პირველად ღუმელში გამომცხვარი ხახვი ჩემს მეგობარ თათასთან სტუმრობისას გავსინჯე. ის მშვენიერი დიასახლისია და უყვარს ექსპერიმენტების ჩატარება სხვადასხვა პროდუქტებსა და სანელებლებზე. ამიტომ, ყველა დარწმუნებულია, რომ თათა აუცილებლად გაუმასპინძლდება მის მიერ მომზადებული რაიმე უჩვეულო დელიკატესით. ამჯერად, მთავარი კერძი იყო ხახვი.
სტუმრები სუფრასთან ისხდნენ სიურპრიზის მოლოდინში, როდესაც ახალგაზრდა დიასახლისი სამზარეულოდან გამოვიდა და ხელში მართკუთხა ჭურჭელი ეჭირა. მან იდუმალებით გაიღიმა და მაგიდაზე თავისი ნახელავი დადო, რომლის სურნელმა და ხილვამ ყველას მადა აღუძრა. ვერც კი წარმოვიდგენდი, რომ ჩვეულებრივი ხახვისგან ასეთი ლამაზი კერძი გამოვიდოდა!
ღუმელში გამომცხვარი ხახვი
ჩემს მეგობარს ძალიან უყვარს ეს ბოსტნეული ნებისმიერი ფორმით და მისგან მრავალფეროვან კერძებს ამზადებს. მაგალითად, დამარინადებულ ხახვს, შემწვარ ხახვს, ღვეზელებს ხახვის შიგთავსით, ხახვის წვნიანს. ღუმელში გამომცხვარი ხახვი კი – ჩვენთვის სიახლეს წარმოადგენდა.
ეს გასაკვირი არ არის, მას საბავშვო ბაღშიც კი ხახვს ატანდნენ, რადგან ის საჭმელს ხახვის გარეშე არ მიირთმევდა. ღუმელში გამომცხვარი ხახვი – ორიგინალური ხემსია, რომელიც სადღესასწაულო სუფრას ძალიან უხდებოდა. ამიტომ ჩემს მეგობარს რეცეპტი ვთხოვე და მან ყველაფერი დეტალურად ამიხსნა. ვინც დაინტერესდით, ჩაინიშნეთ.
ინგრედიენტები
- 7 ცალი საშუალო ხახვი;
- 1 ს.კ ბალზამიკოს ძმარი;
- 1 ს.კ სოიოს სოუსი;
- 2 ჩ.კ მსხვილი მარილი;
- 2 ჩ.კ შაქარი;
- 1 ჩ.კ ხმელი ნიორი;
- 2 ჩ.კ დაფქული პაპრიკა;
- 1 ჩ.კ არომატული ბალახების ნარევები;
- 0,5 ჭიქა რაფინირებული მზესუმზირის ზეთი;
- 0,5 შეკვრა კარაქი;
- 2 დიდი თავი ნიორი;
- დაფქული შავი პილპილი გემოვნებით.
მომზადების წესი
1. გაფცქვენით ხახვი და დანით ოთხ ნაჭერად დაჭერით. აიღეთ შუშის, კერამიკული ან ემალირებული ჭურჭელი და მომზადებული ხახვი მასში გადაიტანეთ.
2. მოაყარეთ მარილი, პაპრიკა, წიწაკა, ნივრის ფხვნილი და თქვენი საყვარელი არომატული მწვანილი. ხახვს დაუმატეთ სოიოს სოუსი და ბალზამიკოს ძმარი. დაასხით მზესუმზირის ზეთი და კარგად აურიეთ.
3. ჭურჭელს თავსახური მჭიროდ დააფარეთ ან საკვების ფირი გადააკარით და შედგით მაცივარში, რათა დამარინადდეს მთელი ღამის განმავლობაში. დამარინადებული ხახვი მაცივრიდან უნდა გამოვიღოთ და ისევ ავურიოთ.
4. აირჩიეთ ლამაზი კერამიკული ან ცეცხლგამძლე მინის საცხობი ფორმა და შიგნიდან მზესუმზირის ზეთი წაუსვით. ხახვი ფორმაში გადაიტანეთ. ნივრის მთლიანი თავები შუაზე გაჭერით და ზემოდან ლამაზად დაალაგეთ.
5. ხახვსა და ნიორს აკურატულად მოაყარეთ შაქარი, რათა ყველაფერი თანაბრად დაიფაროს და მადისაღმძვრელად შეიბრაწოს. შევდგათ ღუმელში, რომელიც წინასწარ უნდა იყოს გახურებული 180 გრადუსამდე და გამოვაცხოთ 45 წუთის განმავლობაში. 45 წუთის შემდეგ ფორმა ღუმლიდან გამოვიღოთ, ხახვის ზემოდან ნაჭრებად დაჭრილი კარაქი დავალაგოთ და ვაცხოთ კერძი კიდევ 20 წუთის განმავლობაში. მზადაა!
ღუმელში გამომცხვარი ხახვი: რჩევა
მზა ხემსი მაგიდასთან მიაქვთ ცხლად, ზუსტად იმ კერამიკულ ფორმაში, რომელშიც გამოცხვა. თუ თავისუფალი დრო არ გაქვთ, შეგიძლიათ ხახვი დასამარინადებლად რამდენიმე საათით გააჩეროთ, ან უბრალოდ გამოტოვოთ ეს ეტაპი. ღუმელში გამომცხვარი ხახვი დამარინადების გარეშეც ძალიან გემრიელი გამოდის.
ადრე ხახვს ტაფაში ვწვავდი მცენარეულ ზეთში ან ერბოში. მე მხოლოდ ცოტა მარილს და დაფქულ შავ პილპილს ვამატებდი. მე ძალიან მომწონს ეს კერძი, მაგრამ, ჩემი აზრით, სტუმრებს ასეთი არ უნდა მივართვათ: ძალიან უბრალოდ გამოიყურება.
სულ სხვა რამ არის ღუმელში გამომცხვარი ხახვი. კერამიკულ ფორმაში ის ლამაზად გამოიყურება და არ შეგრცხვება სადღესასწაულო სუფრაზე დადების!
