კოსმეტიკურ მაღაზიაში მუშაობისას შევნიშნე, რომ მაისიდან ოქტომბრამდე, ყველაზე ხშირად, მომხმარებლები დეზოდორანტების საყიდლად მოდიოდნენ. და ეს ნამდვილად ასეა, რადგან უბრალოდ შეუძლებელია ზაფხულის სიცხეს მათ გარეშე გადაურჩე! მაგრამ მყიდველებისთვის ჭარბი ოფლიანობის გარდა, სხვა პრობლემაც არსებობდა. ეს იყო დეზოდორანტის მიერ დატოვებული ლაქები ტანსაცმელზე.
ხალხი დეზოდორანტების ლაქების საწინააღმდეგო საშუალებების საყიდლად ისევე ხშირად მოდიოდა, როგორც თავად დამცავი პროდუქტის. ბევრმა მომხმარებელმა გამიზიარა თავისი პირადი საიდუმლოებები ასეთი უსიამოვნებებისგან თავის დასაღწევად. პაპარაცის დღევანდელი სტატია ამ საშუალებებს ეხება.
დეზოდორანტის ლაქები: მიზეზები
სკოლის გაკვეთილებიდან გვახსოვს, რომ ოფლი 99%-ით წყლისგან შედგება. 1%-ს შეადგენს სხვადასხვა მარილები და ორგანული ნივთიერებები, რომლებიც ანტიპერსპირანტის ინგრედიენტებთან შერევისას ყვითელ ლაქებს ტოვებენ ტანსაცმელზე.
სხვათა შორის, ოფლის უსიამოვნო სუნი ჩნდება ოფლის – ბაქტერიებთან კონტაქტის შემდეგ, ახალ ოფლს სუნი არ აქვს.
ფერად და მუქ ტანსაცმელს შესაძლოა თეთრი ლაქებიც ჰქონდეს, რომლებიც ისევე აფუჭებს განწყობას, როგორც ყვითელი. ამ ლაქების მიზეზი მარტივია – ტანსაცმელი იქამდე ჩაიცვეს, სანამ დეზოდორანტი მთლიანად არ გაშრა.
დეზოდორანტის ლაქების მოსაშორებელი საშუალებები
უპირველეს ყოვლისა, თქვენ უნდა გახსოვდეთ ლაქების მოშორების ძირითადი წესები:
- დაბინძურებული ნივთები დაუყოვნებლივ უნდა გაირეცხოს. რაც უფრო დიდხანს იქნება ქსოვილი ჭუჭყიანი, მით უფრო მეტად ჩაჯდება ლაქა.
- ტანსაცმელი თბილ წყალში უნდა ჩაალბოთ. ძალიან ცხელი წყალი გამოიწვევს ლაქების ჩაჯდომას ქსოვილის ბოჭკოებში.
- არ გამოიყენოთ ქლორის შემცველი პროდუქტები. მათ შეიძლება მოაშორონ ლაქა, მაგრამ ძალიან სწრაფად გაანადგურებენ ქსოვილის სტრუქტურას. არსებობს უფრო ნაზი საშუალებები.
- დაამუშავეთ ლაქა ნივთის უკანა მხრიდან.
მაღაზიის თაროები სავსეა ლაქების მოსაშორებელი საშუალებებით. მათ შორის შეგიძლიათ იპოვოთ საპონი, სარეცხი ფხვნილი და სითხე ლაქებისთვის. ყველაფრის ჩამოთვლა შეუძლებელია. მაგრამ ასეთი საშუალებები მხოლოდ მაშინ არის ეფექტური, როდესაც ლაქა ახალია.
ქსოვილის დაზიანების თავიდან ასაცილებლად, მიჰყევით შეფუთვაზე
არსებულ მითითებებს. როგორც წესი, საკმარისია ლაქას საპონი წაუსვათ, გააჩეროთ 15 წუთის განმავლობაში და შემდეგ ჩვეულებრივად გარეცხოთ.
თუ ლაქა ძველია, მაშინ უნდა მიმართოთ ხალხურ საშუალებებს.
სოდა
შეურიეთ 4 ს.კ. სოდა და 2 ს.კ. წყალი. წაუსვით ეს ხსნარი ლაქას ღრუბლის ან ძველი კბილის ჯაგრისის გამოყენებით. დაელოდეთ სანამ სოდა გაშრება, მოაშორეთ ნარჩენები და გარეცხეთ ნივთი.
არაყი, სპირტი
არაყი ნამდვილი დამხმარეა. დეზოდორანტის ლაქები ასევე მგრძნობიარეა მის მიმართ.
