Paparazzi გიზიარებთ წარმოუდგენლად გემრიელი დესერტის რეცეპტს საინტერესო ციტრუსის ნოტებით. დაბზარული ლიმონის ფხვიერი ნამცხვარი შესანიშნავი ვარიანტია წასახემსებლად ან მსუბუქად საუზმობისთვის. უფრო მეტიც, ფხვიერ ნამცხვარს საოცარი გემო აქვს, თან ძალიან ლამაზად გამოიყურება. ასე რომ, მომზადება არ გადადოთ!
ლიმონის ფხვიერი ნამცხვარი
ინგრედიენტები:
- 50 გრ კარაქი
- 2 გრ სოდა
- 1 მსხვილი ქათმის კვერცხი
- 1 ლიმონი
- 80 გრ შაქარი
- 150 გრ გაცრილი ხორბლის ფქვილი
- 2 გრ ცომის გამაფხვიერებელი
- 1 პაკეტი ვანილის შაქარი
- შაქრის ფხვნილი და შაქარი მოსაყრელად
მომზადება:
1. ოთახის ტემპერატურაზე დარბილებული კარაქი, შაქარი და კვერცხი მიქსერით ან სათქვეფით ათქვიფეთ.
2. მიღებულ კვერცხის მასას 1 ლიმონის დაქუცმაცებული ცედრა დაუმატეთ, ასევე ლიმონის წვენი ჩაასხით. კარგად აურიეთ. სურვილის შემთხვევაში, შეგიძლიათ ლიმონის წვენში გაზავებული საკვები საღებავი დაუმატოთ. ასე ფხვიერი ნამცხვრის ფერი უფრო გაჯერებული გახდება.
3. ამის შემდეგ გაცრილი ფქვილი, გამაფხვიერებელი, ვანილის შაქარი და სოდა კვერცხის ნარევს დაუმატეთ. ერთგვაროვანი მასის მიღებამდე აურიეთ. მიღებული ცომი 60 წუთით მაცივარში გააჩერეთ.
4. ცომიდან პატარა ბურთები გააკეთეთ. თითოეული ბურთი შაქარში, შემდეგ შაქრის ფხვნილში ამოავლეთ. ახლა საცხობ ფორმაზე დააწყვეთ. პერგამენტის ქაღალდის გამოყენება არ დაგავიწყდეთ, რომ ფხვიერი ნამცხვარი არ დაიწვას.
5. 170 გრადუსამდე გახურებულ ღუმელში 15 წუთით აცხვეთ.
6. გემრიელი დესერტი მზადაა.
ჰაეროვანი ფხვიერი ნამცხვარი ლიმონით ნებისმიერი ტკბილეულის მოყვარულის გულს დაიპყრობს. მსუბუქი კარამელის ქერქი განსაკუთრებულ გემოს ანიჭებს. ოღონდ არ გაგიტაცოთ, რადგან გარანტირებულად მასზე დამოკიდებული გახდებით. გემრიელად მიირთვით!
