თუ ერთხელ მაინც ყოფილხართ ე.წ. მეორადების მაღაზიაში, მაშინ თქვენთვის ის მომაბეზრებელი და სპეციფიური სუნი უცხო არ იქნება. ეს საკმაოდ მძაფრი სურნელია რომელიც სამოსს რთულად შორდება. Paparazzi-ს რედაქცია მოგითხრობთ თუ როგორ გაწმინდოთ მეორადი სამოსი ისე, რომ ეს სუნი სამუდამოდ გაქრეს.
პირველ რიგში უნდა გავარკვიოთ თუ საიდან მოდის ეს სუნი. ამ მაღაზიაში როდესაც მივდივართ, უკვე ვიცით, რომ დიდი ალბათობით და უმეტეს შემთხვევებში – ეს სამოსი უკვე ეცვა ვიღაცას. ამის გამო ადამიანი რომელიც მსგავსი საქონელის რეალიზაციით არის დაკავებული ვალდებულია ის შესაბამისად მოამზადოს.
ამისთვის სამოსს სპეციალური ქიმიკატებით ამუშავებენ, რადგან გამყიდველმა ნივთი ყოველგვარი ლაქების, კანის ნაწილაკების და სუნების გარეშე უნდა გაყიდოს. ეს ნივთიერებები სოკოს, მწერებს, ბაქტერიებსა და ვირუსებსაც ანადგურებენ.
უმეტეს შემთხვევებში სამოსს ისეთი ქიმიკატებით ამუშავებენ რომლებიც ბრომეთანს და ფორმალდეჰიდებს შეიცავენ. ეს ნივთიერებები საკმაოდ ძლიერმოქმედია. ამიტომ აჯობებს როდესაც სახლში მიხვალთ ნივთები მაშინვე გარეცხოთ.
როგორ გავრეცხოთ ნივთები
შეძენის შემდეგ ნივთები სხვა სამოსისგან განცალკევებთ უნდა დადოთ. არ ღირს მათი ჭუჭყიანი სამოსით სავსე კალათში ჩაგდება რადგან ქიმიური სუნი მათზეც გადავა.
აუცილებლად შეამოწმეთ სამოსის რეცხვის წესები. ნახეთ როგორია მათი რეცხვისთვის დასაშვები მაქსიმალური ტემპერტურა, შემდეგ კი გარეცხეთ. შეგიძლიათ ჩვეულზე მეტი ფხვნილი დაამატოთ და გავლების დრო უფრო გაზარდოთ.
შემდეგ სამოსი გააშრეთ სუფთა ჰაერზე და დიდხანს დატოვეთ რათა კარგად განიავდეს. ამის შემდეგ შეგიძლიათ დააუთოვოთ – ორივე მხრიდან!
თუ ეს მანიპულაციები საკმარისი არ იქნება, ჩვენს არსენალში კიდევ რამდნიმე საშუალებაა.
ყველაფერს აჯობებს ნიშადურის სპირტის გამოყენება. აიღეთ 10 მილიგრამი ნიშადურის სპირტი ერთ ლიტრ წყალზე, შემდეგ ამ ხსნარში ნივთები რამდენიმე საათით დაალბეთ. ამის შემდეგ ხელით გაწურეთ და სამოსი სუფთა ჰაერზე დაფინეთ. ამიაკის ამოორთქლებასთან ერთად ფორმალდეჰიდის ნარჩენებიც გაქრება.
ნიშადურის სპირტის ნაცვლად შეგიძლიათ 20 მილიგრამი სუფრის ძმარი აიღოთ, 1 ლიტრ წყალში გახსნათ და სამოსი მასში ამორეცხოთ. სარეცხი სუფთა ჰაერზე გაფინეთ, გააშრეთ და შემდეგ სარეცხ მანქანაში გარეცხეთ – ჩვეულებისამებრ.
ახლა უკვე იცით თუ როგორ უნდა მოაშოროთ უსიამოვნო სუნი მეორად სამოსს. თუ ერთი მეთოდი არ გამოგადგათ, სათადარიგო ვერსია მოსინჯეთ.
