ცივი სეზონი შორს არაა. თადარიგიან დიასახლისებს ზამთრისთვის მომზადება დაწყებული აქვთ და კონსერვებს აკეთებენ. Paparazzi კონსერვაციის აქტუალური რეცეპტების გაზიარებას აგრძელებს. გთავაზობთ გემრიელ სალათს ბოსტნეულით და ბრინჯით, რომელიც შეგიძლიათ მოხუფოთ. ნოყიერი კერძი დაგეხმარებათ, თუ მაცივარი მოულოდნელად დაცარიელდა.
ბოსტნეულის სალათი ზამთრისთვის – რეცეპტი 10-12 ნახევარლიტრიან ქილაზეა გათვლილი. თუ უფრო მეტის მომზადება გსურთ, ინგრედიენტების რაოდენობა გააორმაგეთ. ცივ სეზონზე ასეთი კონსერვი ნამდვილად არ დაიკარგება!
ინგრედიენტები:
- 1 კგ ბულგარული წიწაკა
- 3 კგ პომიდორი
- 1 კგ სტაფილო
- 1 კგ ხახვი
- 0,5 ლ მცენარეული ზეთი
- 1 ჭიქა შაქარი
- 2 ს/კ მარილი
- 1 ჭიქა ბრინჯი
- 2 ს/კ ძმარი (9%)
- სანელებლები გემოვნებით
მომზადების წესი:
- ბოსტნეულის მომზადებით დაიწყეთ. ბულგარული წიწაკა და პომიდორი კარგად გარეცხეთ, ხახვი და სტაფილო გათალეთ და კარგად გარეცხეთ. ბრინჯი ნახევრად მომზადებამდე მოხარშეთ.
- სანამ ბრინჯი იხარშება, სტაფილო მსხვილ სახეხზე გახეხეთ. ხახვი ნახევარ რგოლებად ან კუბებად დაჭერით. პომიდორი და წიწაკა კარგად დააქუცმაცეთ.
- ყველა ბოსტნეული ღრმა ქვაბში მოათავსეთ. ბოსტნეულს მცენარეული ზეთი, შაქარი, მარილი და სხვა სანელებლები გემოვნებით დაუმატეთ. კარგად აურიეთ. ახლა ქვაბი სუსტ ცეცხლზე დადგით. ქვაბის ნაცვლად კაზანი შეგიძლიათ გამოიყენოთ.
- ბოსტნეულის ჩაშუშვისას წვენი გამოვა. ადუღებამდე მიიყვანეთ, დროდადრო აურიეთ. ქვაბს მზა ბრინჯი დაუმატეთ, აურიეთ და სალათი კიდევ 45 წუთით ხარშეთ.
- ძმარი დაუმატეთ, აურიეთ და კიდევ 15 წუთით ხარშეთ.
- სანამ ზამთრის სალათი იხარშება, ქილები და თავსახურები გაასტერილეთ. ცხელი სალათი ქილებში გადაანაწილეთ და მოხუფეთ. ქილები გადააბრუნეთ და თბილ საბანში ან პირსახოცში შეფუთეთ. სრულად გაგრილება აცადეთ. ახლა გრილ ბნელ ადგილას შეინახეთ. მზადაა!
რედაქციის რჩევა – ამ რეცეპტში პომიდორი ხორცსაკეპ მანქანაში შეგიძლიათ გაატაროთ, რომ კანი კარგად დააქუცმაცოთ. ამავდროულად, კანი შეგიძლიათ წინასწარ მოაშოროთ. საკმარისია, რომ თითოეული ბოსტნეული ჩაჭრათ და რამდენიმე წუთით ცხელ წყალში ჩადოთ. კანი თავისით მოძვრება.
თუ თეთრი ბრინჯი არ გიყვართ, რადგან ცარიელ და უსარგებლო სწრაფ ნახშირწყლად თვლით, მაშინ ყავისფერი ბრინჯით ჩაანაცვლეთ. ასე კერძი საკმაოდ ძვირადღირებული გამოვა. ბრინჯის ნაცვლად ლობიო გამოიყენეთ. შედეგად უფრო ნოყიერი და სასარგებლო სალათი გამოვა. ბრინჯი არა მხოლოდ ლობიოთი, არამედ სხვა პროდუქტითაც შეგიძლიათ ჩაანაცვლოთ. მაგალითად, ქერის ბურღულით. ამბობენ, რომ ეს სალათი 90-იან წლებში და სტუდენტობის პერიოდში ეხმარებოდათ. ბოსტნეულის სალათი ზამთარში არაერთხელ დაგეხმარებათ.
