ხერხემლის კისრის მონაკვეთი საყრდენ-მამოძრავებელი სისტემის ერთ-ერთი ყველაზე მოძრავი და დაუცველი მონაკვეთია, რომელიც ასაკობრივ ცვლილებებს ერთ-ერთი პირველი ექვემდებარება. სწორედ ასე იწყება მოძრაობის პრობლემები და ტკივილი. ექიმ სერგეი ბუბნოვსკის მიერ შემუშავებული სავარჯიშოების კომპლექსი მილიონობით ადამიანს შვებას მოგვრის, რადგან იგი დიდ დროს არ წაიღებს, სავარჯიშოების ეფექტურობა კი პრაქტიკითაა დამტკიცებული.

ჩვენი რედაქცია გასწავლით საშუალებას, რომელიც კისრის ტკივილებს მოგიხსნით და ლოკალურ კუნთებს გაგიძლიერებთ. 7 მარტივი სავარჯიშო ამ ყველაფერში დაგეხმარებათ.

სავარჯიშოები კისრის ტკივილის დროს

ამ მარტივ და ეფექტურ სავარჯიშოებს სრულყოფილად შეასრულებთ სულ რაღაც ერთი-ორი ცდის შემდეგ, ნებისმიერ ასაკში. შეგიძლიათ, ისინი ყოველდღიური სავარჯიშოების კომპლექსშიც ჩართოთ. დაწყებამდე მსუბუქად გაახურეთ მთელი სხეული ან მხოლოდ კისრის მონაკვეთი – ეს სავარჯიშოები დაგეხმარებათ სისხლისა და ლიმფის მიმოქცევის გაუმჯობესებაში, გააქრობს კუნთების სპაზმს.

თუ ადგომისას თავბრუ გესხმით და თავს არაკომფორტულად გრძნობთ, შეასრულეთ სავარჯიშოები ჯდომისას. თუ ვარჯიშისას ტკივილი ან დისკომფორტი გაძლიერდება, შეწყვიტეთ ვარჯიში და მიმართეთ ექიმს. მნიშვნელოვანია სუნთქვითი რიტმიც: სავარჯიშოს შესრულებისას ჩაისუნთქეთ, ამოსუნთქვისას კი დაუბრუნდით საწყის მდგომარეობას.

1. “მეტრონომი”

გაასწორეთ ზურგი და ნელა დახარეთ თავი მარჯვენა მხრისკენ. ამ მდგომარეობაში გაჩერდით 30 წამით, შემდეგ გაიმეორეთ მარცხენა მხარესაც. შეასრულეთ ხუთჯერ.

2. “ზამბარა”

დახარეთ თავი მაქსიმალურად წინ, ნიკაპი მიიტანეთ მკერდთან. შემდეგ ნელ-ნელა გაწელეთ კისერი წინ და ზემოთ, გაიმეორეთ ხუთჯერ.

3. “წიწილა”

ამ სავარჯიშოს დროს მოქმედებს ხერხემლის მკერდისა და კისრის მონაკვეთები. დაჯექით, გაასწორეთ ზურგი, ხელები დაილაგეთ მუხლებზე. ნელ-ნელა გადაიტანეთ ხელები ზურგის უკან, ამავდროულად აწიეთ ნიკაპი მაღლა. ნელა დაჭიმეთ კუნთები და გაჩერდით 30 წამით. გაიმეორეთ ხუთჯერ.

4. “მზერა ცისკენ”

აწიეთ თავი მაღლა და დაიწყეთ ერთი მხრიდან მეორესკენ მიბრუნება. გაიმეორეთ ექვსჯერ.

5. “ჩირაღდანი”

ეს სავარჯიშო წინას ცოტათი ჰგავს. წამოწიეთ იდაყვში მოხრილი ხელები და შეაერთეთ თავს ზემოთ. ნელა მიაბრუნეთ თავი მარჯვნივ და მარცხნივ, შეინარჩუნეთ ეს მდგომარეობა 15-30 წამით. გაიმეორეთ ექვსჯერ.

6. “ჩარჩო”

ეს სავარჯიშო ეფექტურად მოქმედებს ხერხემლის კისრისა და მკერდის მონაკვეთების ოსტეოქონდროზის დროს. დაიდეთ მარცხენა ხელი მარჯვენა მხარზე, მოაბრუნეთ თავი მარცხნივ. გაჩერდით ამ მდგომარეობაში 30 წამით. გაიმეორეთ მეორე მხარესაც. შეასრულეთ სავარჯიშო ხუთჯერ.

7. “ბატი”

ბოლო სავარჯიშოს შესრულებისას უნდა ადგეთ. ეს მოძრაობები ადუნებს კუნთებს, რაც თავისუფლებისა და რელაქსაციის შეგრძნებას მოგანიჭებთ.

დადექით სწორად, ხელები გაწელეთ წინ, კისერი სწორად უნდა გააჩეროთ ნიკაპი და მხრები – იატაკის პარალელურად. თავი გაწიეთ წინ, მოაბრუნეთ ერთ მხარეს და ნიკაპით მისწვდით მხარს. გაიმეორეთ მეორე მხარესაც და შეასრულეთ ხუთჯერ თითო მხარზე.

ექიმ ბუბნოვსკის აზრით, კისრის ტკივილის მოშორება საკმაოდ სწრაფად შეიძლება, თუმცა, მხოლოდ სავარჯიშოების რეგულარული და სწორი შესრულებისას მიიღებთ საჭირო შედეგს. ამასთან, არ დაივიწყოთ სწორი კვებისა და მავნე ჩვევებზე უარის თქმის შესახებაც. მცირე მცდელობა და თვითორგანიზაცია დაგეხმარებათ ამ საშინელი შეგრძნებებისგან გათავისუფლებაში.