როგორც წესი, არათითზე ბეჭედი გვანიშნებს, რომ მამაკაცი დაოჯახებულია. აქ საიდუმლო არაფერია. მაგრამ დროდადრო ადამიანები ზოგადად მიღებულ ნორმებს გვერდს უვლიან და ისე იქცევიან, როგორც მათგან არავინ მოელის. მაგალითად, დაოჯახებული მამაკაცი ბეჭედს იხსნის „სამსახურში ხელი რომ არ იტკინოს“ და ხანდახან ეს სიმართლეა. განსაკუთრებით მაშინ, თუ ქარხანაში მუშაობს ან სპორტი, აქტიური დასვენება უყვარს.
პირიქითაც შეიძლება მოხდეს, როცა მარტოხელა მამაკაცი თითზე ბეჭედს იკეთებს მისთვის ცნობილი მიზეზის გამო. ასე იქცევა ქვრივი, რომ გარდაცვლილი მეუღლისადმი პატივისცემა გამოხატოს. არიან უიღბლო განქორწინებულებიც, რომლებიც „უსამართლო დანაკარგს“ ვერ ეგუებიან და ბეჭედს ვერ იხსნიან. მოკლედ, არათითზე ბეჭდის ტარების წესი ყოველთვის სწორად არ მუშაობს. ამასთან დაკავშირებით სასაცილო და არც ისე სასაცილო გაუგებრობები შეიძლება წარმოიშვას.
დაოჯახებულია თუ არა მამაკაცი?
ცოტა ხნის წინ თავს გადამხდა ერთი ამბავი, რომელიც დღემდე გრძელდება და არ ვიცი, როგორ მოვიქცე. ვეცდები, მაქსიმალურად მოკლედ და გარკვევით დავწერო. უბრალოდ დაფიქრდით, იქნებ, ვინმემ რამე სასარგებლო მირჩიოს.
საქმიანი ქალი ვარ, ისეთი, როგორსაც ხალხში ეძახიან ბიზნესვუმენს ან ბიზნესლედის. მილიარდერი არ ვარ, მაგრამ მაქვს რაღაც ქონება და კარგი პერსპექტივები. მეორე მხრივ, კარიერას ძალიან ბევრი რამ შევწირე, ჩემი დრო, ნერვები, ქმარი, ოჯახი. ერთი სიტყვით, მარტოხელა ვარ.
ჩემს ცხოვრებაში არის ერთი მამაკაცი, რომელიც სხვების თვალში მხოლოდ საქმიანი პარტნიორია. ვიცნობ ნიკოს ცოლს და მის ვაჟსაც, თუმცა ძალიან ახლოს არა. სამსახურის გამო ხშირად გვიწევს ერთად ყოფნა, ასე რომ დღისით ერთ კაბინეტში ჩვენი დანახვა ჩვეულებრივი ამბავია. პრობლემა იმაში მდგომარეობს, რომ ახლობლების ვიწრო წრემ იცის, რომ ჩვენ ორს მეგობრობაზე მეტი გვაკავშირებს. საყვარლები ვართ, ასე მოხდა. არ განმსაჯოთ, მარტოხელა ქალი ვარ, ნაკლები მომეთხოვება.
მთელი იმ წლების განმავლობაში, სანამ მე და ნიკო ერთად ვართ, ერთხელაც არ მომითხოვია ჩვენი ურთიერთობის გამოაშკარავება ან ახალ ეტაპზე გადასვლა. ჩვენი როლები ყოველთვის მაკმაყოფილებდა. მესმოდა, რომ განქორწინებას არ დათანხმდებოდა ან რა საჭირო იყო? ბავშვი უყვარს, ხოლო ცოლს დაუტოვოს ქონების ნახევარი ხანგრძლივი, მაგრამ მაინც ინტრიგის გამო? აზრს ვერ ვხედავ.
