სამზარეულო არის ადგილი სახლში, სადაც სისუფთავის შენარჩუნება ყველაზე რთულია. გარდა ამისა, სამზარეულოში არის დასუფთავების პრობლემები, რომელთა მოგვარება ჩვეული საშუალებებით გაგიჭირდებათ. ერთ-ერთი ასეთი პრობლემაა გაზქურის ჭუჭყიანი სახელურები. გაზქურა მუდმივად საჭმლის მომზადების ეპიცენტრშია, ამიტომ მასზე ცხიმის ნადებს თავიდან ვერ აიცილებთ.
გაზქურის სახელურებიდან ჭუჭყის და ცხიმის მოშორება საკმაოდ რთულია. რა თქმა უნდა, ამისთვის შეგიძლიათ გამოიყენოთ საყოფაცხოვრებო ქიმია, მაგრამ ხშირად ასეთი საშუალებები იწვევს ალერგიას, კანის გაღიზიანებას და თან მძაფრი სუნი აქვს. „პაპარაცი“ გიამბობთ, როგორ გაწმინდოთ სახელურები უფრო უსაფრთხო და იაფი მეთოდებით.
ცხიმის ნადები გაზქურის სახელურებზე: როგორ გაწმინდოთ?
ყველა ეს მეთოდი დროში გამოცდილია, ამიტომ მათ შორის შეძლებ აარჩიო ის, რომელიც ყველაზე მეტად შეგეფერებათ.
მეთოდი 1
ნიშადური-ანისულის წვეთები ერთ-ერთი ყველაზე პოპულარული საშუალებაა გაზქურის სახელურებიდან ცხიმის მოსაშორებლად. ამ საშუალებით ნებისმიერი ცხიმიანი ჭუჭყი შეგიძლიათ მოიშოროთ. წვეთები ჯანმრთელობისთვის უსაფრთხოა, ამიტომ დასუფთავების დროს დამცავი ნიღბის გაკეთება საჭირო არ არის. თუ მგრძნობიარე კანი გაქვთ, ხელთათმანი გამოიყენეთ.
ნიშადური-ანისულის წვეთების გარდა დაგჭირდებათ ბამბის ჩხირები და ძველი კბილის ჯაგრისი. თავად წვეთები აფთიაქში შეგიძლიათ შეიძინოთ. ხელთათმანი გაიკეთეთ, ბამბის ჩხირი წვეთებით დაასველეთ და საშუალება ჭუჭყიან ადგილებს წაუსვით. კუთხეები და ნაკერები არ გამოგრჩეთ. იქ ყველაზე მეტი ცხიმი გროვდება.
თუ ძალიან ძლიერი ჭუჭყია და მაშინვე არ შორდება, კიდევ რამდენიმე წვეთი დააწვეთეთ და კბილის ჯაგრისით გახეხეთ. ბოლოს გაზქურის სახელურები სუფთა სველი ჩვრით გაწმინდეთ.
მეთოდი 2
ნიშადურის სპირტსაც ზედაპირების გაწმენდა შეუძლია. მართალია, სუფთა სახით ნიშადურის სპირტი ძალიან ძლიერია, ამიტომ დასუფთავებისას ფანჯრები უნდა შეაღოთ. დამცავი ნიღაბი ან რესპირატორი შეგიძლიათ გამოიყენოთ. ნიშადურის სპირტთან მუშაობისას ხელთათმანები ყოველთვის უნდა გამოიყენოთ.
საწმენდი საშუალების მოსამზადებლად ნიშადურის სპირტი წყალში გააზავეთ თანაბარი პროპორციით. აიღეთ ბამბა, ნიშადურის ხსნარში დაასველეთ და სახელურებს დაადეთ. რამდენიმე წუთი ასე გააჩერეთ. შემდეგ სახელურები სველი ჩვრით გაწმინდეთ. ძლიერი ჭუჭყი ჯაგრისით ან უხეში ღრუბლით გახეხეთ.
მეთოდი 3
ყველა დიასახლისმა იცის, რომ სოდა უნივერსალური საწმენდი საშუალებაა, მაგრამ ცოტამ თუ იცის, რომ სოდას შეუძლია გაწმინდოს გაზქურის სახელურები ჩამჯდარი ცხიმისგან. ძველი კბილის ჯაგრისი წყალში დაასველეთ, სოდაში ჩააწეთ და ლაქას წაუსვით. სოდა სახელურებს რამდენიმე წუთი შეაზილეთ. განსაკუთრებული ყურადღება მიაქციეთ პირაპირებს, ნაკერებს და კუთხეებს. სოდა სახელურებზე რამდენიმე წუთი გააჩერეთ, შემდეგ ისევ გახეხეთ ჯაგრისით. სოდა სუფთა წყლით მოაშორეთ.
მეთოდი 4
მდოგვის ფხვნილი – კიდევ ერთი პოპულარული საშუალება, რომელიც ცხიმის ნადებს აშორებს. გარდა იმისა, რომ შესანიშნავად წმენდს ზედაპირებს ცხიმისგან, დეზინფექციასაც ახდენს.
ზომიერი ჭუჭყის შემთხვევაში მდოგვის ხსნარი შეგიძლიათ გამოიყენოთ. 200 მლ ცხელ წყალს 1 სუფრის კოვზი მდოგვის ფხვნილი დაუმატეთ და ერთგვაროვანი ნარევის მიღებამდე აურიეთ. საშუალება გაზქურის სახელურებს წაუსვით და 10 წუთი გააჩერეთ. ბოლოს სუფთა წყლით გაწმინდეთ.
ძველი ჭუჭყის მოსაშორებლად სუფთა მდოგვის ფხვნილი შეგიძლიათ გამოიყენოთ. ეფექტის გასაძლიერებლად მდოგვს ცოტა სოდა დაუმატეთ. ფხვნილი სველ უხეშ ღრუბელს წაუსვით და ჭუჭყიანი სახელურები გაწმინდეთ. ნარევი სახელურებზე 1-3 საათი გააჩერეთ, შემდეგ წყლით გაწმინდეთ. სახელურები ახალივით იბრწყინებს.
გირჩევთ, რომ გაზქურის სახელურები საჭმლის ყოველი მომზადების შემდეგ გაწმინდოთ. ასე დიდხანს სუფთა დარჩება.
