოდას ცომს მაშინ უმატებენ, როცა კექსების, ნამცხვრების, ორცხობილების გამოცხობას აპირებენ – ასე ეს ყველაფერი რბილი და ნასვრეტებიანი გამოდის. თუმცა, სოდა დამოუკიდებლად ამას ვერ მოახერხებს – მას ძმარსაც ვუმატებთ. ამ დროს ხდება რეაქცია და გამოიყოფა ნახშირორჟანგი, სწორედ მის ხარჯზე გამოდის რბილი და გაფუებული გამომცხვარი კერძი.

ჩვენ ძველებურად ვიღებთ 1 ჩ.კ. სოდას, შემდეგ ვხსნით მას 1 ს.კ. ძმარში და, როცა სოდის ჩაქრობის(შიშხინი) პროცესი დასრულდება, ვუმატებთ მასას ცომში. თუმცა, გამოცდილი კულინარები გვირჩევენ, სოდა მშრალ პროდუქტებს, მაგალითად, ფქვილს დავუმატოთ, ხოლო ძმარი – თხევადებს. შემდეგ, როცა ყველაფერს ერთმანეთს შევურევთ, რეაქცია უშუალოდ ცომში მოხდება. თუმცა, ჩემი გამოცდილებით, კერძი ისეთი ჰაეროვანი აღარ გამოდის, როგორიც პირველ ვარიანტში.

რატომ? იმიტომ, რომ ამ შემთხვევაში, სასურველი შედეგი რომ მივიღოთ, აუცილებლად უნდა ვიცოდეთ სოდისა და ძმრის პროპორციები. ამ საკითხთან დაკავშირებით ბევრი რომ არ იწვალოთ, შეგიძლიათ პირდაპირ გამაფხვიერებელი ფხვნილი იყიდოთ.

გამაფხვიერებელი – ესაა სოდის, ფქვილისა და ლიმონმჟავის მასა. ფქვილის ნაცვლად, ხშირად, მწარმოებელი სახამებელს იყენებს, ვარგისიანობის ვადის გასახანგრძლივებლად. პროდუქტების ასეთი ნაზავი სპეციალურად იმისთვისაა, რომ სოდა და მჟავა ნარჩენების გარეშე შევიდეს რეაქციაში, თვითონ რეაქცია კი დროულად მოხდეს. მჟავა და სოდა რეაქციაში უშუალოდ ცომში შედის, სწორედ გათბობის პროცესში, რაც საუკეთესო შედეგს იძლევა დასრულებული კერძის სახით. ამ “თერმობირთვული მასის” პროცენტული პროპორციები უკვე დიასახლისის საიდუმლოა და ახლა ჩვენ გასწავლით გამაფხვიერებლის დამზადებას საშინაო პირობებში:

ინგრედიენტები

  • 5 ჩ.კ. სოდა
  • 3 ჩ.კ. ლიმონმჟავა
  • 12 ჩ.კ. ფქვილი

შეურიეთ ყველა ინგრედიენტი მშრალ ქილაში და შეანჯღრიეთ ერთგვაროვანი მასის მიღებამდე.

LEAVE A REPLY

Please enter your comment!
Please enter your name here