სსრკ–ს პერიოდში პომიდვრის წვენს მკაცრი GOST სტანდარტით ამზადებდნენ, ამიტომ მოქალაქეები მის ხარისხში დარწმუნებულნი იყვნენ. ახლა რთულია იპოვოთ ნატურალური პროდუქტი კონსერვანტების გარეშე, რომლებიც წლები არ ინახება. რა საჭიროა ძიება, თუ შეგიძლიათ გემრიელი პომიდვრის წვენი სახლის პირობებში თავად მოამზადოთ? მით უფრო, ამისთვის მინიმუმი ძალისხმევა და დრო დაგჭირდებათ. დღეს პაპარაცის გუნი გიზიარებთ მარტივ რეცეპტს და საუკეთესო საზაფხულო სასმელზე ცოტა მეტს გიამბობთ.
პომიდვრის წვენი სახლის პირობებში
სსრკ–ში პომიდვრის წვენის მასობრივი წარმოება 30-იან წლებში დაიწყო. საოცარია, მაგრამ იდეა ისესხეს ამერიკიდან, სადაც ცოტა ადრე ხალხს დილით ფორთოხლის წვენის დალევა მიაჩვიეს. 1915 წელს აშშ–ში პირველი წვენსაწური გამოჩნდა. ამის წყალობით ხილის მომწოდებლებმა მილიარდების გამომუშავება დაიწყეს.
საბჭოთა კავშირში ფორთოხალი არ იზრდებოდა. სამაგიეროდ, პომიდორი საკმარისად იყო და ის ყველას უყვარდა. ნატურალური პომიდვრის წვენი სამლიტრიან ქილებში იყიდებოდა. რამდენიმე ათწლეულში მეტი საწარმო ააშენეს, სადაც ვაშლის, მსხლის და ქლიავის წვენებს ამზადებდნენ. მოგვიანებით, ასორტიმენტი გაფართოვდა, ასევე უფრო მოსახერხებელი 0,7 ლ მოცულობის მინის ჭურჭელი გამოჩნდა.
1 ჭიქა პომიდვრის წვენის დალევა ნებისმიერ სასურსათო მაღაზიაში შეიძლებოდა. ხალხს სპეციალურად გამოყოფილ ადგილას წვენით სავსე დიდი კონუსის ფორმის ჩამოსასხმელი ჭურჭლები ხვდებოდათ. აქვე გაზიანი სასმელის შეძენას შეძლებდით. ყველა ყიდულობდა სამლიტრიან პომიდვრის წვენს, ხოლო ქილას კონსერვებისთვის იყენებდნენ.
შინაურული პომიდვრის წვენის რეცეპტი – რეცეპტის საიდუმლო, რომელსაც დღეს გიზიარებთ, მის სიმარტივეშია. სახლის პირობებში პომიდვრის წვენის მოსამზადებლად წვენსაწური და პომიდორი დაგჭირდებათ. იდეალურ შემთხვევაში, გირჩევთ გამოიყენოთ წვენსაწური სმუზის თავით. ასე სქელ და გაჯერებულ სასმელს მიიღებთ. პომიდორი წვნიანი და მაგარი უნდა იყოს. ნებისმიერი სახეობა თქვენი გემოვნებით შეარჩიეთ.პროპორციებს არ გაძლევთ, რადგან უბრალოდ საჭირო არაა. წვენი ისე მოამზადეთ, რომ დაუყონებლივ დალიოთ და არა მაცივარში შეინახოთ. თუ ნამდვილად უჩვეულო გამაგრილებელი პომიდვრის სასმელის მომზადება გსურთ, პაპარაცის რედაქციის ორიგინალური რეცეპტი შეინახეთ.
ინგრედიენტები:
- 1 წითელი ცხარე წიწაკა
- 3-4 საშუალო ზომის პომიდორი
- 1 ბულგარული წიწაკა
- 1 კბილი ნიორი
- მარილი გემოვნებით
მომზადების წესი:
- პომიდორი ოთხ ნაწილად დაჭერით. ყუნწი მოაშორეთ. ნიორი გაასუფთავეთ და ცხარე წიწაკას მწვანე ბოლო მოაჭერით. თესლის მოშორება საჭირო არაა, წვენსაწური მას წვენში მოხვედრის საშუალებას მაინც არ მისცეს.
- ბულგარული წიწაკა თესლისა და ყუნწისგან გაათავისუფლეთ. რამდენიმე ნაწილად გაჭერით. ყველა ინგრედიენტი წვენსაწურის ჭიქაში მოათავსეთ და დაწურეთ. წვენი ჭიქაში გადაიტანეთ, ოდნავ მარილი მოაყარეთ და კარგად აურიეთ. პიკანტური, გამაგრილებელი სასმელი მზადაა!
როგორც ხედავთ, ნატურალური წვენის მოსამზადებლად ბევრი დრო და ინგრედიენტი საჭირო არაა. საკმარისია, კარგი წვენსაწური შეიძინოთ და მხოლოდ ყველაზე ახალი პროდუქტები გამოიყენოთ. ვაღიარებ, წვენსაწური ჩემი პატარა ოცნებაა. მისი დახმარებით სასარგებლო და მკვებავი ფრეშები შეგიძლიათ მოამზადოთ კონსერვანტების და ქიმიკატების გარეშე.
