დამტკიცებულია, რომ ადამიანის სიმაღლე ასაკთან ერთად იკლებს. ამას იწვევს ხერხემალში ცვლილებები და სახსრების ცვეთა. ქალის დგომა მის ასაკს განსაკუთრებით ააშკარავებს. გიამბობთ, რატომ ხდება ასე და რა უნდა გააკეთოთ სხეულის ჯანმრთელობის და სილამაზის დიდხანს შესანარჩუნებლად. მარტივი ხრიკები დაგეხმარებათ მოიშოროთ რამდენიმე წელი, რომელსაც ცუდი დგომა გმატებთ.
ქალის დგომა 40 წლის შემდეგ: ცვლილებები და მათი პრევენცია
„პაპარაცი“ გიზიარებთ სასარგებლო ინფორმაციას, რატომ იცვლება ქალის დგომა წლების მატებასთან ერთად. ასევე გთავაზობთ რამდენიმე რჩევას, როგორ მოიშოროთ ზურგის და ხერხემლის პრობლემები. მათი დახმარებით შეძლებთ გაახალგაზრდავებას და ზოგადი მდგომარეობის გაუმჯობესებას.
რატომ იცვლება ქალის დგომა ასაკთან ერთად
რა თქმა უნდა, ხერხემლის პრობლემები როგორც მამაკაცს, ასევე ქალს ნებისმიერ ასაკში შეიძლება აწუხებდეს. მაგრამ თუ დროულად არ მიაქცევთ ყურადღებას თქვენს დგომას და ზურგის კუნთების მდგომარეობას, წლების მატებასთან ერთად სიტუაცია მხოლოდ გაუარესდება. ქალებს მსგავსი ცვლილებები განსაკუთრებით აბერებს. ჩამოშვებული მხრები და ე.წ. „ქვრივის კუზი“ საშინელ სურათს ქმნის. დაგვეთანხმეთ, სულაც არ არის ის, როგორც სურს ქალს გამოიყურებოდეს გაფურჩქნის პერიოდში.
40 წლის შემდეგ ქალის ორგანიზმში ცვლილებები ხდება ჰორმონალურ დონეზე, რაც თავის მხრივ გავლენას ახდენს სხვა სისტემების მუშაობაზე. ამის გამო ძვლები კარგავს კალციუმს და სხვა მინერალებს, რომლებიც სიმკვრივეზე პასუხისმგებელნი არიან. თუ მათ რაოდენობას საჭირო დონეზე არ შეინარჩუნებთ, გაჩნდება ოსტეოქონდროზი და ართროზი. უფრო მეტიც, არა მხოლოდ კანი, არამედ კუნთებიც თავის ელასტიკურობას კარგავს. ვინაიდან კუნთები სუსტდება და საჭირო მხარდაჭერას ვეღარ უზრუნველყოფს, ხერხემალი მეტად იტვირთება. აქედან მოდის ზურგის ტკივილი, ძილის პრობლემები და ცხოვრების ხარისხის ზოგადი შემცირება.
როგორ ავიცილოთ თავიდან ცვლილებები
1. შესვენებები სამსახურში. ეს რჩევა ეხება მათ, ვინც სამუშაო დროს უმეტესად მჯდომარე მდგომარეობაში ატარებს. რა თქმა უნდა, მუდმივად გამართული ჯდომა არარეალურია და ეს ნორმალურია. უბრალოდ არ დაგავიწყდეთ, მოაწყოთ მცირე შესვენებები. ადექით და ოფისში გაიარეთ. დიდხანს ერთ პოზაში არ გაჩერდეთ და ეცადეთ, ნაკლებად მოიხაროთ. ისე მოაწყვეთ სამუშაო ადგილი, რომ მუდმივად თავდახრილი და მხრებჩამოშვებული არ იჯდე.
2. სიარული. დგომის პრობლემების დროს მსუბუქი აქტივობა დაგეხმარებათ. პირდაპირ ცეკვაზე ჩაწერა საჭირო არ არის. უფრო მეტიც, ზრდასრული ქალების და კაცების უმეტესობას ამის დრო არც აქვს. საკმარისია, ცოტა ხნით ფეხით გაისეირნოთ. სუფთა ჰაერი და აქტიური სიარული არა მხოლოდ განწყობას აგიმაღლებთ, არამედ ოსტეოქონდროზის პრევენციაში დაგეხმარებათ.
3. ფეხსაცმლის შერჩევა. 40 წლის შემდეგ ქუსლიანი ფეხსაცმლის ტარება სარისკო საქმეა. არავინ გიკრძალავთ, მაგრამ თავად იგრძნობთ, რა რთულია ასე სიარული. ამის გაკეთება 1-1,5 საათით შესაძლებელია, მაგრამ მთელი დღე არაკომფორტულ ფეხსაცმელში ყოფნა თქვენს დგომაზე ნეგატიურად იმოქმედებს. თუ საყვარელი ქუსლების გარეშე ცხოვრება არ შეგიძლია, მაქსიმუმ 5 სმ-მდე სიმაღლე შეარჩიეთ. აკონტროლეთ, რომ ფეხსაცმლის წვერი ძალიან ვიწრო არ იყოს.
4. ბიუსტჰალტერი. თუ დიდი მკერდი გაქვთ, აუცილებლად მიაქციეთ ყურადღებას ქვედა საცვლის შერჩევას. არასწორად შერჩეული ბიუსტჰალტერით მოხრილობის მდგომარეობა გაუარესდება. მოცულობითი მკერდის გამო გულმკერდის მიდამოში ხერხემალზე დიდი დატვირთვა მოდის. მნიშვნელოვანია, სწორად შეარჩიოთ ბიუსტჰალტერის ზომა, მხარდამჭერი თასმებით და ფართო გვერდებით.
5. ფიზიკური აქტივობა. დგომის პრობლემების ერთ-ერთ მიზეზად კუნთების სისუსტე ითვლება, ამიტომ მათი მდგომარეობის გაუმჯობესებაზე უნდა იზრუნოთ. 40+ ასაკის ქალებისთვის, რომელთაც სურთ ტანადობის გაუმჯობესება კუნთების დაზიანების გარეშე, იოგა გამოადგებათ. ამ ტიპის ვარჯიში სტრესსაც ამცირებს. ამ აქტივობის ან ნებისმიერი სხვა სახის ვარჯიშის რეგულარული შესრულებით რამდენიმე კილოგრამსაც დაიკლებთ. შესაბამისად, ხერხემალი ნაკლებად დაიტვირთება. სპეციალური ვარჯიშები სახლშიც შეგიძლიათ შეასრულოთ.
უდავოა, ქალის დგომა დიდ როლს თამაშობს მთელი იმიჯის შექმნაში, ამიტომაც ხერხემლის ჯანმრთელობაზე დროულად იზრუნეთ. მარტივი რჩევები დაგეხმარებათ, რომ ნებისმიერ ასაკში მოხდენილი სიარულით თავდაჯერებულობა ასხივოთ და იბრწყინოთ.
