ამბობენ, რომ ზვიგენები შავ ზღვაში არ შედიან. ადგილობრივი ტურისტებისთვის საშიში არაფერია, რადგან უზარმაზარ მტაცებელთან შეხვედრის ალბათობა მინიმალურია. რატომ გაურბიან ზვიგენები შავი ზღვის წყლებს ისე, რომ მათ აქ ვერავინ ხედავს?
ზვიგენი შავ ზღვაში – „რატომ არ ცურავს ზვიგენი შავ ზღვაში?“ თუ სოციალურ ქსელში ამ კითხვის ქვეშ კომენტარებს წაიკითხავთ, ბევრ საინტერესო პასუხს იპოვით. ზოგი წერს, რომ შავი ზღვა ზვიგენისთვის ზედმეტად „შავია“ და მასში ვერაფერს ხედავს. სხვა ამტკიცებს, რომ თურქები ზვიგენებს ბოსფორში უფასოდ არ უშვებენ. მესამე ხუმრობს, რომ ხმელთაშუა ზღვაში ტურისტები უფრო გემრიელია.
მეცნიერებს საკუთარი ვარიანტები აქვთ. ერთ–ერთი საყოველთაოდ მიღებული განმარტების მიხედვით, შავ ზღვაში წყალი გაცილებით ცივია, ვიდრე ხმელთაშუა ზღვაში, ამიტომ ზვიგენი მისთვის უფრო კომფორტული გარემოს დატოვებას არ ჩქარობს. შემდეგი მიზეზი ისაა, რომ ბოსფორში სხვადასხვა გემის ინტენსიური მოძრაობა ბევრ ხმაურს ქმნის. ეს ზვიგენს არ მოსწონს. თან გემი აფრთხობს პოტენციურ ნადავლს, რომლითაც ზვიგენი იკვებება. მკვლევარები ამბობენ, რომ შავი ზღვა ცოცხალი არსებების თვალსაზრისით შედარებით ღარიბია. აქ გაუმაძღარი ზვიგენი თავს ვერ ირჩენს. საინტერესოა, რომ აზოვის ზღვაში უკეთესი საკვებია, მაგრამ ზამთარში რეგულარულად იყინება.
სხვა მიზეზები – კიდევ ერთი მიზეზი, რატომ გაურბის ზვიგენი შავ ზღვას, არასაკმარისი მარილიანობაა. მაგალითად, ხმელთაშუა ზღვის მარილიანობა 38 პრომილეა, რაც მსოფლიო ოკეანეების საშუალო მარილიანობაზე (33-დან 36-მდე მერყეობს) ოდნავ მეტია. აი, შავ ზღვაში წყლის მარილიანობა მხოლოდ 18 პრომილეა. დიდი სხვაობაა. და ბოლოს, მიზეზი, რომელსაც ბევრი მთავარს უწოდებს. საქმე იმაშია, რომ აქაური წყალი ბევრ გოგირდწყალბადს შეიცავს. ეს შავი ზღვის თავისებურებაა, რომლის გამოც აქ ზვიგენი (ბევრი სხვა ცოცხალი არსებაც) უბრალოდ ვერ გადარჩება.
შავ ზღვაში ზოგიერთი სახეობის ზვიგენი მაინც გვხვდება. მაგალითად, შავი ზღვის კატრანი, ზღვის ხრტილიანი თევზი კატრანის ზვიგენების ოჯახიდან. ასევე კატისებრი ზვიგენი. ეს სახეობა შავ ზღვაში შემთხვევით, სტუმრის სახით შეიძლება შეგხვდეთ. ადგილობრივი პირობები ამ ზვიგენის ნორმალური ცხოვრებისა და გამრავლებისთვის შეუფერებელია.
მეცნიერები ირწმუნებიან, რომ საუკუნეების მანძილზე შავი ზღვის სანაპიროზე ზვიგენის ადამიანზე თავდასხმის ერთი შემთხვევაც არ ყოფილა. ამავდროულად, მკვლევარები იმედგაცრუებულნი არიან, ზვიგენებს შავ ზღვაში სრულფასოვნად ცხოვრება არ შეუძლიათ. ბოლო წლებში ამ მტაცებლების ბევრი სახეობა გადარჩენის ზღვარზეა. ახალ ადგილებში მათი გამოჩენა სიტუაციის გაუმჯობესების იმედს მისცემდათ.
