ბინის საკითხი, ხანდახან, ყველაზე ახლო ადამიანებს შორისაც კი ჩამოაგდებს შუღლს. ვიღაცას არასდროს ჰყოფნის ადგილი, ვიღაც მთელი ცხოვრება შრომობს, ბინა რომ იყიდოს, ვიღაცას კი ყველაფრის მიღება არაფრის კეთებით უნდა. ქალბატონი ლუიზა ახლა სვამს კითხვას: გამართლებულია თუ არა რისკი იმისა, რომ მოტყუებული დავრჩებით, როცა ბინას შვილზე ვაფორმებთ? თუ სჯობს, ანდერძი დავტოვოთ, თაღლითების მსხვერპლად რომ არ ვიქცეთ?

ბინის გადაფორმება

“მე და ჩემს ქალიშვილს ცივი ურთიერთობა გვაქვს, განსაკუთრებით მას შემდეგ, რაც გათხოვდა. ცოტა ხნის წინ, უეცრად დათბა – ჩემთან სტუმრობას მოუხშირა. გასულ კვირას პროდუქტით სავსე უზარმაზარი ჩანთა მომიტანა. მხოლოდ მერე მივხვდი, რატომ აკეთებდა ამ ყველაფერს – მთხოვა, რომ ბინა მისთვის გადამეფორმებინა.

მალე 70 წელი შემისრულდება, მარტო ვცხოვრობ ოროთახიან ბინაში, რომლის საყიდლადაც ფული ჩემი შრომით დავაგროვე. ჩემი შვილი ახლა 40 წლისაა და დიდი ხნის წინ გათხოვდა. ქმართან ერთად ცხოვრობს დედამთილთან, მათ ორშესასვლელიანი სახლი აქვთ. ადრე შვილმა მთხოვა, რომ ბინა გამეყიდა და მისთვის ფულის ნაწილი მიმეცა იმისთვის, რომ მას შეძლებოდა საკუთარი ბინის ყიდვა და ქმრის მშობლებისგან წამოსულიყო.

ახლა კი, რამდენიმე კვირაა, შორენა კეთილმოსურნე და საყვარელია, მსტუმრობს, მეხმარება. გუშინ, როცა პროდუქტი მომიტანა, მივხვდი, რატომაც იქცეოდა ასე. ისედაც ვაპირებდი მისთვის ბინის დატოვებას, სხვა ხომ არავინ მყავს. მაგრამ არ ვიცი, რამდენად სწორი იქნება ახლა მისთვის ბინის გადაფორმება.

ამ წუთას ჩემს შვილს თავზე ჭერი აქვს, დედამთილ-მამამთილი კარგად ექცევიან, სახლის მეორე ნაწილიც დაუთმეს. როცა აღარ ვიქნები, შორენა მაინც მიიღებს ბინას და მერე თვითონ გადაწყვიტოს, რას უზამს მას.

სიამოვნებით გადავუფორმებდი მას ბინას, მაგრამ მეშინია. სულ ცოტა ხნის წინ, ჩემს მეზობელს ასეთი ინციდენტი შეემთხვა: მოხუცმა კაცმა შვილიშვილს ბინა აჩუქა და იმან ქუჩაში დატოვა. არ მინდა, შვილს გული ვატკინო, არც მასთან ურთიერთობის გაციება მინდა, არადა, ჩუქებით ბინის გადაფორმებისას მე მასზე უფლებას დავკარგავ და ჩემი გასახლებაც ნებისმიერ მომენტში შეეძლებათ. თან, ისეთი შეგრძნება მაქვს, რომ ჩემი სიძე სწორედ ამას ელოდება.”

რედაქციის რჩევა

ქალბატონი ლუიზას შიში სავსებით სამართლიანია. ჩვენ ბევრი საშინელი ისტორია ვიცით, როცა ნათესავები თავიანთ ახლობლებს ასახლებენ და ბედის ანაბარა ტოვებენ. თუმცა, თუ ქალიშვილმა მოულოდნელად ეს თემა წამოწია, იქნებ, მას რამე აწუხებს. ბინა ძალიან ძვირია. მაშინაც კი, თუ შვილებში დარწმუნებული ხართ, 100%-ით ვერ იქნებით ნაცნობებისა და მეგობრების სანდოობაში დარწმუნებული. საკითხის გადასაჭრელად, დახმარებისთვის ადვოკატს უნდა მიმართით. ის იცნობს კანონებს და სასარგებლო რჩევას მოგცემთ. ნუ იჩქარებთ დასკვნების გამოტანას, მიეცით დრო საკუთარ თავს და კარგად დაფიქრდით.