ზოგიერთი სქესობრივი გზით გადამდები ინფექციებით (სგგი) ადამიანი შეიძლება დაინფიცირდეს სახლის პირობებში. ამის შესახებ კანისა და ვენერიული დაავადებების კლინიკის ექიმმა ირინა ავდეევამ ისაუბრა.
სგგი არის დაავადებები, რომლებიც გადაეცემა ერთი ადამიანიდან მეორეს ძირითადად სქესობრივი კონტაქტის დროს. ცნობილია 30-ზე მეტი ასეთი დაავადება.
შემთხვევების აბსოლუტურ უმრავლესობაში ინფიცირება ხდება სქესობრივი კონტაქტით – შესაძლებელია სპერმით, სასქესო ორგანოების გამონადენით და სისხლით ინფიცირება.
ექიმის თქმით, აუცილებელია პირადი ჰიგიენის ნორმების დაცვა, რადგან მათი უხეში დარღვევის შემთხვევაში ზოგიერთი სგგი-ით ადამიანი შეიძლება დაინფიცირდეს სახლში.
„სქესობრივი გზით გადამდები დაავადებების გამომწვევი აგენტები ორგანიზმში აღწევს კანისა და სასქესო ორგანოების, პირის ღრუს და სწორი ნაწლავის კანისა და ლორწოვანი გარსების მიკროსკოპული დაზიანებით “, – აღნიშნა ექიმმა .
სქესობრივი გზით გადამდები ინფექციების ნიშნები:
- ქავილი და წვა სასქესო ორგანოების არეში;
- ძალიან ხშირი, მტკივნეული შარდვა;
- უჩვეულო გამონადენი და სუნი სასქესო ორგანოებიდან;
- სიწითლე სასქესო ორგანოების არეში და ანუსში;
- სხეულზე გამონაყარის გაჩენა;
- წყლულები, ბუშტუკები, მუწუკები სასქესო ორგანოებზე, ანუსის ირგვლივ, პირის ღრუში, ტუჩებზე;
- გადიდებული ლიმფური კვანძები, განსაკუთრებით საზარდულის მიდამოში; ტკივილი მუცლის ქვედა ნაწილში;
- ტკივილი საშოში სქესობრივი აქტის დროს;
- სისხლიანი გამონადენი საშოდან მენსტრუაციებს შორის.
ექიმმა აღნიშნა, რომ ბევრი სქესობრივი გზით გადამდები დაავადების ინკუბაციური პერიოდი 3-4 კვირაა, ამიტომ სქესობრივი კავშირის შემდეგ დაუყოვნებლივ ჩატარებული ანალიზები არ იქნება სანდო.
ექიმების თქმით, სგგი-ებს შორის ყველაზე დიდ სიხშირით ინფიცირებას იწვევს 8 პათოგენი. აქედან ოთხი ინფექცია – სიფილისი, გონორეა, ქლამიდია და ტრიქომონიაზი – განკურნებადია. დანარჩენი ოთხი ინფექცია – B ჰეპატიტი, მარტივი ჰერპეს ვირუსი (HSV), აივ-ი და ადამიანის პაპილომავირუსი (HPV) – ვირუსული ხასიათისაა და ვერ განიკურნება.
მნიშვნელოვანია! ინფორმაცია მოწოდებულია საცნობარო მიზნებისთვის. უკუჩვენებებისა და გვერდითი მოვლენების შესახებ ჰკითხეთ სპეციალისტს და არავითარ შემთხვევაში არ ჩაიტაროთ თვითმკურნალობა. დაავადების პირველი ნიშნების გამოვლენისას მიმართეთ ექიმს.
