გოგრა ძალიან სასარგებლო პროდუქტია, რომელიც სისხლძარღვებს და იმუნიტეტს აძლიერებს. გოგრის სასარგებლო ნივთიერებები საჭმლის მომნელებელ სისტემას წმენდს და წნევას არეგულირებს. რა შეიძლება მოვამზადოთ გოგრისგან ფაფის გარდა? „პაპარაცი“ გიზიარებთ უნიკალურ რეცეპტს – გოგრის ნიოკები (gnocchi). ოჯახის წევრები საინტერესო ახალი კერძით გაახარეთ.
რა მოვამზადოთ გოგრისგან ფაფის გარდა
ნიოკები, იგივე კლეცკია იტალიურად. ჩვეულებრივ კარტოფილისგან ამზადებენ, მაგრამ შეგიძლიათ ექსპერიმენტები ჩაატაროთ. გოგრის ნიოკები ფორმას უკეთ შეინარჩუნებს. მისი მომზადება სახლის პირობებში ძალიან ადვილია.
სოუსის ინგრედიენტები:
- 125 გრ კარაქი
- 1 კონა ახალი თავშავა (ან 1 ს/კ ხმელი)
- ¼ ჩ/კ დაფქული შავი წიწაკა
- მარილი გემოვნებით
ცომის ინგრედიენტები:
- 800 გრ გასუფთავებული გოგრა
- 1,5 ჭიქა ხორბლის ან ბრინჯის ფქვილი
- 50 გრ პარმეზანი (ან ნებისმიერი სხვა ხმელი ყველი)
- 1 კვერცხი
- 2 ს/კ კარაქი
- ¼ ჩ/კ წიწაკა
- მწიკვი მარილი
მომზადება:
1. გოგრა კარგად გაასუფთავეთ, პატარა ნაჭრებად დაჭერით და მომზადებამდე მოხარშეთ. წყალი გადაასხით, მაგრამ ნიოკების მოსახარშად ცოტა დაიტოვეთ. მზა გოგრა დააქუცმაცეთ: საცერით ან ბლენდერით. შემდეგ კარაქი დაუმატეთ. პიურეს მსგავსი მასა უნდა მიიღოთ. გოგრის პიურე სუსტ ცეცხლზე მომზადებამდე ხარშეთ.
2. გოგრას კვერცხის გული, შემდეგ ფქვილი დაუმატეთ. შეგიძლიათ ბრინჯის ან ხორბლის ფქვილი გამოიყენოთ. წიწაკა დაუმატეთ და ცომი კარგად მოზილეთ. ჩაის კოვზით ხელისგულზე ნიოკის ფორმები გააკეთეთ, ასევე გვერდებზე ოდნავ ჩანგალი ჩააჭირეთ, რომ ტალღოვნება შემატოთ. შემდეგ კლეცკები ფქვილ მოყრილ ზედაპირზე მოათავსეთ.
3. ახლა სოუსის მომზადებას შეუდექით. ამისთვის კარაქი გაადნეთ, თავშავას ფოთლები, მარილი და წიწაკა დაუმატეთ. მზა სოუსი სუსტ ცეცხლზე 30-40 წამით ხარშეთ. თავშავა შეგიძლიათ სხვა მწვანილით, მაგალითად, რუკოლით ჩაანაცვლოთ.
4. გოგრის წყალი ცეცხლზე დადგით და ადუღებულ წყალში ნიოკები დაახლოებით 5-6 წუთით ხარშეთ. შემდეგ ყველი გახეხეთ. მზა ნიოკები თეფშებზე გადაიტანეთ. სოუსი მოასხით და ყველი მოაყარეთ. გოგრის კერძი მზადაა!
გოგრის კლეცკები ძალიან გემრიელი გამოდის, ხოლო ყველის დამატებით, თითებს ჩაიკვნეტთ. კერძი სუფრაზე ძალიან ლამაზად გამოიყურება: ნარინჯისფერი ნიოკები ყურადღებას ნამდვილად მიიპყრობს. სილამაზისთვის ცოტა მწვანილი დაუმატეთ. აი, ასეთი ორიგინალური და უჩვეულო რეცეპტი იტალიიდან. გემრიელად მიირთვით!
