საიდუმლო არ არის, რომ ჩვენი დროის უდიდესი მეწარმეები ძალიან ბევრს მუშაობდნენ ბიზნესში დიდი წარმატების მისაღწევად. როგორც წესი, მრავალრიცხოვანი რჩევები, როგორ გახდეთ მდიდარი, გვასწავლის, რომ უნდა წავიკითხოთ წიგნები და არ დავივიწყოთ ფინანსური ბალიში. შრომის გარდა მდიდრები სხვა რამესაც აკეთებენ.
მომხრე ვართ, რომ ყველა იყოს მდიდარი და ბედნიერი, ამიტომ მილიონრების ზოგიერთი განმასხვავებელი თვისება ყურადღებით შევისწავლეთ და უახლეს დროში ვაპირებთ მათი ქცევის გამეორებას. გთავაზობთ ნამდვილად მდიდარი და წარმატებული ადამიანების 7 წესს. 100%–ით საყურადღებოა!
სასიამოვნო საქმე
თუ გადაწყვეტთ ბიზნესის გახსნას მხოლოდ ფულის გამო, შეჩერდით და კარგად დაფიქრდით. სიმდიდრის პერსპექტივა, რომელიც ჰორიზონტზე გელოდებათ, ენთუზიაზმს მხოლოდ მცირე ხნით შეინარჩუნებს. გახსოვდეთ, რომ ნებისმიერ სერიოზულ საქმეს მოსდევს სირთულეები და ფორსმაჟორული სიტუაციები. თავიდან აუცილებლად ზარალში იქნებით. მხოლოდ ფულის შოვნის სურვილი ცუდი სტიმულია. საქმე ნამდვილად წარმატებული რომ გახდეს, ნამდვილ ლტოლვად აქციეთ. იმის გარკვევაში, რა გააკეთოთ, დაგეხმარებათ სამი კითხვა: „რა მიყვარს?“, „მოეწონება თუ არა სხვებს?“, „მზად არის ხალხი ამაში ფულის გადასახდელად?“
აუცილებელი არაა, რომ ბიზნესი ინოვაციური იყოს. კაფის ან საბურავების მაღაზიის გახსნის არ შეგეშინდეთ მხოლოდ იმიტომ, რომ ვინმემ ეს თქვენზე ადრე გააკეთა. მთავარია: თქვენს სახლს ხიბლი შემატოთ და გააკეთოთ შთაგონებით.
სწორი გარემო
თუ მთელი კომპანიის შექმნა გსურთ, გარშემო შემოიკრიბეთ საიმედო და ჭკვიანი ხალხი. მნიშვნელობა არ აქვს, რა არის თქვენი ბიზნესი, ნებისმიერ შემთხვევაში გუნდი დაგჭირდებათ. ყველაფერს დამოუკიდებლად ვერ გააკონტროლებთ და გააკეთებთ: ძალა და დრო არ გეყოფათ. საქმე წინ რომ წავიდეს, შემოიკრიბეთ სპეციალისტები, რომლებიც თქვენს ხედვას იზიარებენ. თანამოაზრეები შეგიძლიათ იპოვოთ ტრენინგებზე, სემინარებზე და ახალგაზრდა მეწარმეების ფორუმებზე. აირჩიეთ დამხმარე არა მხოლოდ პირადი, არამედ პროფესიული თვისებების მიხედვით. ბიზნესი საქმეა, რაც ნიშნავს, რომ მეგობრობა მეორეხარისხოვანია.
გახსოვდეთ ბიუჯეტი
გაწერეთ, როგორ ააწყობთ ბიზნესს არსებული ბიუჯეტით, შემდეგ 1,5–2–ჯერ შეამცირეთ. ფული ნებისმიერი ბიზნესის საფუძველია. საწყისი კაპიტალი მაქსიმალურად ფრთხილად გამოიყენეთ. შეადგინეთ გეგმა პირველი თვის საჭირო ხარჯებით და ბიუჯეტით. შეადარეთ მოგება და ხარჯი: თავიდან ხარჯი ძალიან მაღალი იქნება. არ შეგეშინდეთ, ბიზნესისთვის ეს ნორმაა: ფულის მიღება რომ დაიწყოთ ან ნულოვან შედეგზე გახვიდეთ, რამდენიმე თვე, 6 თვე ან 1 წელი უნდა მოიცადოთ. პერიოდი დამოკიდებულია ბევრ ფაქტორზე, მაგალითად, თანამშრომლების რაოდენობაზე და წარმოების მოცულობაზე. ფინანსური გეგმა დიდ თანხად რომ არ გადაიქცეს, დაზოგეთ. ფულის დაზოგვა შეგიძლიათ შემდეგი მეთოდით:
- თავიდან შეიძინეთ მეორადი აღჭურვილობა და ავეჯი. ოფისისთვის ასეთი ნივთების შეძენით ნახევარ ფულს დაზოგავთ.
- შესაძლებლობის მიხედვით სახლიდან იმუშავეთ. თავიდან დისტანციურად მართეთ ბიზნესი, შენობა არ იქირავოთ. ფართი იქირავეთ, როცა კლიენტების სტაბილური ბაზა გექნებათ.
