ცივი ამინდების დადგომასთან ერთად, ვიწყებთ ფიქრს ჩვენი სახლების გათბობაზე. და პირველი რაც გვახსენდება არის მეტალპლასტმასის ფანჯრების დაყენება. ასეთი ფანჯრების მრავალ უპირატესობას შორის, ასევე არის უარყოფითი მხარეებიც. ერთ-ერთი ყველაზე გავრცელებული არის კონდენსატი მინაზე. სწორედ ამიტომ, უმეტესობა ჩვენგანს აინტერესებს, თუ როგორ უნდა მოვაშოროთ კონდენსატი მეტალპლასტმასის ფანჯრებიდან.
შეგიძლიათ არ ინერვიულოთ, რადგან ყველას შეუძლია ამ პრობლემის გადაჭრა. პაპარაცის დღევანდელ სტატიაში გეტყვით, რა ზომები უნდა მიიღოთ იმისათვის, რომ კონდენსატმა არ გაგიფუჭოთ განწყობა, ცივი სეზონის დადგომისას.
როგორ მოვაშოროთ კონდენსატი მეტალპლასტმასის ფანჯრებიდან: პრობლემის 3 გამოსავალი
მეტალპლასტმასის ფანჯრების მთავარი უპირატესობა, ხის ფანჯრებთან შედარებით არის ის, რომ ჰაერს არ ატარებს. მაგრამ ეს მათი მთავარი ნაკლიც არის. გარდა იმისა, რომ შიგნით ცივი ჰაერი არ შედის, ოთახში ვენტილაციაც ირღვევა. თქვენ შეგიძლიათ ებრძოლოთ ამას.
როგორ ჩნდება ტენიანობა ფანჯრებზე?
კონდენსატი ჩნდება მაშინ, როდესაც ტემპერატურული სხვაობა შენობის შიგნით და გარეთ ძალიან განსხვავდება ერთმანეთისგან. ფანჯრებზე კონდენსატის გაჩენა იწყება +18 გრადუსიდან და ქვემოთ.
ვინაიდან მეტალპლასტმასის ორმაგი მინის ფანჯარა არ იძლევა ჰაერის ცირკულაციის საშუალებას, ოთახში დაგროვილი მთელი ტენიანობა ყველაზე ცივ ობიექტებზე გროვდება. ასეთი ზედაპირებია მინა, ჩარჩო და ფანჯრის რაფა.
რა თქმა უნდა, ზოგჯერ კონდენსატი ჩნდება ფანჯრების დეფექტების შედეგად. ამ შემთხვევაში, ტენიანობა ორმაგი მინის შიგნით გროვდება. თუ გარე მინაზე ჩნდება წყლის წვეთები, მაშინ უნდა იფიქროთ შენობის თბოიზოლაციაზე.
კედლის იზოლაცია
უპირველეს ყოვლისა, ყურადღება უნდა მიაქციოთ კედლების მდგომარეობას. არასაკმარისი თბოიზოლაცია კონდენსატის გაჩენის ერთ-ერთი მიზეზია. ამ შემთხვევაში საუკეთესო გამოსავალი იქნება სახლის კედლების იზოლირება.
კედლების შიგნიდან იზოლირება უფრო ადვილი იქნება. თუმცა, ამისათვის მოგიწევთ რემონტის დაწყება. რა თქმა უნდა, ეს პროცესი არ არის სწრაფი და ძვირია, მაგრამ ყველა უხერხულობა პირველი ზამთრის შემდეგვე დაგავიწყდებათ.
თუ რემონტი ძალიან ახალია და ჯერ არ აპირებთ სახლის დიზაინის შეცვლას, შეგიძლიათ მიმართოთ კედლების გარედან იზოლირებას. ამისათვის ყველაზე ხშირად გამოიყენება მინერალური ბამბა, მინა-ბამბა, პენოპლასტი ან პოლისტირონი. ამისათვის დაგჭირდებათ ხელოსნების დაქირავება, რომლებიც სპეციალიზებულნი არიან ფასადების იზოლაციაში. ეს პროცედურა ძვირია, მაგრამ ეფექტური.
ამ გზით იზოლირებული კედლები ზამთარში სახლში სითბოს შეინარჩუნებს, ზაფხულში კი სიგრილეს. თუ თქვენ ცხოვრობთ არა ბინაში, არამედ კერძო სახლში, პირველ რიგში საჭიროა სხვენის იზოლირება. გახსოვდეთ, რომ სწორედ სხვენით კარგავს სახლი ყველაზე მეტ სითბოს.
