ერთი შეხედვით, რა უნდა იყოს უფრო მარტივი, ვიდრე ბოსტნეულის მოხარშვა. განსაკუთრებით, როცა საქმე სტაფილოს ეხება: ბავშვსაც კი შეუძლია გაუმკლავდეს ამ ამოცანას. თუმცა, ადვილია ამ პროდუქტის გაფუჭებაც. ზედმეტად მოხარშული ბოსტნეული ფორმას ვერ ინარჩუნებს და უბრალოდ იშლება – პიურეს ემსგავსება. თქვენ კი, შესაძლოა, კუბებად დაჭრილი სტაფილო გჭირდებოდეთ სალათებისთვის. რა თქმა უნდა, ამ შემთხვევაში, ბოსტნეულის ხელახლა მოხარშვა მოგიწევთ. პაპარაცის დღევანდელ სტატიაში გეტყვით, როგორ უნდა მოხარშოთ სტაფილო, რათა არ დაკარგოს ფორმა და სასარგებლო მიკროელემენტები.
სტაფილოს მოხარშვის მარტივი წესები
დღეს გაგიზიარებთ რამდენიმე რჩევას სტაფილოს მოხარშვასთან დაკავშირებით. ეს ხრიკები ქალაქის ერთ-ერთი რესტორნის თანამშრომელმა გაგვანდო. აღმოჩნდა, რომ იქ ბოსტნეულს სრულიად განსხვავებულად ამზადებენ, ვიდრე ჩვენ ვართ მიჩვეული. დარწმუნებული ვართ, თქვენც გაგიკვირდებათ.
არ არის საჭირო გასუფთავება
ჩვეულებრივ, სანამ სტაფილოს მოსახარშად დავდგამთ, კანს ვაშორებთ. ეს არ უნდა გააკეთოთ. უბრალოდ, კარგად გარეცხეთ ბოსტნეული გამდინარე წყლის ქვეშ, რათა მთლიანად მოსცილდეს ჭუჭყი. გარდა ამისა, უკვე მოხარშული სტაფილოდან ზედა ფენის მოცილება კიდევ უფრო ადვილია. მიზეზი, რის გამოც ბოსტნეულის გათლა არ გჭირდებათ, საკმაოდ აშკარაა – კანის გარეშე, ვიტამინები და სხვა სასარგებლო ნაწილაკები მისგან უფრო სწრაფად გამოვა.
არ დაასხათ ცივი წყალი
რა თქმა უნდა, ყველა ასე ვაკეთებთ – ბოსტნეულს ვასხამთ ცივ წყალს და მხოლოდ ამის შემდეგ ვდებთ გაზქურაზე მოსახარშად. თუმცა, სტაფილო გაცილებით მეტ სასარგებლო ნივთიერებებს შეინარჩუნებს, თუ წყალში მაკარონის მსგავსად მოვათავსებთ. ანუ, ჯერ უკეთესია დაელოდოთ სანამ წყალი ადუღდება და მხოლოდ ამის შემდეგ მოათავსოთ ბოსტნეული ქვაბში. ეს უნდა გაკეთდეს ისე, რომ კანი, რომელიც იკავებს ვიტამინებს, მყისიერად შეიკრას და არ გამოუშვას წვენი.
არ არის საჭირო სტაფილოს დაჭრა
ეს პუნქტი გამომდინარეობს იქიდან, რაც ზემოთ დავწერეთ. თუ დაჭრილ ბოსტნეულს მოხარშავთ, მისი რბილობიდან სასარგებლო მიკროელემენტები მაშინვე გამოიდევნება. ჯობია არ დაიზაროთ და უფრო დიდი ქვაბი მოძებნოთ და სტაფილო დაჭრის გარეშე მოხარშოთ.
შეინარჩუნეთ ცეცხლის ინტენსივობა
იმისთვის, რომ სტაფილო თანაბრად მოიხარშოს, სითბოს ინტენსივობის შეცვლა არ არის საჭირო. ყველაზე ეფექტურია საშუალო დონის შენარჩუნება. ამ შემთხვევაში პროდუქტი სწრაფად მოიხარშება, მაგრამ არ ჩაიშლება. აუცილებლად დააფარეთ ტაფას თავსახური, რათა ორთქლი არ გამოვიდეს. ეს დააჩქარებს მომზადების პროცესს.
თვალყური ადევნეთ, რომ ზედმეტად არ მოხარშოთ
როგორც უკვე ვთქვით, ძალიან დიდხანს მოხარშული სტაფილო სათანადოდ არ იჭრება. გარდა ამისა, რბილობში აღარ რჩება ვიტამინები, რისთვისაც ასე ვაფასებთ ამ ბოსტნეულს. საშუალოდ, დაახლოებით 25 წუთი საკმარისია იმისათვის, რომ სტაფილო მთლიანად მოიხარშოს, მაგრამ თვისებების დაკარგვის გარეშე. თუ ბოსტნეულის ზომა საშუალოზე მცირეა, დიდი დრო არ დასჭირდება.
ეჭვგარეშეა, რომ ასეთი მცირე ნიუანსებიც კი უნდა იყოს გათვალისწინებული სტაფილოს მომზადების დროს. ახლა თქვენ უკვე იცით, როგორ მოამზადოთ სტაფილო სწორად. მისი გამეორებით მომზადება აღარ მოგიწევთ. ეს მნიშვნელოვნად დაზოგავს დროს თქვენი საყვარელი ოლივიეს სალათის ან მოხარშული სტაფილოთი სხვა კერძების მომზადებისას. უფრო მეტიც, ამ გზით თქვენ ბოსტნეულის სასარგებლო თვისებებსაც შეინარჩუნებთ.
