სანამ დაოჯახებას ან სერიოზული ურთიერთობის დაწყებას გადაწყვეტთ, გირჩევთ, ყურადღებით დააკვირდეთ, რა მოთხოვნილებები აქვს ადამიანს, ვისთანაც ბედის დაკავშირებას აპირებთ. ასევე არ დაგავიწყდეთ თქვენი ფინანსური და ფიზიკური შესაძლებლობების შეფასება, რომ გაარკვიოთ, აკმაყოფილებს თუ არა თქვენი რჩეულის მოთხოვნილებებს. წინააღმდეგ შემთხვევაში, თქვენი ურთიერთობა განწირულია და განქორწინება გარდაუვალი. ეს იმ შემთხვევაში, თუ საღად მოაზროვნე ხართ და არ გსურთ ტყუილად დახარჯოთ ფული და დრო, ანუ ცხოვრება. უმცროს ძმასთან გადამხდარმა ამბავმა ჩემი მსჯელობის სისწორეში დამარწმუნა. პაპარაცი ამ ამბავს გიზიარებთ.
რა მოთხოვნილებები აქვს ადამიანს?
ნაქირავებ ბინაში ვცხოვრობ. კომუნალურები რომ გადავიხადო, წესიერად ჩავიცვა და ნორმალურად ვიკვებო, არ მრცხვენია ფასდაკლებების, აქციების თვალყურის დევნება და მეორადების მაღაზიაში სიარული. არასდროს ვყიდულობ ძალიან ძვირადღირებულ ნივთებს, რომლისთვისაც რამდენიმე თვე ან უფრო დიდხანს მუშაობა მომიწევს. ბიუჯეტს ყოველთვის ისე ვანაწილებ, რომ ჩემი მოთხოვნილებები მიღებულ შემოსავალს შეესაბამებოდეს.
ახლახანს ღვიძლი ძმა შევიფარე. აქედან მისი სამსახური უფრო ახლოსაა, თან ერთად ცხოვრება უფრო სახალისო და მომგებიანია. თავიდან ასე ვფიქრობდი, თუმცა ქირის გადახდა პირადი დანაზოგიდან მომიწია. უფრო მეტიც, თვის ბოლოს პროდუქტებს საკუთარი ჯიბიდან ვყიდულობდი, რადგან საყვარელ ძმას ფული არ უჩერდებოდა: მთელ ფულს შეყვარებულს ახარჯავდა.
ხარჯვის მიზეზი
მისი რჩეული ღამის კლუბებზე და ძვირადღირებულ საჩუქრებზე გიჟდებოდა. ბიჭთან თავი უდანაშაულო მიამიტად მოჰქონდა, რადგან თავად არაფერს სთხოვდა: საუკეთესო მეგობარი, რომელსაც ყველგან დაათრევდა, ყველაფერს მის ნაცვლად აკეთებდა. ყურებამდე შეყვარებულ ძმას სამისთვის გადახდა უწევდა. მეგობარი საიდუმლოდ ეუბნებოდა, რისი მიღება სურდა პატარძალს დაბადების დღის საჩუქრად. ლამაზმანი მორიგი საჩუქრის მიღებისას გრძელ წამწამებს ახამხამებდა და გაოცებულ სახელს იღებდა, თითქოს როგორ გამოიცნო მისი სანუკვარი ოცნება (ფეხსაცმელი, ბეჭედი, სამაჯური და ა.შ.)
ახალგაზრდები უკვე სამი თვეა ერთმანეთს ხვდებიან. მთელი ეს პერიოდი, შეიძლება ითქვას, თემო ჩემს კისერზე იჯდა. ბოლო დრომდე ვითმენდი, მაგრამ არსებული მდგომარეობით დავიღალე. უდავოდ, ჩემი ძმა ძალიან მიყვარს, მაგრამ ვალდებული არ ვარ ვარჩინო! გადავწყვიტე, გულახდილად დალაპარაკება და ახსნა, რომ იყენებენ. თემო გამიბრაზდა და მითხრა, რომ მის საცოლეს უსამართლოდ ცილს ვწამებ.
ღვიძლი ძმა
გაზაფხული დადგა. ჩემი ძმის შეყვარებულმა მეგობრის მეშვეობით შეუკვეთა ბრენდირებული ჩანთა 8 მარტისთვის. ჩემს ძმას ბევრი არ უფიქრია, ფულის სესხება მთხოვა. თანხის რაოდენობაზე აღვშფოთდი:
–უყურე შენ! ჩემი ორი თვის ხელფასია!
–დაიკო, დამეხმარე, გთხოვ! მოგცემ, გპირდები! – მეხვეწებოდა თემო.
შეყვარებული ძმა შემეცოდა და გადადებული თანხა ამოვიღე. წარმოუდგენელი თანხით პატარა ჩანთა იყიდა და შეყვარებულს აჩუქა. ისიც, ბუნებრივია, ძალიან „გაკვირვებული“ იყო ასეთი ძვირადღირებული საჩუქრით. დღემდე ვერ ვპატიობ ჩემს თავს სისუსტეს, რადგან ძმისგან დღესასწაულზე იაც არ მიმიღია.
ამ შემთხვევის შემდეგ თემოს დაჟინებით ვთხოვე, ბინა ცალკე დაექირავებინა. მალევე გადავიდა. ძმას მხოლოდ საკუთარი შემოსავლის იმედად ყოფნა მოუწია, რადგან ფულის სესხებას აღარ ვაპირებდი. თუმცა მისი შეყვარებულის მოთხოვნები არ შემცირებულა. ბიჭმა პრეტენზიული გოგოს ყველა ახირება ვერ შეასრულა და საცოლესაც გული გაუცივდა, მხედველობის არედან გაქრა და ზარებს აღარ პასუხობდა. ძმა დიდხანს მისტიროდა და მხოლოდ 6 თვის შემდეგ დამშვიდდა.
გუშინ დავინახე, როგორ ჯდებოდა თემოს ყოფილი საცოლე მდიდრული უცხოური მანქანის საჭესთან. ნამდვილად, ჩემი ძმის ფინანსები ასეთ საჩუქარს ვერ გაწვდებოდა!
