ბრძენ ქალს ლამაზი სიტყვები არა მხოლოდ დაბადების დღეზე და 8 მარტს უნდა უთხრა. ჭკვიან ადამიანს უმიზეზოდაც შეგიძლიათ მორალურად მხარი დაუჭიროთ. რატომ? დაფიქრდით: ჭკვიანი ქალი უმიზეზოდ დრამებს არ აწყობს, ცდილობს, რომ მამაკაცის მენტალური ჯანმრთელობა არ დაზიანდეს, ახალ და ახალ მიღწევებს შთააგონებს. ასეთი ქალი ხელიდან არ უნდა გაუშვა.
რა თქმა უნდა, უსიყვარულოდ სამყარო რუხი და პირქუში იქნებოდა. სიყვარული ჰაერივით გვჭირდება. თუმცა ხშირად სიყვარული რაღაც სხვაში იზრდება და აქედან მოდის უბედურება. განქორწინება, დაპირისპირება ქონების გაყოფის გამო, ნერვები, ცრემლები, ადვოკატები. ბრძენი ხალხი ასე არ იქცევა. ცდილობს, ცხოვრება მაქსიმალურად კომფორტული და სულიერად სტაბილური გახადოს. რა საჭიროა ფუჭი წყენა და კამათი, თუ შეგიძლია სახლში უამინდობის გადასვლას დაელოდო?
ლამაზი სიტყვები ჭკვიანი ქალისთვის
მეუღლეს ვაფასებ მისი ზუსტად 3 მნიშვნელოვანი თვისების გამო. არც მეტი, არც ნაკლები. პირველ რიგში, მისი ქარიზმით აღტაცებული ვარ. არა სილამაზის გამო, ნამდვილად არა. გახსოვთ ძველი ფილმები ჩელენტანოს მონაწილეობით? აი, ჩემს მეუღლეს ზუსტად იმავე დონის ხიბლი აქვს. ძალიან სიმპათიური არაა, მელოტი, სპორტი არასდროს იტაცებდა. მისი თავდაჯერებულობა თვალებში, ჯიუტად ამობურცული ქვედა ტუჩი და სხეულის ენა ის მომენტებია, რომლებიც ბევრ ქალს და ახალგაზრდა გოგოს უბრალოდ აგიჟებს. იცის, როგორ უთხრას ლამაზი სიტყვები ჭკვიან ქალს. ვფიქრობ, გესმით, რაზე ვსაუბრობ.
მეორე თვისება, რომელიც გულში ჩამრჩა, ნებისმიერი სიახლის მშვიდად მიღების უნარია. იქნება ეს პრობლემები სამსახურში, რომელსაც არასდროს მიზიარებს და ამისთვის მადლობელი ვარ, თუ ყოფითი წვრილმანები, მნიშვნელობა არ აქვს. ჩემი მეუღლე ნებისმიერ შემთხვევაში ცივსისხლიანი რჩება. ვიცი, რომ თუ რამეს არასწორად გავაკეთებ, მისი მხრიდან სკანდალი და ისტერიკა არ მოჰყვება. ეს ძალიან კომფორტულია. იქნებ, ამიტომაც არ მაქვს მიმიკური ნაოჭები, თუმცა უკვე 19 წლის არ ვარ?!
მესამე, ყველაზე მთავარი თვისება. არ ვითვალმაქცებ და პირდაპირ ვიტყვი, ფულია. რა გეგონათ, მოვიტყუებდი და მოვყვებოდი ცოლ–ქმრული ცხოვრების გულისამაჩუყებელ ამბავს? არა, ჩვენს რთულ დროში ფინანსური სტაბილურობა სინათლის სხივია, რომელიც გვაბედნიერებს. ტყუილი საჭირო არაა, ყველას სურს კომფორტულად და კარგად მოწყობა. ქმარი საჭირო თანხას ზედმეტი სიტყვების გარეშე მაძლევს. აი, ასე.
არ იფიქროთ, რომ ჩემი ცხოვრება მხოლოდ სიამოვნებისგან შედგება. როგორც ყველას, ჩემი ყოველდღიურობა ზოგჯერ სავსეა დარდით, აპათიით და სევდიანი ფიქრებით. ხანდახან ვფიქრობ, როგორ განვითარდებოდა ჩემი ცხოვრება სულ სხვანაირი რომ ყოფილიყო. ისეთი, როგორც ბავშვობიდან გვასწავლიან. სიყვარულით გათხოვება, მეორე ნახევართან ერთად ყველაფრის მიღწევა, სირთულეების გადალახვა, საკუთარი ბინისთვის ფულის დაგროვება, ღმერთმა იცის, რა ასაკში, მანამდე მეზობელ სუპერმარკეტში პროდუქტებით რჩენა. ნაცნობია? ჩემთვისაც. მაგრამ თითქმის აღარ მახსოვს.
გათხოვებამდე ვცხოვრობდი ერთ კაცთან, უფრო ბიჭთან. ახალგაზრდა, შეყვარებული და უფულო იყო. როგორც მე. უნივერსიტეტის დამთავრების შემდეგ ქალაქის გარეუბანში ერთოთახიან ბინას ვქირაობდით და დიდ პერსპექტივებზე ვოცნებობდით. შეყვარებულმა რაღაც საწარმოში მუშაობა დაიწყო და იქ კარიერულ კიბეზე ასვლაც შეძლო. რაღაც მოადგილე გახდა. დიდად ვერ ვერკვევი.