სხვა მხრივ, ერთმანეთისგან არაფერს მოვითხოვთ. შესაძლოა, ნიკო არაერთხელ დამეხმარა რამდენიმე საჩოთირო სიტუაციაში. სამუშაოს ვგულისხმობ. თავიდან მისი თანაშემწე ვიყავი, ამიტომ ამაში არაფერია გასაკვირი. ვიცი, რომ ნიკო დროდადრო სხვა ახალგაზრდა ქალებთანაც ერთობა. თავადაც ერთი კაცის ერთგული არ ვარ. ზრდასრული ადამიანების ჩვეულებრივი ცხოვრებაა, თუ მთელ ამ ვარდისფერ საბურველს მოაშორებთ.
აი, რაშია პრობლემა. დაახლოებით ერთი კვირის წინ ნიკომ უცნაურად მოქცევა დაიწყო. გადაწყვიტა, რომ მაგარი იქნება, თითზე საქორწინო ბეჭედი ატაროს. დღისით, როცა ვმუშაობთ ან უბრალოდ ოფისში ვართ, პრეტენზია არ მაქვს. მაგრამ დანარჩენ დროს, მით უფრო ჩვენს მეგობრებთან, ამის გაკეთება მიუღებელია. ბევრმა ჩვენმა მეგობარმა არც იცის, რომ ნიკოს ცოლი ჰყავს. წყვილად გვთლიან და დანარჩენის ცოდნა არ სჭირდებათ.
ამ კვირაში უკვე რამდენიმე ადამიანი მომიახლოვდა გაფართოებული თვალებით და აშკარა კითხვებით. „რატომ უკეთია ნიკოს ბეჭედი და შენ არა? რატომ არ გვითხარით, მოგილოცავდით!“ და ყველაფერი ამ სტილში. პატარა აღარ ვარ, ამიტომ მოტყუება ან თავის მართლება არ მჩვევია, მაგრამ მაშინ მომიწია ნაჩქარევად რაღაც ისტორიის მოგონება, რომ ეს თამაშია, ვოცნებობთ ქორწილზე და ასე შემდეგ. საშინელი გრძნობა დამიტოვა.
მინდოდა გამერკვია, რა დაემართა ნიკოს. კლოუნობას აპირებს თუ შუახნის კრიზისი აქვს? თავიდან ხმას არ იღებდა, შემდეგ ხუმრობა სცადა. ახლა ამბობს, რომ თავად ვიცოდი, რა „თამაშებს“ ვთამაშობდი ცოლიან მამაკაცთან. უნდა მცოდნოდა, რომ ეს შეიძლება მომხდარიყო. მამაკაცის ტიპური სულელური პასუხი. ნუთუ წინააღმდეგი ვარ, რომ ცოლიანია ან ვეჭვიანობ? არა, მაგრამ მეგობრებს შორის ჩვენი ლეგენდა ინგრევა და ეს კარგი არ არის. ჭორები გავრცელდება და ჩვენს „მეგობრობაზე“ გაიგებენ ისინი, ვისაც ამის ცოდნა არ სჭირდება.
ხომ საღად ვმსჯელობ? გუშინ ჩვენს საერთო მეგობართან დალაპარაკება ვცადე. არაფერი კონკრეტული, უბრალოდ ვკითხე, ხომ არ უთხრა ნიკომ თავის მეგობრებს რაიმე სიახლის შესახებ? უაზრო მცდელობა იყო. კაცები ყოველთვის ერთმანეთის მხარს დაიჭერენ. დაიწყო ხუმრობა, სისულელეების როშვა, კონკრეტული არაფერი მითხრა. თითქოს ოდესმე სხვაგვარად ყოფილიყო.
რჩევა მჭირდება. როგორ ფიქრობთ, რამ გამოიწვია ჩემს საყვარელში ასეთი ცვლილება? რამეს ნიშნავს ბეჭედი? ნორმალურად ვურთიერთობთ, თუ ამ თემას არ ჩავთვლით, არაფერს მიმალავს და სკანდალებს არ ვმართავთ. ოღონდ ფსიქოლოგთან მისვლა არ გვირჩიოთ. ზრდასრულები ვართ და ამ თერაპიის არ გვჯერა. არც მე მჯერა, ნიკოც ცხოვრებაში არ მივა ფსიქოლოგთან. მხოლოდ თქვენი იმედი მაქვს, ახლობლებს ჩემს პრობლემას ვერ გავუმხელ.
