36 წლის ვარ, განქორწინებული, შვილი მყავს. გაყიდვების დეპარტამენტის ხელმძღვანელად ვმუშაობ საკმაოდ დიდ და სტაბილურ კომპანიაში. ცოტა ხნის წინ ერთი ახალგაზრდა კაცი, 19 წლის, ჩემს თანაშემწედ ავიყვანეთ. ძალიან კომუნიკაბელურია, სამუშაო საკითხების მიმართ დიდ ინტერესს იჩენს. ისე მოხდა, რომ ახლო ურთიერთობა დავიწყეთ, ჩვენს შორის გაჩნდა ფლირტი.
სამსახურში ვმალავდით, მხოლოდ მენეჯერსა და ხელქვეთს შორის კომუნიკაცია გვქონდა. სამსახურის შემდეგ ნეიტრალურ ტერიტორიაზე ვხვდებოდით: ჩახუტება, კოცნა. არ ვიცი, რისთვის სჭირდებოდა მას, მაგრამ ჩემთვის სუფთა ჰაერი იყო განქორწინების შემდეგ. საქმე ინტიმურ ურთიერთობამდე არ მისულა.
ცოტა ხნის წინ კორპორაციული წვეულება იყო, კომპანიის იუბილეს აღვნიშნავდით. საერთო მხიარულების შემდეგ ყველა წავიდა. გადავწყვიტეთ ოფისში წასვლა, ღვინის დალევა და განმარტოება. ბინა ან სასტუმროში ნომერი არ აგვიღია, რადგან ორივე ვაპირებდით ღამის გათევას ჩვენ-ჩვენს სახლში. ის მამასთან ერთად ცხოვრობს, მე კი სახლში დედა და ვაჟი მელოდება. ოფისში მივედით, იქ ვისაუბრეთ და დავისვენეთ. ჯერ იყო კოცნა, შემდეგ დაიწყო მოფერება. არაფერი სერიოზული, რადგან ალკოჰოლის მიუხედავად საღ გონებაზე ვიყავი.
კვირას მესენჯერში მივიღე კოლეგისგან ვიდეო, რომელიც ოდნავ შეღებული კარიდან გადაიღო. გადაღებული იყო ის, რაც ჩემსა და ახალგაზრდა კაცს შორის მოხდა. ბუნებრივია, ერთმანეთით გატაცებული ვიყავით და ვერ შევამჩნიეთ. ვიდეოს ხანგრძლივობა 20 წამია. გავშეშდი, გული ამიჩქარდა. ვკითხე, რატომ გადაიღო და რას აკეთებდა ოფისში დილის 4 საათზე. მიპასუხა: „რას ვაკეთებდი, ამას მნიშვნელობა არ აქვს. შენს ადგილზე, რეპუტაციაზე დავფიქრდებოდი“.
ვკანკალებდი, უბრალოდ წარმოვიდგინე, რა მოხდება, თუ ამ ვიდეოს გაავრცელებს. პირდაპირ მომწერა, რომ ხელფასის გაორმაგება უნდა, წინააღმდეგ შემთხვევაში ვიდეო „გაფრინდება“ ჩვენს საერთო სამუშაო ჩატში. არ ვიცი, არის თუ არა ამის გამკეთებელი. რა გავაკეთო? თუ ხელფასს მოვუმატებ, ბოლოს შეიძლება ვიდეო ჩატში მაინც ჩააგდოს. წავშალო ჩატიდან? ნაკლებად სავარაუდოა, რომ რამეში დაეხმაროს. ხელქვეითი ამბობს, რომ ხელფასი უნდა მოვუმატო და ჩემს თვალწინ ვიდეოს წაშლა მოვითხოვო. როგორ მოვიქცე? ყოველდღე ეკლებზე ვზივარ.
ზრდასრული და დამოუკიდებელი ადამიანი ვარ, მაგრამ ჩემი შეშინება შეძლო. არ მრცხვენია, რომ ჩემზე ასაკით უმცროსია. ორივეს გვესმის, რომ წამიერი გატაცებაა. არანაირი სერიოზული ურთიერთობა. ფაქტი, რომ ეს დაინახა და ვიდეოს გავრცელებით მემუქრება, გულს მიმძიმებს. არ ვიცი, როგორ მოვიქცე ამ სასაცილო სიტუაციაში?!
