სწრაფი მეთოდი ყინვისგან დაზიანებული კარტოფილის მოსავლის გადასარჩენად და უხვი მოსავლის მისაღებად

0
209

პლანეტაზე კლიმატის ცვლილება დიდ გავლენას ახდენს სოფლის მეურნეობის სექტორზე. ბოსტანი ან პატარა მიწის ნაკვეთი ოჯახს ნატურალური ჯანსაღი საკვებით კვებაში ეხმარება. გაზაფხულზეც დღის და ღამის ჰაერის ტემპერატურა შეიძლება დიდად განსხვავდებოდეს. ასევე, გაზაფხულის პირველ ნახევარში ბევრ რაიონში მოსალოდნელია ყინვები. ეს კი საშიშია კულტივირებული მცენარეების ახალგაზრდა, სუსტი ყლორტებისთვის. პაპარაცი გიამბობთ, რა უნდა გააკეთოთ, თუ კარტოფილი გაიყინა.

კარტოფილი ძალიან ნაზი მცენარეა. მისი მოსავლიანობა დამოკიდებულია გარე ფაქტორებზე და მოვლაზე. გარდა იმისა, რომ ზაფხულში კარტოფილს თავს ესხმის კოლორადოს ხოჭო, მისთვის ტემპერატურის რეჟიმი ძალიან მნიშვნელოვანია. დათბობისთანავე ბევრი მებოსტნე ეჯიბრება მეზობლებს, თუ ვინ უფრო სწრაფად დარგავს კარტოფილს. სამწუხაროდ, ასეთ შეჯიბრებებს მცენარისთვის სარგებელი არ მოაქვს. ადრეულმა დარგვამ კარტოფილის განადგურება შეიძლება გამოიწვიოს.

თუ კარტოფილი გაიყინა – მებოსტნის რჩევები

ზოგიერთი გამოუცდელი მებოსტნე წინაპრების რჩევებს იყენებს. ოდესღაც კარტოფილის დარგვა აღდგომამდე შეიძლებოდა. ახლა ბევრი მეაგარაკე იყენებს მეცნიერულ მეთოდს და ბუნებაზე დაკვირვების მეთოდს. ხალხური ლეგენდები ყოველთვის არ ემთხვევა არსებულ მდგომარეობას და არ არის ხელსაყრელი კულტივირებული მცენარეებისთვის. კარტოფილის ზოგიერთი ჯიში –3 გრადუსამდე ტემპერატურას იტანს, მაგრამ კარტოფილი დაიღუპება, თუ გარკვეულ ფაქტორებს არ გაითვალისწინებთ.

მცენარეში ყინულის წარმოქმნამ შეიძლება დააზიანოს კარტოფილის უჯრედები, რის გამოც მცენარე კვდება. თუ ყინვებს არ ახლავს მოყინვა ან მცენარეზე ყინვის წარმოქმნა, კარტოფილის გადარჩენა შესაძლებელია. მაშინაც კი, თუ ჰაერის ტემპერატურა –7 გრადუსამდე დაეცა. მთავარია, დროულად შეუქმნათ კარტოფილს კომფორტული პირობები. ბევრი სპეციალისტი გირჩევთ, კარტოფილს დააფაროთ ძველი საბანი ან ტანსაცმელი. შეგიძლიათ გამოიყენოთ ხმელი ფოთლები, ტოტები. დამცავი ფენის ქვეშ კარტოფილისთვის კომფორტული ტემპერატურა შენარჩუნდება.

თუ მაინც მოიყინა, გამოიყენეთ ერთ–ერთი შემოთავაზებული ვარიანტი. დილით, გაყინვის შემდეგ, კარტოფილს წყალი შეასხურეთ. გამოიყენეთ წვრილი გამფრქვევი, რომ წყალმა არ დააზიანოს ისედაც სუსტი ფოთლები. ეს საჭიროა, რომ მცენარეში ყინულის დნობის პროცესი შეანელოთ. ამის შემდეგ დარწმუნდით, რომ მცენარეს მზის სხივები არ ხვდება. სასურველია, დამატებითი ჩრდილი შექმნათ. ასე „გაყინვა“ კარტოფილს ნაკლებ ზიანს მოუტანს.

კარტოფილის გადარჩენის კიდევ ერთი მეთოდია სწორი სასუქის გამოყენება. ამ შემთხვევაში აზოტის და კალიუმის ნატურალური სასუქი გამოიყენეთ. იდეალურია წყალში გაზავებული ძროხის ნაკელი. 1 ვედრო წყალზე 1 ლიტრი სასუქი გამოიყენეთ. კარგად აურიეთ და ამ ნარევით ყლორტები მორწყეთ. დამატებით მცენარეებს გარშემო მშრალი სასუქი მოაყარეთ. ასე შექმნით თბილ საგებს კარტოფილის ფესვებისთვის. ასევე კარტოფილს გამოკვებავთ საჭირო ვიტამინებით, მინერალებით და მიკროელემენტებით.

სწორი მოვლა მაღალი მოსავლის გარანტიას იძლევა. ბოსტანში გემრიელი ხილი და ბოსტნეული რომ გაზარდოთ, ბევრი უნდა იშრომოთ და სხვადასხვა მეთოდი გამოცადოთ. სწორედ ამიტომ, ხალხი ხშირად უზიარებს ერთმანეთს დადასტურებულ რეცეპტებს და ტექნოლოგიებს.