მე მქვია სოფიკო. მყავს დეიდაშვილი ირმა. ის ძალიან ჭკვიანია და წარჩინებით დაამთავრა ორი ინსტიტუტი. გარდა ამისა, მან ასევე იცის სამი უცხო ენა: ინგლისური, გერმანული და ფრანგული. ორმა უმაღლესმა განათლებამ და ენების ცოდნამ ირმას შესაძლებლობა მისცა საზღვარგარეთ წასულიყო სამუშაოდ.ირმათი ძალიან ამაყობდა დედამისიც და ჩვენი ბებიაც. ჩემთვის მაგალითის სახით ყოველთვის ირმა მოჰყავდათ. მე ირმასი არასოდეს მშურდა, რადგან ის ყოველთვის ძალიან კეთილი იყო და არასდროს ტრაბახობდა.
ჯერ გერმანიაში მუშაობდა, შემდეგ კი ინგლისში გადავიდა საცხოვრებლად და სამუშაოდ. იქ მან ბევრი მეგობარი შეიძინა. ჩვენი ირმა ძალიან კომუნიკაბელური და ხალისიანი ადამიანი იყო. ცოტა ხანში ირმამ თომასი გაიცნო და მათ ერთმანეთი ძალიან შეუყვარდათ.ექვსი თვის შემდეგ ისინი დაქორწინდნენ. სამი თვის შემდეგ ჩემმა დეიდაშვილმა გაგვახარა, რომ მალე დედა გახდებოდა. მასაც და მის ქმარსაც ეს ძალიან უხაროდათ.
ირმას ბიჭი შეეძინა. როდესაც ბიჭი ორი წლის გახდა, ირმა თავის შვილთან ერთად პირველად ჩამოფრინდა სამშობლოში. აქ ორი კვირა დარჩა და ისევ ქმართან დაბრუნდა ინგლისში.ფაქტიურად ექვსი თვის შემდეგ მან გაიგო, რომ ისევ ორსულად იყო. თომასს ეს ამბავი დიდად არ გაუხარდა. საქმე ისაა, რომ ირმა მისი მეორე ცოლი იყო. თომასს უკვე ჰყავდა ვაჟი პირველი ქორწინებიდან. მესამე შვილის რჩენა მას გაუჭირდებოდა. თუმცა, ირმამ უარი თქვა აბორტზე და გოგონა გააჩინა.
წელიწადნახევრის შემდეგ ის სამშობლოში უკვე ორ შვილთან ერთად დაბრუნდა.მისი ჩამოსვლიდან ერთი კვირის შემდეგ თომასმა დაურეკა და ძალიან უსიამოვნო ამბავი შეატყობინა: მას განქორწინება სურდა. აი ასე მარტივად. მას სხვა ქალი არ ჰყავდა. მას უბრალოდ არ მოეწონა ის, რომ ირმამ მეორე შვილი გააჩინა და ის რომ მას არც თუ ისე კარგი ურთიერთობა ჰქონდა მის ბიჭთან, რომელიც მას პირველ ქორწინებაში შეეძინა.
ასე დარჩა ირმა მარტო და ქმრის გარეშე. მას შეეძლო წასულიყო ინგლისში და ქმრისთვის ეჩივლა, მაგრამ ამას ძალიან დიდი დრო დასჭირდებოდა და ძალიან ძვირი დაჯდებოდა. საჭირო გახდებოდა სამსახურის პოვნა და ძიძის ნახვა ორი პატარა ბავშვისთვის. ეს არც ისე ადვილია.ირმამ სხვა გზა აირჩია. ის სახლში დარჩა. აქ დედა, ბებია და სხვა ნათესავები დაეხმარებიან. ირმამ გადაწყვიტა, რომ მუშაობა დაიწყოს და თავისი შვილები თავად გაზარდოს.
თომასის საშინელი საქციელი კი მის სინდისზე დარჩეს. მას ცხოვრების ბოლომდე ამით მოუწევს ცხოვრება.მას იმის გამბედაობაც კი არ ეყო, რომ ირმასთვის ყველაფერი პირისპირ ეთქვა. მან გადაწყვიტა, რომ განქორწინების შესახებ მხოლოდ ტელეფონით ეთქვა.
ამ საქციელს, ნამდვილად არ შეიძლება ეწოდოს ნამდვილი მამაკაცის საქციელი.
