ვაშლისგან მომზადებული ტკბილი კერძების სია მხოლოდ პეროგს, მაფინს და ჯემს არ მოიცავს. ჭკვიანი დიასახლისები ამ ხილს იყენებენ ბავშვებისთვის საყვარელი ნატურალური ტკბილეულის საფუძვლად. პაპარაცი გიამბობთ, როგორ მოამზადოთ ვაშლის პასტილა სახლის პირობებში.
ამ დესერტის საკუთარი ხელით მოსამზადებლად სპეციალური საშრობი არ გჭირდებათ. უბრალოდ მოიმარაგეთ დრო, ასევე მკვრივი მწვანე ვაშლი გამოხატული სიმჟავით. ასეთ ნაყოფში ბევრი პექტინია, რომელიც პასტილას შეკვრასა და გამაგრებაში დაეხმარება.
როგორ მოვამზადოთ ვაშლის პასტილა საკუთარი ხელით: 3 მეთოდი
ვაშლის პასტილა
ინგრედიენტები:
- 1 კგ ვაშლი
- 300 გ შაქარი
- 1 კვერცხის ცილა
მომზადების წესი:
- ვაშლი კარგად გარეცხეთ. 4 ნაწილად დაჭერით. კურკები მოაშორეთ. საცხობ ფორმაზე ფოლგა დააფინეთ, მასზე დააწყვეთ ვაშლი გადანაჭერით ქვემოთ. 180 გრადუსამდე გახურებულ ღუმელში 25 წუთი აცხვეთ.
- ოდნავ შეგრილებული ვაშლი ღრმა თასში გადაიტანეთ. ხელის ბლენდერით ერთგვაროვანი პიურეს მიღებამდე დააბლენდერეთ.
- თასზე საწური მოათავსეთ, ზემოდან მარლა დააფინეთ. ხილის მასა გადაიტანეთ. მარლის ბოლოები შეკარით. ვაშლის პიურე 1 ღამე მაცივარში გააჩერეთ, რომ ზედმეტი სითხისგან დაიწუროს.
- ხილის მასა წვრილ საცერში გახეხეთ, ყველა თესლი და ძარღვი მოაშორეთ. მიღებული ნარევი მიქსერით ათქვიფეთ ფაფუკი და ღია ფერის მასის მიღებამდე, რომელიც ფორმას კარგად ინარჩუნებს.
- კვერცხის ცილა დაუმატეთ ვაშლის ნარევს და ათქვეფა გააგრძელეთ. ხილის მასა გათეთრებამდე მიიყვანეთ. მოცულობაში დაახლოებით 2–ჯერ უნდა გაიზარდოს.
- თანდათან შაქარი დაუმატეთ, ვაშლის ნარევი მყარი პიკის მიღებამდე აქტიურად ათქვიფეთ. მიღებული ნარევიდან 4 ს/კ ცალკე გადადეთ. პარკი დააფარეთ და მაცივარში შეინახეთ.
- დარჩენილი ნარევი პერგამენტდაფარებულ საცხობ ფორმაზე გადაიტანეთ. გაასწორეთ, მთელ ზედაპირზე თანაბრად გაანაწილეთ. 1 სმ სისქის ფენა უნდა გამოვიდეს.
- 70–80 გრადუსზე გახურებულ ღუმელში 4–5 საათი აცხვეთ. კარი ღია დატოვეთ. როცა მასა გამოშრება და ხელზე აღარ მიგეწებებათ, ღუმელიდან გამოიღეთ. პერგამენტი მოაშორეთ.
- ვაშლის ფირფიტა სამ თანაბარ ნაწილად გაყავით. პირველ ფენას ცალკე გადადებული ხილის მასა წაუსვით. ზემოდან მეორე ფენა დაადეთ. ასევე ათქვეფილი ვაშლის პიურე წაუსვით. მესამე ფენა დაადეთ, ოდნავ ხელი დააჭირეთ.
- პასტილა საცხობ ფორმაზე გადაიტანეთ. 70–80 გრადუსზე გახურებულ ღუმელში 2–3 საათი აცხვეთ.
