სახლში სოკოს გაზრდა მომგებიანი საქმეა მინიმალური ხარჯით. განსაკუთრებით მაშინ, თუ გაქვთ არასაცხოვრებელი ფართი, სადაც სოკოს პლანტაცია შეგიძლიათ მოათავსოთ. დაფიქრდით, იქნებ, სოკოს ბიზნესი ისაა, რისი გაკეთებაც ახლა გსურთ. Paparazzi გიამბობთ, რა სჭირდება წარმატებულ ფერმერს.
სოკოს გაზრდა სახლში – კარგია, თუ გრძნობთ, რომ მიწასთან მუშაობა თქვენი საქმეა. კარგი მოსავალი ყურადღებიან და მზრუნველ ფერმერს მოითხოვს. სოკო პრეტენზიული კულტურა არაა, მაგრამ უსიყვარულოდ წარმატებით ვერ გაზრდით. გავრცელებული ვარიანტით დაიწყეთ. მაგალითად, ქამა სოკოთი ან ხეთამხლით. ბევრი ექსპერიმენტატორი უფრო ეგზოტიკურ სოკოს, შიიტაკეს ზრდის. თავიდან მცირე პარტია გაზარდეთ. თუ შეამჩნევთ, რომ საქმე კარგად მიდის, მაშინ წარმოების მასშტაბი შეგიძლიათ გაზარდოთ.
სატესტო ვარიანტი – გიამბობთ, როგორ გაზარდოთ ხეთამხალი. ეს სოკო პლასტმასის ბოთლშიც კარგად მრავლდება. ამ სოკოს სახეობის ხარისხიანი მიცელიუმი შეიძინეთ, რომ კარგად გაზარდოთ. მიცელიუმზეა დამოკიდებული, სოკო ძლიერი და ლამაზი გაიზრდება თუ არა. მხოლოდ სანდო მაღაზიებს ენდეთ, სადაც მიცელიუმს მავნებლების, ობის და მავნე ბაქტერიების გარეშე შეიძინეთ. მოამზადეთ შესაბამისი მოცულობის კონტეინერი, ჩალა და ოთახი, სადაც სოკოს გაზრდით. ეს შეიძლება იყოს ჩვეულებრივი ავტოფარეხი, მაგრამ რომლის განიავება და გათბობა ადვილია. ჩალა თავდახურულ ქვაბში 30 წუთით ხარშეთ. შემდეგ ქვაბიდან ამოიღეთ, ოდნავ გააგრილეთ, რომ ზედმეტი წყალი დაიწუროს.
ხეთამხალი პლასტმასის ბოთლში – ხუთლიტრიანი პლასტმასის ბოთლი აიღეთ. თავი მოაჭერით და პერიმეტრზე რამდენიმე ნახვრეტი გაუკეთეთ. ბოთლი ჩალით შეავსეთ, ფენა–ფენა მიცელიუმიც დაუმატეთ. ზემოდან ჩალა და ბოლოს ბოთლის გადაჭრილი თავი დააფარეთ. პირველ შედეგს უკვე 15 დღეში დაინახავთ. სანამ სოკო იზრდება, ბევრი სინათლე არ სჭირდება. ოთახში ოპტიმალური ტემპერატურა და ტენიანობის დონე შენარჩუნებული უნდა იყოს. ორპირ ქარს მოარიდეთ, მაგრამ სუფთა ჰაერი მუდმივად უნდა მიაწოდოთ. სოკო დღეში ერთხელ პულვერიზატორით დანამეთ.
მომგებიანი ბიზნესი – შეიძლება წარმატებული ბიზნესი ააგოთ სოკოს წარმოებაზე? რა თქმა უნდა, დიახ. თუმცა რამდენიმე ნიუანსი არსებობს. პირველ რიგში, საწყისი კაპიტალი. შესაბამისი ზომის ოთახი და შესაბამისი ორგანოებისგან ყველა საჭირო ნებართვის აღება მოგიწევთ. თანამედროვე სამყაროში კარგი მარკეტინგის და რეკლამის გარეშე წინ ვერ წახვალთ. ასე შეძლებთ ბრენდის ცნობადობის გაზრდას, პირველი მყიდველის პოვნას და თქვენი ნიშის დაკავებას. რეკლამაზე ფული არ დაზოგოთ. ეს ნამდვილად აუცილებელი ელემენტია.
სოკოს გაზრდა კონტეინერში – ექსპერიმენტის სახით შიიტაკეს გაზრდა შეგიძლიათ სცადოთ. არსებობს სპეციალური სოკოს ბლოკები, რომელიც ბინაშიც ადვილად თავსდება. სოკოს ბლოკი ამ სოკოს მიცელიუმს უკვე შეიცავს, ამიტომ მხოლოდ გარე პირობების გაკონტროლება მოგიწევთ. შიიტაკე არ უნდა გამოაშროთ. სწორედ ამიტომ, მას ათავსებენ წყლის კონტეინერზე და მუდმივად ნამავენ.