თავად ბედმა საოფისე ქაღალდის მწარმოებელ პატარა კომპანიაში მიმიყვანა. იმ კომპანიის მფლობელი ჩემი მომავალი მეუღლე იყო. ერთხელ დერეფანში შემთხვევით შევხვდით, ერთმანეთს გავუღიმეთ, ყავაზე დამპატიჟა. შემდეგ მოყოლას აზრი არ აქვს, თავადაც ხვდებით ყველაფერს. რა თქმა უნდა, ჩემს ყოფილზე ცოტა ვნანობ. თავის გასამართლებლად ვიტყვი, რომ ყოფილთან დაშორებამდე შიოსთან სერიოზული ურთიერთობა არ დამიწყია. ამ მხრივ, გულწრფელი მინდა ვიყო.
შიომ ცოლ–შვილი მიატოვა. რა თქმა უნდა, მისმა ცოლმა დიდი სკანდალი მოაწყო, შიოს ემუქრებოდა, ღამით ურეკავდა. ვხედავდი, როგორ ბრაზობდა. შედეგად, განქორწინების პროცესში მისი ბოროტი და ძვირიანი ადვოკატები ჩართო. ასე ყოფილმა ცოლმა მისი ქონების მხოლოდ 20% მიიღო. მხოლოდ იმიტომ, რომ ყველაფრის მშვიდობიანად მოგვარება არ ისურვა. სიტყვაზე, ესეც ძალიან კარგი ფულია, ჩემი ქმრის დემონიზირება არ ღირს.
თუმცა ხშირად თაფლის კასრში კუპრიც ცურავს, ეს უდავოდ. იმის მიუხედავად, რომ მომდევნო 5 წლის განმავლობაში სამი ბავშვი გავუჩინე, კარგად ვიცოდი და მესმოდა, რომ მღალატობდა და არა ერთ ქალთან. მე, უბრალო ქალისგან განსხვავებით, არაფერი გამიკეთებია, რითაც მთლიანობაში კმაყოფილი ვარ. ჩემი შვილები დანაყრებული და ჩაცმული არიან. ბევრ ქვეყანაში უკვე ნამყოფი არიან, რაც მათ წლებში არც ვიცოდი. თავს კარგად გრძნობენ, როგორც მათი დედა.
ქორწინების დროს ორჯერ გავიგე, რომ ჩემი ქმარი სხვა ქალისგან მამა გახდა. თავიდან უსიამოვნო და საშინელიც იყო. მქონდა სერიოზული საუბარი, მაგრამ შიო მარწმუნებდა, რომ ეს მხოლოდ შემთხვევა იყო. საჩუქრებით ამავსო და დამპირდა, რომ ოჯახიდან არასდროს წავა. „ხორცი სუსტია, მაგრამ ჩვენი კავშირი ყველაზე ძლიერია“. ახლა ესეც არ მაშინებს. მეორედ, როცა მორიგმა „დაზარალებულმა“ დაგვირეკა, პირადად ვესაუბრე ტელეფონით და ფინანსურ ანაზღაურებაზე შევთანხმდით. ჯერ ფასის დაკლება მინდოდა, მესმოდა, რა სტრესი იყო ეს ქალისთვის. მოგვიანებით, პირიქით, მეტი შევთავაზე. ეს არაფერს დაგვაკლებს, ხოლო ზედმეტი ცოდვის აკიდება არ მინდა.
ამ დღეებში შიოს ყოფილ ცოლს შევხვდი. ბავშვთან და ვიღაც კაცთან ერთად იყო. კაფეში ისხდნენ, იცინოდნენ, ქუჩაში ჭამდნენ, მზიანი დღით ტკბებოდნენ. ცოტა ხნით დავაკვირდი. ტიპური ოჯახია, პრობლემების გარეშე და ყველაფრით კმაყოფილი. რაღაც მომენტში ქალმა დამინახა, მაგრამ არ მომესალმა. ამის ნაცვლად ზურგი მაქცია, სქელი შავი თმა მაჩვენა და მამაკაცთან საუბარი გააგრძელა. თითქოს ვერც შემამჩნია.
როგორც ჩანს, საშუალო კლასის ცხოვრება მისთვის სასარგებლოც აღმოჩნდა. როგორც მინიმუმ, ვერ იტყვი, რომ რამეს ნანობს. ეს ნამდვილად მახარებს. ვფიქრობ, წარსული ცხოვრება მისთვის შესაფერისი არ იყო ბევრი მიზეზით. უმრავლესობა ასეა. ჩემი გზა გავაგრძელე. შოპინგი და ვარჯიში ბევრ დროს და ძალას მოითხოვს. ახლა ყოველი მეორე ახალგაზრდა იტყვის, რომ გამიმართლა და მეუღლეს ძალიან ვუყვარვარ. მაგრამ შეძლებენ იყვნენ ისეთი გონიერი ჩემს ასაკში, როგორც მე, რომ ქორწინებაში სწორი გადაწყვეტილება მიიღონ და ნებისმიერ შემთხვევაში სიმშვიდე შეინარჩუნონ? პირადად, ძალიან მეეჭვება.
