წელს ზამთარი ძალიან ცივი არაა. თოვლის და ძლიერი ყინვის გარეშეც საახალწლო და საშობაო დღესასწაულებს ერთად აღვნიშნავთ და ვხარობთ. კათოლიკე მორწმუნეებმა შობის დღესასწაული უკვე აღნიშნეს. ჩვენ კი ამ მნიშვნელოვან დღესასწაულს 7 იანვარს აღვნიშნავთ. მანამდე კი შობის წინადღეა. შობის წინადღეც მნიშვნელოვანი თარიღია, რომელიც 6 იანვარს აღინიშნება. ამ დღეს მორწმუნეები მარხვას იცავენ, ამიტომ მოკრძალებულად უნდა შეხვდეთ. Paparazzi გიამბობთ, როგორ გაატაროთ 6 იანვარი სწორად და რისი გაკეთებაა აკრძალული.
როგორ შევხვდეთ 6 იანვარს სწორად – 6 იანვარს წმინდა საღამოსაც უწოდებენ. ბიბლიის მიხედვით, ამ საღამოს ცაზე გამოჩნდა ბეთლემის ვარსკვლავი, რომელიც პატარა იესოს დაბადების ნიშანი გახდა. ეს მნიშვნელოვანი ნიშანია, რადგან დღესაც ოჯახი ცაზე პირველი ვარსკვლავის გამოჩენის შემდეგ ჯდება სუფრაზე და ვახშმობას იწყებს. ადრე მორწმუნეები პირველი ვარსკვლავის გამოჩენამდე არაფერს ჭამდნენ. ახლა ეს წესი ნაკლებად გავრცელებულია, მაგრამ ათობით სამარხვო კერძის მომზადების ტრადიცია დაცულია. სუფრაზე საშობაო ღვეზელი აუცილებლად უნდა იყოს. საშობაო სუფრის კერძები კუთხეების მიხედვით განსხვავდება. სუფრის მშვენებაა წანდილი. ჩვეულებრივ, ხორბლისგან მზადდება, მაგრამ ბრინჯითაც გვხვდება. წანდილს უმატებენ ყაყაჩოს თესლს, თაფლს, ნიგოზს, ქიშმიშს. თუ სურვილი გაქვთ, შეგიძლიათ დაუმატოთ გარგარის ჩირი, შავქლიავი, შოკოლადი ან ჰალვა.
სასარგებლო რჩევები – 6 იანვარს, შობის წინადღეს არ ღირს სახლის დალაგება, რეცხვა, კერვა და სხვა საქმეების გაკეთება. ეს ყველაფერი სხვა დროისთვის გადადეთ. ამავდროულად, კერძების მომზადება დაშვებულია. საღამო ოჯახის წევრებთან ერთად გაატარეთ. ოჯახის წევრები 12 სადღესასწაულო კერძის მომზადების პროცესში ჩართეთ. ასე სასიამოვნოს და სასარგებლოს ერთმანეთს შეუთავსებთ. თუ მოახერხებთ, ეკლესიაში წადით და ილოცეთ, გაჭირვებულებს დაეხმარეთ. თუ ვერ ახერხებთ, ლოცვა სახლში წაიკითხეთ. 6 იანვარს გარდაცვლილების სულის სიმშვიდისთვის უნდა ილოცოთ.
საინტერესო ტრადიციები – დღემდე ყველა ტრადიცია შემორჩენილი არაა, მაგრამ მათი გაცნობა საინტერესოა. პირველი ვარსკვლავის ამოსვლის შემდეგ სუფრას შეგიძლიათ მიუსხდეთ და ივახშმოთ. სუფრაზე ჯერ ოჯახის უფროსი, მამა უნდა დაჯდეს, შემდეგ სხვები. მომავალი წლის მოსავლის გასაგებად ოჯახის უფროსი წანდილით სავსე კოვზს ჭერისკენ ისროდა. თუ ჭერზე ბევრი მარცვალი დარჩებოდა, ეს უხვი მოსავლის ნიშანი იყო. თუ ცოტა, მაშინ მთელი შრომა წყალში ჩაეყრებოდათ. სუფრაზე სანთელი აანთეთ და ცარიელი თეფში მოამზადეთ. ეს გარდაცვლილი ნათესავებისთვის კეთდება. ცარიელი თეფში მთავარ სუფრაზე ან სხვა ადგილას, მაგალითად, ფანჯრის რაფაზე დადეთ. თუ გსურთ, თეფშზე წანდილი დაყარეთ.
6 იანვარს იწყება წმინდა პერიოდი, რომელიც 19 იანვრამდე, ნათლისღებამდე გრძელდება. ამ დღეებში ერთმანეთის მხარდაჭერა ძალიან მნიშვნელოვანია. ნებისმიერი კამათი, გინება, შური და ცუდი ფიქრები აკრძალულია. კამათის შემთხვევაში მალევე შერიგება სცადეთ. ამ საღამოს მკითხაობა ადრე მიღებული იყო, მაგრამ სასულიერო პირები ასეთ გართობას არ იწონებენ. სულიერ სიმშვიდეს და სიკეთეს გისურვებთ.
