სუფთა იატაკის გარეშე სახლის საფუძვლიანად წმენდა დასრულებულად ვერ ჩაითვლება. ეს გასაკვირი არც არის, რადგან სუფთა იატაკზე სიარული არა მხოლოდ სასიამოვნოა, არამედ მნიშვნელოვანია ჯანმრთელობისა და კარგი განწყობისთვის. ამიტომაც მაღაზიებში გვხვდება ბევრი საყოფაცხოვრებო ქიმია სახლის დალაგების გასამარტივებლად. მაგრამ ეს შეგიძლიათ გააკეთოთ ხალხური საშუალების გამოყენებით. „პაპარაცი“ გიამბობთ, როგორ გაწმინდოთ იატაკი ისე, რომ ზოლები არ დარჩეს.
აგარაკზე კერძო სახლის გენერალურად დასუფთავება გადავწყვიტეთ. ამ მიზნით შაბათ-კვირას აგარაკზე ჩავედით, მაგრამ საყოფაცხოვრებო ქიმია სახლში დაგვრჩა. გასარეცხად და ზედაპირების გასაწმენდად საყოფაცხოვრებო ქიმია გვეყო, მაგრამ იატაკის საწმენდი საშუალება არ გვქონდა. მეზობელთან გადავედი საჭირო საშუალების სასესხებლად. მან კი მითხრა, რომ ამ მიზნით მაღაზიაში არაფერს ყიდულობს და გამიმხილა რამდენიმე ხალხური საშუალების რეცეპტი.
როგორ გაწმინდოთ იატაკი ხალხური საშუალებებით
მაღაზიაში ნაყიდი იატაკის საწმენდი საშუალებები მრავალფეროვნებით გვხიბლავს, მაგრამ ფასიც ხშირად იკბინება, ამიტომ უმეტესობა ჩვენგანი იაფ ალტერნატივას ეძებს. თუ სახლში ბავშვები და შინაური ცხოველები ცხოვრობენ ან ოჯახის წევრი ალერგიულია, საყოფაცხოვრებო ქიმია სახიფათო შეიძლება იყოს ჯანმრთელობისთვის. მაგრამ არსებობს ხალხური საშუალებები, რომელთა დახმარებით იატაკს კარგად გაასუფთავებთ.
გამოიყენეთ ეს საშუალებები იატაკის გასაპრიალებლად
არსებობს რამდენიმე გამოცდილი ხალხური რეცეპტი, რომელიც იატაკს გააპრიალებს და ზოლებს არ დატოვებს.
ეთერზეთი
ერთ ვედრო თბილ წყალს 2 ს/კ სუფრის ძმარი და 3 ს/კ სუფრის მარილი დაუმატეთ. რამდენიმე წვეთი ეთერზეთი ჩაასხით. ასეთი ხსნარით თავს დაიცავთ არა მხოლოდ ვირუსებისა და ბაქტერიებისგან, არამედ მიიღებთ პრიალა იატაკს ლაქების გარეშე.
ამ მიზნით შეგიძლიათ გამოიყენოთ სხვადასხვა სახის ზეთი. მაგალითად, ჩაის ხის ზეთი, როზმარინის ან პიტნის ზეთი, რომელთაც ანტიბაქტერიული ეფექტი აქვთ. თუ ფორთოხლის, ლიმონის, ვარდის ან ილანგ-ილანგის ზეთს დაუმატებთ, სუფთა იატაკთან ერთად სასიამოვნო არომატს მიიღებთ.
გლიცერინი
ძალიან ჭუჭყიანი იატაკისთვის გლიცერინი გამოგადგებათ. 1 ვედრო თბილ წყალში 2 ს/კ თხევადი ჭურჭლის სარეცხი საშუალება და 25 გ გლიცერინი ჩაასხით და აურიეთ. ამ ნარევით ნებისმიერი ტიპის იატაკის საფარი შეგიძლიათ გაწმინდოთ.
ნიშადურის სპირტი
თუ იატაკი ძალიან ჭუჭყიანია ან მასზე ლაქებია, მაშინ ნიშადურის სპირტი აიღეთ. 50 მლ ნიშადურის სპირტი 1 ვედრო წყალში შეურიეთ და იატაკი ამ ხსნარით გაწმინდეთ. ასეთი წმენდის შემდეგ ოთახი აუცილებლად გაანიავეთ. ასე სისუფთავეს უზრუნველყოფთ და ტარაკნებსაც მოიშორებთ.
ძმარი
ძმარი ყველაზე უსაფრთხო საშუალებად ითვლება იატაკის საწმენდად. მის მოსამზადებლად 5 ლ წყალი და 250 მლ ძმარი აურიეთ. ამ ხსნარით იატაკი გაწმინდეთ და შემდეგ ოთახი გაანიავეთ. ასე იატაკს გაწმენდთ, დეზინფექციას ჩაუტარებთ. ასევე სოკოს საწინააღმდეგო ეფექტს მიიღებთ.
