ყველასთვის საყვარელ ჟელეს დესერტს, რომელიც ნოსტალგიას იწვევს, კაფეებში უკვე იშვიათად შეხვდებით. შესაძლოა, უბრალო გარეგნობის და სიმარტივის გამო დესერტი „მოზაიკა“ ან „გატეხილი შუშა“ თანამედროვე დაწესებულებებში აქტუალური აღარაა. არადა, ასეთი მსუბუქი დესერტი ზოგჯერ ძალიან გვაკლია. საბედნიეროდ, „მოზაიკა“ ძალიან მარტივად მზადდება.
ჟელეს ტორტი ცხობის გარეშე
საკონდიტრო მაღაზიებში ტორტების მრავალფეროვნება ჩვენს გაოცებას იწვევს, მაგრამ განსაკუთრებულ დღესასწაულზე განსაკუთრებული დესერტი გვსურს. ჟელეს შიგთავსის მქონე ბისკვიტის ტორტის მოყვარულებს დიდებულ ტორტს ფორთოხლის ჟელეთი ვურჩევთ. რამდენიმე საათიანი ცხობა სტუმრების მადლობებით და ტრიუმფით დასრულდება.
ნებისმიერ დღესასწაულზე ჟელეს ტორტი შესანიშნავი ვარიანტი იქნება, მით უმეტეს თუ გაზქურასთან დიდხანს ყოფნა არ გსურთ. ის ღირსეულად გამოიყურება, კუჭს არ ავსებს, ამასთან ნაზი გემო აქვს. დღეს „პაპარაცი“ გიამბობთ ჟელეს დესერტის რეცეპტებს, რომელიც დიდ ძალისხმევას და ფინანსურ სახსრებს არ მოითხოვს.
ჟელეს დესერტი შესქელებული რძით
ინგრედიენტები:
- 950 მლ წყალი
- 90 გრ კივის ჟელე
- 90 გრ ალუბლის ჟელე
- 90 გრ ლიმონის ჟელე
- 20 გრ ჟელატინი
- 500 გრ შესქელებული რძე
მომზადება:
1. პირველ რიგში, ყველაზე გემრიელი – ჟელეს ფერადი ნაჭრები მოამზადეთ. სხვადასხვა ფერის ჟელე სხვადასხვა ჭურჭელში ჩაყარეთ და წყალი აადუღეთ. თითოეულ ჟელეს 300 მლ მდუღარე წყალი დაასხით და აურიეთ, სანამ ჟელე არ გაიხსნება.
2. ფერადი ჟელე გააგრილეთ და მაცივარში 2 საათით შედგით, რომ კარგად გამაგრდეს და ადვილად არ დაიშალოს.
3. ფერადი დესერტის ბაზის მოსამზადებლად, 20 გრ ჟელატინს 50 მლ წყალი დაასხით და 10 წუთით გააჩერეთ, რომ ჟელატინი გასივდეს.
4. ჟელატინი წყლის ორთქლზე ან მიკროტალღურ ღუმელში გაადნეთ და შესქელებული რძე აურიეთ.
5. სხვადასხვა ფერის ჟელე მცირე კუბებად დაჭერით. საცხობ ფორმაში გადაიტანეთ და შესქელებული რძის და ჟელატინის ნარევი დაასხით.
6. დესერტი მაცივარში 8 საათით შედგით. შედეგად, ტკბილ ოდნავ მომჟავო დესერტს მიიღებთ.
ხშირად ასეთ ფერად დესერტს ორცხობილას ბაზით ამზადებენ. თუ ასეთი კომბინაცია უფრო გიყვართ, ჟელეს ტორტის ორცხობილით მომზადება ძალიან მარტივია. ნებისმიერი ფხვიერი ორცხობილა დააქუცმაცეთ და კარაქი აურიეთ. ნარევი მაცივარში 2 საათით შედგით, შემდეგ კი რეცეპტის მიხედვით მოამზადეთ.
