რა უნდა გააკეთოთ, თუ ქმარს ცუდი ხელფასი აქვს და ცოლის კისერზე ცხოვრობს? პირველ რიგში, უნდა გაარკვიოთ, ასეა თუ არა სინამდვილეში. ფინანსური საკითხები საკმაოდ ფარდობითია. მეორეც, ცოლ–ქმარმა ეს საკითხი გულწრფელად უნდა განიხილოს. გააკეთებს თუ არა ამას დღევანდელი ისტორიის გმირი, Paparazzi–ის სტატიაში წაიკითხეთ.
ცუდი ხელფასი – „ჩემს ქმარს ყოველთვის ჩემზე დაბალი ხელფასი ჰქონდა, მაგრამ დავქორწინდი არა სავსე საფულეზე, არამედ საყვარელ ადამიანზე. ეს საკითხი არასდროს მაღელვებდა. ნათესავები ბინით დაგვეხმარნენ, ამიტომ მაშინვე საკუთარ ბინაში ცხოვრება დავიწყეთ. რამდენიმე წელში დავფეხმძიმდი და გოგონა გავაჩინე. სოსო ცვლაში მუშაობს: 2 დღე 12 საათი, შემდეგ 2 დღე ისვენებს. მე ტრადიციულად კვირაში 5 დღე ვმუშაობ. საათების რაოდენობით სოსოს არ ჩამოვრჩები. ზოგჯერ ოფისში გვიანობამდე დარჩენა მიწევს, რადგან ძალიან საპასუხისმგებლო საქმე მაქვს. უფროსებთან კარგად ვარ.
საოჯახო საქმეებისთვის დრო უბრალოდ არ მრჩება. ეს ყველაფერი არ მომწონს. პირდაპირ გეტყვით: ამის გაკეთება მძულს. მთელი ეს რეცხვა, დალაგება და კერძების მომზადება ნამდვილი კოშმარია. ყველაფერს ჩემი მეუღლე აკეთებს. უნდა ითქვას, რომ კარგად გამოდის. ზედმეტად გაწონასწორებული და თანმიმდევრულია. ბავშვის გაჩენისთანავე მეუღლემ პასუხისმგებლობის დიდი ნაწილი საკუთარ თავზე აიღო. პირველ რიგში, მისი წყალობით მაიას დაბადებიდან 5 თვის შემდეგ სამსახურში გასვლა შევძელი. მეორეც, სოსო ქალიშვილთან დიდ დროს ატარებს. კვებავს, აძინებს და თოჯინებით ეთამაშება. მაიასთვის სოსო არა მხოლოდ მამა, არამედ საუკეთესო მეგობარია. ეს მახარებს, რადგან მეგობრებისგან სულ სხვა ისტორიები მესმის. მათ ოჯახებში ყველაფერი სხვაგვარად არის: მამები მთელი დღე სამსახურში იკარგებიან და შვილებთან დროს თითქმის არ ატარებენ. ცოლები კი ყოფით პრობლემებზე მარტო ზრუნავენ.
რა არის ოჯახური პრობლემის არსი – და მაინც, ქმრის დაბალი ხელფასი მოსვენებას არ მაძლევს. ადრე ამას დიდ ყურადღებას არ ვაქცევდი. ორივე ოჯახის ბიუჯეტს ვავსებდით. სოსო საკუთარ თავს დიდად არ ანებივრებს. ფულს უფრო ქალიშვილზე ხარჯავს, ვიდრე საკუთარ თავზე. ახლახანს ფოტოაპარატის ყიდვა მთხოვა. თან არა უბრალო, არამედ პროფესიონალის.
აღმოჩნდა, რომ დიდი ხანია ხალხისთვის ფოტოების გადაღებაზე ოცნებობს. თითქოს, თუ ყველაფერს ისწავლის, ამით ფულის შოვნას შეძლებს. არა, მისი მესმის. ამბიციები როგორღაც უნდა დაკმაყოფილდეს. მაგრამ, რატომ უნდა ვუყიდო მეუღლეს ასეთი ძვირადღირებული სათამაშო, როცა სესხი ბოლომდე არ დაგვიფარავს? რა მოხდება, თუ არაფერი გამოუვა? ფულის უაზროდ დახარჯვა არ მსურს! რამდენიმე ასიანზე ხომ არ ვსაუბრობთ. არ ვიცი, როგორ დაველაპარაკო ისე, რომ არ ეწყინოს. მეტ ფულს რომ შოულობდეს, ფულის მათხოვრობა არ მოუწევდა. ნუთუ ვინმეს ქმარი ამას აკეთებს?“
ცოლი თვლის, რომ მისი ქმარი ცოტას გამოიმუშავებს. მართლაც, ცოლზე ნაკლებს მუშაობს, მაგრამ ამ დროს ბევრ სხვადასხვა ამოცანას ასრულებს. შეგახსენებთ, რომ საოჯახო საქმის შესრულება და ბავშვის აღზრდა მარტივი არაა. არ ღირს იმის გაუფასურება, რასაც სოსო აკეთებს. როგორც ჩანს, ქალს ქმრის პოტენციური წარმატების არ სჯერა. სოსოს ახალ საქმეში საკუთარი თავის გამოცდა სურს, ცოლს დახმარებას სთხოვს. ის კი მხოლოდ ფულზე ფიქრობს იმის ნაცვლად, რომ საყვარელს მხარი დაუჭიროს და მის ნამდვილ ინტერესებზე მეტი გაიგოს. ამ სიტუაციაში სოსოს მხარეს ვართ.
