შინაური ცხოველი სინაზის და სიხარულის უშრეტი წყაროა. თავს მარტოსულად არასდროს იგრძნობთ, როცა სახლში კატა ან ძაღლი ცხოვრობს. რა სასიამოვნოც არ უნდა იყოს ცხოველთან ერთად დროის გატარება, ადრე თუ გვიან გვიწევს სახლიდან გასვლა და საკუთარ საქმეზე წასვლა. ჩნდება კითხვა: რამდენ ხანს შეიძლება ძაღლის ან კატის სახლში მარტო დატოვება, რომ არ მოიწყინონ? ამ მხრივ, კატა უფრო დამოუკიდებელია, მაგრამ ძაღლთან საქმე რთულადაა.
ერთმა ჩემმა მეგობარმა გადაწყვიტა ძაღლის ყოლა და დახმარებისთვის გამოცდილ კინოლოგს მიმართა. ერთ-ერთი მთავარი მოთხოვნა იყო ძაღლის სახლში მარტო დარჩენის უნარი. მეგობარი მუშაობს და ოჯახი ჯერ არ ჰყავს, ამიტომ ცხოველი საკმარისად დამოუკიდებელი უნდა იყოს, რომ მარტო ყოფნისას არ მოიწყინოს. სპეციალისტმა მეგობარს ურჩია რამდენიმე ჯიშის ძაღლი, რომლებიც მარტოობას უფრო ადვილად იტანენ. მეგობარმა მათ შორის ერთი აირჩია.
შეიძლება თუ არა დატოვოთ ძაღლი მარტო სახლში?
სპეციალისტები ამბობენ, რომ ძაღლის დამოუკიდებლობა ბევრ ფაქტორზე დამოკიდებულია. მათ შორის მთავარია ცხოველის ჯიში და ასაკი. საქმე იმაშია, რომ შინაური ცხოველის გადარჩენა პირდაპირ დამოკიდებულია ჩვენს ყოფნაზე. პატრონთან დიდი ხნით განშორება ძაღლს ანერვიულებს.
პატარა ლეკვები მუდმივ ყურადღებას ითხოვენ და ეს გასაკვირი არ არის. ლეკვებმა ბევრი რამ არ იციან, 2 თვის ასაკში მარტო მაქსიმუმ 1 საათით შეგიძლიათ დატოვოთ. ასეთი პატარა ცხოველები უნდა აიყვანოთ მხოლოდ მაშინ, როცა შედარებით თავისუფალი გრაფიკი გაქვთ. 30 დღის შემდეგ ეს დრო შეგიძლიათ გაზარდოთ 1 საათით, 2 თვის შემდეგ – 2 საათით. აი, 5 თვის ლეკვი უკვე 5 საათით შეგიძლიათ დატოვოთ მარტო.
რამდენ ხანს შეგიძლიათ დატოვოთ ძაღლი მარტო?
დიდი მნიშვნელობა აქვს, რა ჯიშის არის თქვენი შინაური ცხოველი. ამაზეა დამოკიდებული, რამდენად შეაწუხებს პატრონთან განშორება.
ჩაუ-ჩაუ
ამ ჯიშის ძაღლს ადამიანზე ძალიან მიჯაჭვულს ვერ ვუწოდებთ, რადგან დამოუკიდებელი ხასიათით გამოირჩევა. პატრონთან დროს სიამოვნებით ატარებს, მაგრამ მის არყოფნას ძალიან არ იდარდებს. ეს ჯიში ძალიან ტაქტილური არ არის, ამიტომ თუ უზრუნველყოფთ ძირითად საჭიროებებს საკვების და დროული გასეირნების სახით, სამსახურში წასვლისას მთელი დღის განმავლობაში მარტო შეგიძლიათ დატოვოთ.
ჩიხუახუა
ეს ძაღლი სხვა ჯიშებთან შედარებით უფრო ჭკვიანად ითვლება. ჩიხუახუა მარტო ყოფნას თანდათანობით შეგიძლიათ მიაჩვიოთ. ჯერ ცოტა ხნით დატოვეთ, თანდათან დრო გაზარდეთ. ამასთან ლეკვის საუკეთესო ასაკი 3 თვეა. გაითვალისწინეთ, ძაღლი უნდა დატოვოთ იზოლირებულ შენობაში (მაგალითად, ცალკე ოთახში), სადაც წყალსა და საკვებზე მუდმივი წვდომა ექნება.
ფრანგული ბულდოგი
ფრანგული ბულდოგი კომუნიკაბელურ ჯიშად ითვლება. უყვარს, როცა პატრონი მასზე ზრუნავს და ყურადღებას იჩენს, ამიტომ დიდხანს მარტო ვერ დატოვებთ. თუ რუტინას დაადგენთ, მარტო დაახლოებით 6 საათი კომფორტულად იქნება. უფრო დიდხანს დატოვების შემთხვევაში, მოიწყენს, რამაც შეიძლება გამოიწვიოს გარკვეული ქცევითი პრობლემები.
ტაქსა
რაც უფრო ასაკშია ამ ჯიშის ძაღლი, მით უფრო ჭკვიანია. ძალიან მოსიყვარულეა, პატრონთან ერთად დროის გატარება უყვარს. ზრდასრული ძაღლი 8 საათზე მეტხანს მარტო არ დატოვოთ. გახსოვდეთ, ცხოველს უნდა ჰქონდეს თავისი საწოლი ან სახლი, სადაც დამალვას შეძლებს.
ეს ჯიში სპეციალურად სანადიროდ გამოიყვანეს, ამიტომ აქტიურობით და მოძრაობით გამოირჩევა. ძაღლს შეუძინეთ სპეციალური სათამაშოები, რადგან მათი არარსებობის შემთხვევაში დაღრღნის დივანს, ფეხსაცმელს და სხვა პატარა ნივთებს. სხეულის თავისებურებების გამო აქტიური ხტომა არ შეუძლია. საფეხურებზე წვდომა შეუზღუდეთ, ტაბურეტის ან სპეციალური სადგამით მსუბუქი ასასვლელი გაუკეთეთ.
გრეიჰაუნდი
დიდი ზომის და ენერგიული ძაღლია, მაგრამ კარგი კომპანიონია არა მხოლოდ აქტივობებში, არამედ დასვენებაშიც. დიახ, სჭირდება ყოველდღიური გასეირნება სირბილის და გაწელვების შესაძლებლობებით. ამასთან შეუძლია დივანზე წამოწვეს და რამდენიმე საათი მშვიდად გაატაროს. დიახ, პატრონზე მიჯაჭვულია, მაგრამ გარკვეული დროით მის არყოფნას მშვიდად იტანს.
ბიგლი
ძაღლის ერთ-ერთი ყველაზე აქტიური ჯიში. ბიგლი სიამოვნებით ატარებს დროს ქუჩაში და სახლში, რაც კარგ საოჯახო ძაღლად აქცევს. მართალია, 1 წლამდე ასაკში მოითხოვს პატრონის ყურადღებას და გარკვეულ დროს. ამასთან, ზრდასრული ძაღლიც მარტო დიდხანს არ უნდა დარჩეს. უკვე რამდენიმე საათის შემდეგ მოიწყენს. მოწყენილი ბიგლი კი ახირებულად იქცევა. თუ საკუთარი სათამაშოები მოჰბეზრდება, თქვენი ნივთებიდან ახალს გააკეთებს. ამიტომ, თუ ძაღლს სახლში მარტო ტოვებთ, ძვირფასი ნივთები გადამალეთ.