დაასხით არაყი ლაქაზე ან გაწმინდეთ სპირტში დასველებული ბამბის დისკოთი. სპირტი ჯერ წყლით უნდა განზავდეს. ლაქა რამდენიმე წუთში მოშორდება.
თუ შედეგით არ ხართ კმაყოფილი, მაშინ ხელსახოცი არყით უნდა დაასველოთ, დააფაროთ პოლიეთილენის პარკი და ზედ რაიმე დაადოთ. 1-2 საათში
ანტიპერსპირანტის კვალი გაქრება.
მარილი
სუფრის მარილი დაგეხმარებათ გაუმკლავდეთ როგორც თეთრ, ასევე ყვითელ ლაქებს. აიღეთ რამდენიმე სუფრის კოვზი მარილი და დაამზადეთ პასტის მსგავსი მასა წყლის გამოყენებით. ნაზად წაუსვით ხსნარი ტანსაცმელს და დაელოდეთ რამდენიმე წუთს. მოაშორეთ დარჩენილი მარილი და გარეცხეთ ნივთი ჩვეულებრივად.
ძმარი ან ლიმონის წვენი
მჟავა ხელს შეუწყობს ლაქების მოცილებას დელიკატურ ქსოვილებზე, როგორიცაა აბრეშუმი და მატყლი. დაასველეთ ლაქა ძმრით ან ლიმონის წვენით და დაელოდეთ სანამ ქსოვილი გასუფთავდება. როგორც წესი, ამისთვის საკმარისია 15 წუთი.
გამოიყენეთ ეს მეთოდი მხოლოდ ფერად ქსოვილებზე, რადგან თეთრი ქსოვილი შეიძლება გაყვითლდეს ძმართან შეხებისას.
ნიშადურის სპირტი
შეურიეთ ნიშადურის სპირტი და წყალი თანაბარი პროპორციით. დაასველეთ ლაქა ხსნარით, გააჩერეთ 3 წუთის განმავლობაში და კარგად გარეცხეთ სუფთა წყლით.
წინასწარ შეამოწმეთ ხსნარი ფერად ან შავ ნივთებზე. ნიშადურის სპირტთან მუშაობისას არ დაიხაროთ პირდაპირ მასზე და არ ისუნთქოთ.
ჭურჭლის სარეცხი სითხე
ჩვეულებრივი ჭურჭლის სარეცხი სითხე დაგეხმარებათ ანტიპერსპირანტის ლაქების მოცილებაში. წაუსვით ჭურჭლის სარეცხი სითხე ლაქას და ოდნავ დაამუშავეთ ღრუბლით. ერთი საათის შემდეგ გარეცხეთ ტანსაცმელი თბილ წყალში.
თეთრ ქსოვილებზე უმჯობესია გამოიყენოთ გამჭვირვალე ჭურჭლის სარეცხი საშუალებები.
აცეტილსალიცილის მჟავა (ასპირინი)
დანაყეთ ასპირინის რამდენიმე ტაბლეტი და შეურიეთ წყალს, პასტის მსგავსი მასის მისაღებად. წაუსვით პროდუქტი ლაქას რბილი ჯაგრისით და გააჩერეთ 2 საათის განმავლობაში. შემდეგ გარეცხეთ ნივთი.
თუ საქმე ძველ ლაქასთან გაქვთ, მაშინ რეცხვის დროს შეგიძლიათ დამატებით დაამუშაოთ იგი საყოფაცხოვრებო საპნით.
წყალბადის ზეჟანგი
წყალბადის პეროქსიდით ლაქების მოსაშორებლად, უბრალოდ წაუსვით ის ქსოვილს და დაელოდეთ რამდენიმე საათს. ამის შემდეგ ნივთი უნდა გაირეცხოს.
ღია ფერის ქსოვილებზე ძველი ლაქებისთვის შესაფერისია წყალბადის პეროქსიდის ხსნარი. მის მოსამზადებლად შეურიეთ 4 ს.კ. საცხობი სოდა და წყალბადის ზეჟანგი, დაამატეთ 1 ჩ/კ ჭურჭლის სარეცხი საშუალება. წაუსვით ნარევი ლაქას, გააჩერეთ რამდენიმე საათით და გარეცხეთ.
არ დაგავიწყდეთ, რომ ქიმიური ანტიპერსპირანტები ხელს უშლის ოფლის გამოყოფას, რაც შეიძლება საზიანო იყოს თქვენი ჯანმრთელობისთვის. სცადეთ გააკეთოთ ბუნებრივი დეზოდორანტი, რომელიც თქვენთვის უსაფრთხო იქნება. იზრუნეთ თქვენს ჯანმრთელობაზე, ჩვენ კი დაგეხმარებით ამაში.
