“52 წლის ვარ, კარგად გამოვიყურები, ალბათ, ბევრად ახალგაზრდულად. შინაგანი კონფლიქტი მაქვს: 15–19 წლით უმცროსი თაყვანისმცემლები მყავს (სხვები არ მიზიდავს). მაგრამ საკუთარ თავს სარკეში ვუყურებ და ამ ასაკობრივ განსხვავებას ვხედავ და ბოლო დროს პაემნებზე უარს ვამბობ. ერთს 4 წელია პერიოდულად ვხვდები. დაჟინებით ითხოვს შეხვედრებს, ჩემზე 19 წლით უმცროსია, სხვა ქალაქიდან ჩემთან ჩამოდის. ეს ხომ ადასტურებს, რომ მისთვის მნიშვნელოვანი ვარ? ორივე თავისუფალი ვართ. მე და ჩემს მეუღლეს განსაკუთრებული და ღია ურთიერთობა გვაქვს. არასდროს ვატყუებ. ქმარმა ჩემი რომანების შესახებ იცის (თავად არის ინიციატორი). არ განმსაჯოთ, ასე ხდება. ჩემი კითხვა: რატომ აღარ მჯერა, რომ მიმზიდველი ვარ ახალგაზრდა მამაკაცებისთვის, თუმცა პაემანზე მეპატიჟებიან? სექსი ისევ მიყვარს, მაგრამ რატომ მაფერხებს ასაკი პასპორტში? როგორც იქნა, გავაცნობიერე ჩემი ასაკი და სხეულის დაბერება? რატომ მაღელვებს ეს, მაგრამ არ აღელვებს ჩემს თაყვანისმცემლებს?”
თქვენს ასაკს ვერ ხვდებით. სარკეში იყურებით და გინდა დაინახოთ ახალგაზრდა ქალი, ამიტომაც გინდა გჯეროდეთ, რომ ასე გამოიყურებით. გამოიყურებით ისე, როგორც სარკე გიჩვენებთ. თუმცა სარკეში ჩახედვისას შეიძლება გქონდეთ საკუთარ თავზე დამახინჯებული წარმოდგენა, ამიტომ უმჯობესია ვიდეო გადაიღოთ, რომ მიხვდეთ, როგორ გამოიყურებით სინამდვილეში.
შეთავაზებებს იღებთ ახალგაზრდა მამაკაცებისგან, რადგან ნამდვილად კარგ ფორმაში ხართ თანატოლებთან შედარებით. მაგრამ სხეული მაინც ბერდება, თუნდაც ყოველდღე ვარჯიშობდეთ. ეს უნდა აღიაროთ და შეეგუოთ, რადგან მედიცინამ ჯერ ვერ გამოიგონა ჯადოსნური აბები სიბერის წინააღმდეგ. ხელის ჩაქნევაც არ ღირს, საკუთარ თავზე 90 წლის ასაკშიც უნდა იზრუნოთ. ასე ვლინდება საკუთარი თავის მიმართ სიყვარული.
ადამიანი უძღები არსებაა და თავისი მოთხოვნილებების დაკმაყოფილების შემდეგ მეტი სურს. აი, თქვენც გსურთ იგრძნოთ თქვენი მიმზიდველობა სხვაგვარად. მხოლოდ სექსმა ვალდებულების გარეშე დაგღალათ. გსურთ, რომ უყვარდეთ და სასურველი იყოთ და არა მხოლოდ ფიზიკურად. ამას ვერ იღებთ ვერც ქმრისგან, ვერც საყვარლებისგან. საყვარლებს არ აღელვებს თქვენი ნაოჭები და კანის ხარისხი, რადგან თქვენზე დაქორწინებას არ აპირებენ. სხვა გეგმები აქვთ.
ახალგაზრდა მამაკაცები სიამოვნებით თანხმდებიან დროის გატარებას ასაკოვან ქალთან, რადგან მოწიფული ქალი უფრო მგრძნობიარე, გამოცდილი და აქტიურია სექსში. აი, სიყვარულისა და ოჯახისთვის სხვა ჰყავთ შერჩეული – ის, ვინც მემკვიდრეს გაუჩენთ. როგორც წესი, თანატოლი ან ახალგაზრდა ქალი. ამას ხელს უწყობს საზოგადოებრივი აზრით, რომელსაც არ ესმის, რაში სჭირდება ახალგაზრდა მამაკაცს მოწიფული ასაკის ქალი, თუ მდიდარი არ არის. „რა გჭირს?“ – სვამს კითხვას „კეთილი“ საზოგადოება.
რა რჩება მოწიფულ ქალს? იცხოვროს ილუზიაში, რომ უყვართ, ან ილუზიაში, რომ თავად არ სურს სერიოზული ურთიერთობა. ერთიც და მეორეც დროებითი ხსნა არის. შემდეგ იწყება შინაგანი კონფლიქტი. ეს ილუზიები რეალობას ეჯახება.
ქალი, რომელიც ქმართან ცხოვრობს და ღალატობს, თუნდაც ქმარმა ამის შესახებ იცოდეს და ესალმებოდეს, “შეჩერების სიგნალია” მამაკაცისთვის, რომელიც სერიოზულ ურთიერთობაზე (სიყვარული და ქორწინება) ფიქრობს. ასეთ ქალს მხოლოდ საყვარლის ბედი აქვს. შესაბამისად, მამაკაცისთვის თქვენი მნიშვნელობა მიაღწევს გარკვეულ ზღვარს, რომლის ზემოთ ვეღარ ავა.
უნდა გაარკვიოთ, რა გსურთ სინამდვილეში და შეგიძლიათ თუ არა მისი მიღწევა.
ქორწინება არის თქვენი სტატუსი საზოგადოებაში და გარანტია სიბერეში, მაგრამ ასევე დაბრკოლება სიყვარულზე დაფუძნებული ურთიერთობების შესაქმნელად.
თქვენი ასაკის (+/– 5 წელი) მამაკაცთან სიყვარულის პოვნის უკეთესი შანსი გაქვთ, მაგრამ ასეთი მამაკაცი არ გინდათ. ამას ხელს უწყობს ილუზია, რომ ასაკთან შედარებით ბევრად ახალგაზრდად გამოიყურებით. როგორც წესი, მამაკაცებიც არ ჩქარობენ თანატოლ ქალებთან შეხვედრას, რადგან ისინიც ილუზიებით გარშემორტყმული არიან. ახალგაზრდა მამაკაცებს კი შეგიძლიათ შესთავაზოთ მხოლოდ სექსი. ჩიხია.
ალბათ, თქვენს შემთხვევაში, მადლიერი უნდა იყოთ იმისთვის, რაც გაქვთ, რადგან, როგორც ჩანს, არ აპირებთ თქვენი ცხოვრების მკვეთრად შეცვლას და ეს თქვენთვის მომგებიანი არ არის არც ერთი მხრიდან.