- შემდეგ პასტილა ორ ნაწილად გაყავით. ერთმანეთზე დაადეთ. მსუბუქად ხელი დააჭირეთ. დესერტი 10 საათი ოთახის ტემპერატურაზე გააჩერეთ. მზადაა!
პასტილა თაფლით
ინგრედიენტები:
- 5 მსხვილი ვაშლი
- 3 ს/კ თაფლი
- 0.5 ჭიქა წყალი
მომზადების წესი:
- ვაშლი გამდინარე წყალში კარგად გარეცხეთ. შუაგული ამოიღეთ. საცხობ ფორმაზე მოათავსეთ. სუფთა წყალი დაასხით. ვაშლი 160 გრადუსამდე გახურებულ ღუმელში 40 წუთი აცხვეთ.
- გამომცხვარი ხილი თასში გადაიტანეთ. თხელი თაფლი დაუმატეთ. ხელის ბლენდერით დააბლენდერეთ, სანამ ერთგვაროვანი არ გახდება.
- საცხობ ფორმას პერგამენტი დააფინეთ. ვაშლი–თაფლის პიურე ძალიან თხელ ბურთად გადაიტანეთ. გაასწორეთ. 45 გრადუსამდე გახურებულ ღუმელში 10 საათი აცხვეთ.
- პასტილა 4 ნაწილად დაჭერით. მილივით დაახვიეთ. საოცარი ტკბილეული მზადაა.
ჰაეროვანი პასტილა
ინგრედიენტები:
- 1 კგ ვაშლი
- 640 გ შაქარი
- დაფქული დარიჩინი გემოვნებით
- 15 გ კვერცხის ცილა
- 100 გ წყალი
- 8 გ აგარ–აგარი
მომზადების წესი:
- ვაშლი გამდინარე წყალში გარეცხეთ. გაამშრალეთ. შუაზე გაჭერით. პერგამენტდაფარებულ საცხობ ფორმაზე გადაჭერით ქვემოთ დააწყვეთ, ერთმანეთისგან დისტანცია დაიცავით.
- 150 გრადუსამდე გახურებულ ღუმელში 1,5 საათი აცხვეთ. წვრილ საცერში გლუვი პიურეს მიღებამდე გახეხეთ.
- თბილ ხილის მასას 400 გ შაქარი მოაყარეთ და კარგად აურიეთ. დაფქული დარიჩინი მოაყარეთ. ისევ აურიეთ. პარკი დააფარეთ და მაცივარში შეინახეთ.
- ცივ ვაშლის პიურეს ცივი კვერცხის ცილა დაუმატეთ. ფაფუქი სქელი მასის მიღებამდე ათქვიფეთ.
- სიროფი მოხარშეთ. სქელძირიან ქვაბში წყალი ჩაასხით. დარჩენილი შაქარი და აგარ–აგარი ჩაყარეთ. სუსტ ცეცხლზე ხარშეთ, პერიოდულად სპატულით აურიეთ.
- როგორც კი სიროფი ადუღდება, ცეცხლიდან გადმოდგით. შაქრის ნარევი ვაშლის მასას წვრილ–წვრილად ჩაასხით, აქტიურად ათქვიფეთ ერთგვაროვანი მასის მიღებამდე.
- საცხობ ფორმას პარკი დააფინეთ. ვაშლის მასა 2–2,5 სმ სისქის ფენად დაასხით. ფორმა მაგიდას მსუბუქად დაარტყით, რომ მომავალი პასტილა თანაბრად გადანაწილდეს.
- 6–8 საათი სამზარეულოში გააჩერეთ სტაბილიზაციისთვის. შემდეგ ფორმიდან ამოიღეთ. შაქრის ფხვნილი უხვად მოაყარეთ, წვრილი საცერი გამოიყენეთ.
- პასტილა ბასრი დანით კუბებად დაჭერით. ყველა მხრიდან შაქრის ფხვნილში ამოავლეთ. პასტილა გისოსზე გადაიტანეთ. 12 საათი ოთახის ტემპერატურაზე გააჩერეთ.
ამ რეცეპტებიდან ნებისმიერის არჩევით შეძლებთ ნატურალური და გემრიელი პასტილას მომზადებას, რომელსაც მთელი ზამთარი მიირთმევთ.