- ონლაინ ბუღალტერიის მომსახურებით ისარგებლეთ. პირველივე დღეს პერსონალური ბუღალტერის აყვანა ძვირი სიამოვნებაა, ხოლო ბიუჯეტის მონიტორინგი საკმაოდ რთულია.
არ იჩქაროთ
გახსოვდეთ: ბიზნესი სპრინტი არაა, არამედ მარათონი. ოქროს მთები უცებ არ მოდის. წარმატების მისაღწევად არ იჩქაროთ და ყოველთვის გეგმის მიხედვით იმოქმედეთ. მასში გაწერილი უნდა იყოს შემდეგი პუნქტები:
- ზოგადი წარმოდგენა. რა მიზანი გაქვს? რა გჭირდებათ საქმის დასაწყებად? გჭირდებათ ოფისი? რა სირთულეები ახლავს?
- საქონელი და მომსახურება. დეტალურად გაწერეთ, რის გაყიდვას აპირებთ: არა მხოლოდ პროდუქტის ან სერვისის სახელი, არამედ მოკლე აღწერილობა.
- ფასი. განსაზღვრეთ ღირებულება. ბაზრის საშუალო ფასი გაარკვიეთ და დარწმუნდით, რომ მომავალი კლიენტები მზად იქნებიან ამ თანხის გადასახდელად.
- რეკლამა. აირჩიეთ სივრცე განსათავსებლად და გამოყავით თანხა ბიუჯეტიდან, რომელსაც რეკლამებზე დახარჯავთ. ერთდროულად ყველა სარეკლამო არხის დაფარვა არ სცადოთ. ეს არაგონივრული ხარჯი შეიძლება იყოს.
- კონკურენტების ანალიზი. დაფიქრდით, რა იქნება თქვენი უპირატესობა და რაზე გააკეთებთ აქცენტს.
არ შეგეშინდეთ გარისკვის
დიდ საქმეს დიდი გარისკვა სჭირდება. ბევრმა წარმატებულმა მეწარმემ შექმნა თავისი მილიარდიანი იმპერიები რისკის წყალობით. ამის ერთ–ერთი მაგალითია ჯეფ ბეზოსი, პლანეტის ერთ–ერთი უმდიდრესი ადამიანი. 1994 წელს 30 წლის ასაკში სამსახური მიატოვა და გახსნა Amazon. მაშინ ეს იყო წიგნების პატარა ონლაინ მაღაზია, მაგრამ ახლა უზარმაზარი ბაზარია, სადაც ყველაფერი იყიდება. თავისი გადაწყვეტილების ახსნისას მეწარმემ თქვა: „წარმოვიდგინე ჩემი თავი 80 წლის ასაკში. არ მინდოდა ვყოფილიყავი მოხუცი, რომელიც ნანობს გაშვებულ შესაძლებლობებს“.
მთელი ცხოვრება საქმეს არ დაუთმოთ
მერწმუნეთ, სიკვდილის პირას არავის უნანია, რომ ძალიან ცოტა იმუშავა. საყვარელი საქმეც მთელ გონებას არ უნდა იკავებდეს. ასე ადამიანი სწრაფად გადაიწვება და დაკარგავს კავშირს გარე სამყაროსთან, მეგობრებთან და ნათესავებთან. განტვირთვაში დაგეხმარებათ:
- დღის წესრიგი. დრო დაუთმეთ როგორც საქმეს, ასევე პირად ცხოვრებას.
- ამოცანების დელეგირება. ყველაფერს დამოუკიდებლად ვერ გაუმკლავდებით, ამიტომ ზოგიერთი საკითხი გუნდს მიანდეთ.
მოემზადეთ კომპრომისისთვის
ყველაზე უკმაყოფილო კლიენტები თქვენი ცოდნის საუკეთესო წყაროა. ეს აშკარა ჭეშმარიტებაა, რომელიც არ უნდა დაგავიწყდეთ: კლიენტების გარეშე ბიზნესი არ გამოვა. სწორედ ამიტომ, მთავარი ამოცანაა არა მხოლოდ მათი მოზიდვა, არამედ ლოიალობის შენარჩუნება. კლიენტის შენარჩუნება ყოველთვის უფრო იაფია, ვიდრე ახლის პოვნა. არ აჰყვეთ პოპულარულ მცდარ მოსაზრებას, რომ თუ ერთ ადამიანს რაღაც არ მოსწონს, მაშინ მოვა მეორე, მესამე, მეხუთე. ყველაფერს აქვს თავისი საზღვარი.
და ბოლოს: არასოდეს დანებდეთ! როგორც ილონ მასკი ამბობს: „დავნებდები, თუ ვიქნები მკვდარი ან სრულიად ქმედუუნარო“. დიახ, ხშირი წარუმატებლობა მუშაობის სურვილს კლავს, მაგრამ იმედი არ გაიცრუოთ. ყველას ცხოვრებაში არის წარუმატებლობა. გვერდი არ აუვლია მათთვისაც, ვისაც ყველა მაგარ და წარმატებულ პიროვნებებად მიიჩნევს.