ჟელეს ტორტის რეცეპტი რძით მოეწონება ყველას, ვინც სხეულის ფორმებს ყურადღებას აქცევს. ჩვეულებრივი რძით მომზადებული დესერტი სხვა დესერტებთან შედარებით უფრო ნაკლებ კალორიას შეიცავს. სწორედ ამიტომ, მაშინაც კი თუ დიეტაზე ხართ, ჟელეს დესერტის ნაჭერი თქვენს სხეულის ფორმებს ზიანს არ მიაყენებს.
ჟელეს დესერტი რძით
ინგრედიენტები:
- 90 გრ კივის ჟელე
- 90 გრ მარწყვის ჟელე
- 90 გრ ლიმონის ჟელე
- 1 ლ რძე
- 4 ს/კ შაქარი
- 10 გრ ვანილი
მომზადება:
1. სხვადასხვა ჭურჭელში მრავალფეროვანი ჟელე ინსტრუქციის მიხედვით მოამზადეთ. გააგრილეთ და მაცივარში 2 საათით შედგით. ჟელე სწრაფად რომ გამაგრდეს, ფართო ფორმა გამოიყენეთ.
2. ჟელატინი წყლის ორთქლზე გაადნეთ და რძეს აურიეთ. შაქარი დაუმატეთ და კარგად აურიეთ. რძის ნარევის სრულ გაგრილებას დაელოდეთ.
3. სხვადასხვა ფერის ჟელე ნაჭრებად დაჭერით და ღრმა თასში მოათავსეთ.
4. ფერად ჟელეს ნაჭრებს რძე დაასხით და მაცივარში მთელი ღამე გააჩერეთ. დესერტს სადღესასწაულო გარეგნობა რომ ჰქონდეს, შეგიძლიათ სილიკონის საცხობი ფორმა გამოიყენოთ. ასე დესერტის მარტივად და დაზიანების გარეშე ამოღებას შეძლებთ.
ჟელეს ტორტს ხშირად არაჟნით ამზადებენ. რეცეპტი საკმაოდ მარტივია.
ჟელეს დესერტი არაჟნით
ინგრედიენტები:
- 90 გრ კივის ჟელე
- 90 გრ ფორთოხლის ჟელე
- 90 გრ ალუბლის ჟელე
- 500 გრ არაჟანი
- 20 გრ ჟელატინი
- 200 გრ შაქარი
მომზადება:
1. სხვადასხვა ფერის ჟელე თქვენი გემოვნებით შეარჩიეთ, რაც უფრო ბევრ ფერს გამოიყენებთ, დესერტი მით უფრო გემრიელი და ლამაზი გამოვა. ჟელე ინსტრუქციის მიხედვით მოამზადეთ. ჟელე უფრო მოქნილი რომ იყოს, ინსტრუქციაში მითითებული წყლის რაოდენობა 30%-ით შეამცირეთ.
2. ჟელე საცხობ ფორმებში გადაანაწილეთ და მაცივარში 2 საათით გასამაგრებლად შედგით.
3. სხვადასხვა ფერის ჟელე ფორმებიდან ამოიღეთ და ნაჭრებად დაჭერით. დაჭრილი ჟელეს ნაჭრები დიდ თასში აურიეთ.
4. ჟელატინს 60 მლ მდუღარე წყალი დაასხით და წყლის ორთქლზე გაადნეთ.
5. არაჟანს შაქარი დაუმატეთ და აურიეთ. არაჟანს ჟელატინი ნელ-ნელა დაუმატეთ და აურიეთ.
6. ფერად ჟელეს ნაჭრებს არაჟნის ნარევი დაასხით და მაცივარში მთელი ღამე გააჩერეთ.
თუ ჟელეს დესერტი გიყვართ, ძალიან გაგიმართლათ. მის მომზადებაზე ბევრი დროს და ფულის დახარჯვა არ მოგიწევთ, ხოლო მარტივი გამოცდილი რეცეპტები არასდროს გიმტყუნებთ. შეიძლება კი გამომცხვარი დესერტი ცივ დესერტს შევადაროთ? ალბათ, არა. როცა საქმე ეკონომიას ეხება, ჟელე წამებში მოიგებს. თუ რეცეპტი მოგეწონათ, მეგობრებს სოციალურ ქსელში აუცილებლად გაუზიარეთ.
