მარწყვის რულეტი მერინგით, ნაღებისა და ხაჭოს ნაზი კრემით – სადედოფლო დესერტია. პირველად ის მეგობართან დავაგემოვნე და რეცეპტის გარეშე სახლში არ დავბრუნებულვარ. მეგობარმა მითხრა, რომ ეს სასწაული “პავლოვას” დესერტის ინტერპრეტაციაა და რომ მას სახელწოდება ბალერინას საპატივსაცემოდ მიენიჭა. მარწყვის რულეტი თავისი შემადგენლობით “პავლოვას“ ჰგავს, მაგრამ ამ შემთხვევაში მერინგიდან ჰაეროვან ფენას აცხობენ, შემდეგ კი კრემს უსვამენ და ფრთხილად ახვევენ.
სილამაზე ღვთაებრივია, გემო კი – თითებს გაილოკავთ! ჩაიწერეთ რეცეპტი!
მარწყვის რულეტი
მერინგის ინგრედიენტები
- 10 კვერცხი;
- 300 გრამი შაქარი;
- 1 შეფუთვა ვანილის შაქარი;
- 2 ს.კ. სიმინდის სახამებელი;
- 1 მწიკვი მარილი;
- 1 ს.კ. ლიმონის წვენი.
კრემის ინგრედიენტები
- 250 მლ ცხიმიანი ნაღები;
- 50 გრამი შაქრის პუდრა;
- 1 შეფუთვა ვანილის შაქარი;
- 350 გრამი ნაღების ხაჭო.
გულსართი და გაფორმება
- 100 გრ მარწყვი (შეგიძლიათ გამოიყენოთ გაყინული);
- 20 გრამი შავი შოკოლადი.
მარწყვის რულეტი: მომზადების წესი
1. ჩართეთ ღუმელი და დააცადეთ, რომ 140-150 გრადუსამდე გახურდეს. ფრთხილად გამოაცალკევეთ ცილა გულებისგან. დარწმუნდით, რომ ჭურჭელი იყოს არა მხოლოდ სუფთა, არამედ მშრალიც! ცილებს დაამატეთ შაქარი, ცოტა მარილი და ვანილის შაქარი.
2. ათქვიფეთ მიქსერით დაბალ სიჩქარეზე, თანდათან გაზარდეთ სიჩქარე. თქვიფეთ დაახლოებით 10 წუთის განმავლობაში, სანამ არ მიიღებთ სქელ ქაფს. დაამატეთ ლიმონის წვენი და თქვიფეთ კიდევ 2 წუთის განმავლობაში. ათქვეფილ მასაში ჩაყარეთ სახამებელი და შიგთავსი მსუბუქი მოძრაობებით აურიეთ ერთგვაროვანი კონსისტენციის მიღებამდე.
3. საცხობ ფორმაში მაღალი ხარისხის პერგამენტის ქაღალდი ჩაფინეთ, რომელიც არ საჭიროებს შეზეთვას. ცილოვანი მასა გადაიტანეთ საკონდიტრო ტომარაში. ათქვეფილი ცილა პერგამენტზე საკონდიტრო ტომრის გამოყენებით გადაანაწილეთ, რათა მიიღოთ მართკუთხა ნამცხვარი მინიმუმ 1 სმ სისქის.
4. მოათავსეთ საცხობი ფორმა წინასწარ გახურებულ ღუმელში და გამოაცხვეთ მერინგი 35-40 წუთის განმავლობაში. ღუმელში ტემპერატურა არ უნდა აღემატებოდეს 150 გრადუსს. მზა ნამცხვარი გამოიღეთ ღუმელიდან და პერგამენტის ქაღალდზე თავდაყირა მოათავსეთ. ფრთხილად მოაშორეთ პერგამენტი, რომ მერინგი არ დაიმსხვრას და დადგით გასაცივებლად.
რულეტის გაფორმება
5. ჩაასხით ნაღები თასში, დაამატეთ შაქრის პუდრა, ვანილის შაქარი და თქვიფეთ 1 წუთის განმავლობაში. დაამატეთ ხაჭო და თქვიფეთ კიდევ ერთი წუთის განმავლობაში, ნაზი და ერთგვაროვანი კრემის მისაღებად. მარწყვი დავჭრათ ნაჭრებად, 2-3 ცალი გასაფორმებლად დავტოვოთ.
6. კრემი გაციებულ მერინგს მთელ ზედაპირზე წაუსვით, ცოტაოდენი რულეტის გასაფორმებლად დატოვეთ. კიდესთან ახლოს კრემი უფრო თხელ ფენად წაუსვით.
7. დაჭრილი მარწყვი ზედაპირზე თანაბრად გაანაწილეთ. პერგამენტის გამოყენებით, რომელზეც ის დევს, ნამცხვარს რულეტის ფორმა მიეცით.
8. დარჩენილი კრემი საკონდიტრო შპრიცში გადაიტანეთ (ან ტომარაში) და დესერტზე ზემოდან ლამაზად გადაანაწილეთ. მარწყვი ნაჭრებად დაჭერით და რულეტი გააფორმეთ. შოკოლადი სახეხზე გახეხეთ ან წყლის აბაზანაზე გაადნეთ, შემდეგ კი რულეტს ზემოდან მოაყარეთ.
მარწყვის რულეტი: რჩევა რედაქციისგან
რულეტი მაგიდასთან მთლიანი მიაქვთ და ნაჭრებად შემდეგ ჭრიან, რათა ყველა სტუმარი მისი დახვეწილი სილამაზით აღფრთოვანდეს. დამიჯერეთ, გამოუცდელ დიასახლისსაც კი შეუძლია ასეთი გემრიელი დესერტის მომზადება!
