უხეში პირსახოცი არ არის ის, რაც გვინდა შემოვიხვიოთ შხაპის მიღების შემდეგ. სამწუხაროდ, ხაოიანი აბაზანის პირსახოცების ბევრი მოყვარული ამ პრობლემას აწყდება. თუ მათ რიგში ხართ, გიამბობთ, როგორ დაარბილოთ პირსახოცი და გახადოთ სასიამოვნო ხელშესახები.
ყველა დიასახლისმა უნდა იცოდეს ამ ნაწარმის გარეცხვის და გაშრობის ძირითადი წესები. ასე არ მოგიწევთ უხეშ პირსახოცთან შეხება, რადგან სარეცხი მანქანიდან მხოლოდ რბილ პირსახოცებს ამოიღებთ. დამატებითი მოქმედებებით ახალივით იქნება.
როგორ დავარბილოთ პირსახოცები?
სუფრის მარილის გამოყენებით
ეს ძალიან მარტივი და საკმაოდ ბიუჯეტური მეთოდია. ძვირადღირებული თეთრეულის კონდიციონერის გამოყენება საჭირო არ არის. საკმარისია, მარილი დაამატოთ. 10 ლიტრი სუფთა წყალი ტაშტში აავსეთ. მასში 20 სუფრის კოვზი სუფრის მარილი გახსენით. მზა ხსნარში გაუხეშებული პირსახოცები ჩაალბეთ. 40 წუთი გააჩერეთ. შემდეგ პირსახოცები სუფთა თბილ წყალში კარგად გაავლეთ და სუფთა ჰაერზე გასაშრობად გაკიდეთ.
მეთოდი სიცივით
პირსახოცების დასარბილებლად სიცივე გამოგადგებათ. რას ნიშნავს ეს? დაგჭირდებათ ტაშტი ყინულიანი წყლით, რომელშიც პირსახოცები კარგად უნდა გაავლოთ. შემდეგ პირსახოცები ყინულიანი წყლით სავსე ტაშტში 3-4 საათი გააჩერეთ. ამის შემდეგ პირსახოცები გარეცხეთ და გასაშრობად გაკიდეთ.
მნიშვნელოვანია! თუ ამ მეთოდს ზამთარში იყენებთ, პირსახოცები რამდენიმე საათით თოვლში შეგიძლიათ დატოვოთ. თოვლი ტაშტში ააგროვეთ. მასში პირსახოცები ჩააწყვეთ და 3 საათის შემდეგ წყალი გაავლეთ. სირბილე გარანტირებულია.
რჩევები ხარისხიანი რეცხვისთვის
- პირსახოცები რომ არ დაზიანდეს, ცალკე გარეცხეთ. მასთან ერთად ტანსაცმელი არ გარეცხოთ.
- რეცხვის დროს სპეციალური ბურთულების გამოყენება შესანიშნავი გამოსავალია. ჩვეულებრივ, მათ იყენებენ ქურთუკების გარეცხვისას. პირსახოცების შემთხვევაშიც ეფექტური იქნება.
- სარეცხი მანქანის რეჟიმს ყურადღება მიაქციეთ. პირსახოცების რეცხვისას დამატებითი გავლება ჩართეთ. ეს საჭიროა იმისთვის, რომ სარეცხი ფხვნილი პირსახოცებში არ დარჩეს.
- ხაოიანი პირსახოცები გათბობის ბატარეაზე არ გააშროთ. პირსახოცები სუფთა ჰაერზე უნდა გააშროთ. ამ მიზნით აივანი იდეალური ადგილია. გახსოვდეთ, რომ პირსახოცები დროულად უნდა ჩამოხსნათ, ზედმეტად გაშრობაც არ ღირს. წინააღმდეგ შემთხვევაში, გაუხეშდება.
- თუ გიყვართ კარგად დაუთოებული პირსახოცების გამოყენება, ორთქლის ფუნქცია არ დაგავიწყდეთ. მისი ჩართვა აუცილებელია, როცა საქმე ხაოიან აბაზანის პირსახოცებს ეხება.
ამ ხრიკების გამოყენების წყალობით თქვენი პირსახოცი რეცხვის შემდეგ არ გაუხეშდება. მთავარია, დაიცვათ პირსახოცების გაშრობის ძირითადი წესები და დაიმახსოვროთ დამატებითი მოქმედებები, რომლებიც ხელს შეუწყობს პირსახოცების სირბილის აღდგენას.