შუშის ტემპერატურის გაზრდა
თუ კონდენსაცია არ გროვდება ყველა ზედაპირზე, არამედ მხოლოდ ფანჯარაზე, თავად შუშის ტემპერატურა უნდა გაიზარდოს. ამ შემთხვევაში ტემპერატურული სხვაობა ისეთი მკვეთრი არ იქნება და ტენიანობა არ დაგროვდება.
საცხოვრებელი ფართის დაგეგმარებისას, ბატარეები დამონტაჟებულია ფანჯრის ქვეშ. რადიატორიდან წამოსული თბილი ჰაერი ათბობს მინას. ეს ხელს უშლის კონდენსატის წარმოქმნას.
მეტალპლასტმასის ფანჯრების დამონტაჟებისას, სახლის მფლობელები ყველაზე ხშირად აყენებენ ძალიან ფართო ფანჯრის რაფებს. ასეთი ფანჯრის რაფა ხელს უშლის სითბოს წვდომას მინაზე, რის გამოც ვიღებთ კონდენსატს, ობს და სხვა უსიამოვნო შედეგებს.
იმისთვის, რომ სითბომ მინამდე მიაღწიოს, შეგიძლიათ დააყენოთ სპეციალური ცხაური ფანჯრის რაფაზე. ფანჯრის რაფის ზედაპირზე შეგიძლიათ გაბურღოთ რამდენიმე ხვრელი, რომლიდანაც სითბო ამოვა.
თუ თქვენთვის მნიშვნელოვანია ფანჯრის რაფის დატოვება ჩანართების გარეშე, შეგიძლიათ მიმართოთ უფრო ძლიერ გათბობას. ოთახში უნდა დამონტაჟდეს დამატებითი რადიატორი ან გამათბობელი. ეს გაზრდის ოთახის საერთო ტემპერატურას და დაიცავს კონდენსატის გაჩენისგან.
ვენტილაციის გაუმჯობესება
თუ ოთახის ვენტილაცია არასაკმარისია, კონდენსატი აუცილებლად გაჩნდება. საქმე ისაა, რომ ადამიანი დღის განმავლობაში ოფლის სახით 1,5 ლიტრზე მეტ წყალს კარგავს. როდესაც ადამიანი იმყოფება ცუდად ვენტილირებად ოთახში, ეს ტენიანობა საბოლოოდ ნამის სახით იწყებს დაგროვებას. და თუ ოთახში მცენარეებიც არის, სველი სარეცხი შრება ან წყალი ცხელდება, მაშინ კონდენსატი გაცილებით სწრაფად წარმოიქმნება.
ამიტომ კარგ ვენტილაციას შეუძლია დაიცვას სახლი ტენისგან. უპირველეს ყოვლისა, შეამოწმეთ გამწოვის მდგომარეობა. სამშენებლო ნაგვით, მტვრით და ცხიმით ჩაკეტილი სავენტილაციო შახტი არ აძლევს ჰაერს ნორმალურად გადინების საშუალებას.
რა თქმა უნდა, მის გაწმენდას დამოუკიდებლად ვერ შეძლებთ. ამისთვის უნდა დაუკავშირდეთ სპეციალურ სამსახურს. თქვენ უბრალოდ შეგიძლიათ ბინაში სავენტილაციო ბადის გაწმენდა.
თუ ეს ქმედებები არ გამოიღებს შედეგს, მაშინ არსებობს კონდენსატთან გამკლავების უმარტივესი გზა – განიავება. ვინაიდან მეტალპლასტმასის ფანჯრების გამო ოთახში სუფთა ჰაერის ცირკულაცია დარღვეულია, პრობლემის მოგვარება მარტივი განიავების საშუალებით არის შესაძლებელი. შედეგად, ტენიანი გადამუშავებული ჰაერი გავა გარეთ ფანჯრის ზედაპირზე ტენის დატოვების გარეშე.
კომფორტული განიავების საკითხი შეიძლება მოგვარდეს ფანჯრების დაყენების დროს. ახლა არის ორმაგი მინის ფანჯრები მიკრო ვენტილაციის ფუნქციით. მიკრო ვენტილაციისთვის ფანჯრის გასახსნელად, უბრალოდ, სახელური უნდა შემოაბრუნოთ 45 გრადუსით. ამის შემდეგ ფანჯარა გაიხსნება მხოლოდ 5 მმ-ით, რაც უზრუნველყოფს სუფთა ჰაერის მუდმივ ნაკადს, მაგრამ არ გააცივებს ოთახს საჭიროზე მეტად.
ეს წესები დაგეხმარებათ გახადოთ თქვენი ბინა თბილი და კომფორტული ზამთრის პერიოდშიც კი.
