საზამთროს მოყვანა არა მხოლოდ ხელოვნებაა, არამედ მეცნიერებაცაა. კარგი მოსავლის მისაღებად საჭიროა მცენარეების სწორად მოვლა და სასუქების რეგულარულად მიწოდება. ბევრ მებაღეს ქიმიური საშუალებების ნაცვლად ურჩევნია გამოიყენოს ბუნებრივი სასუქები, რომლებიც ნიადაგს მიკროელემენტებით ამდიდრებს და ხელს უწყობს ნაყოფის ჯანსაღ ზრდას. პაპარაცის დღევანდელ სტატიაში გიამბობთ, თუ რა სასუქი უნდა მისცეთ საზამთროს საუკეთესო შედეგის მისაღებად.
ცნობილია, რომ სწორი კვება გავლენას ახდენს ნაყოფის ფორმირების სიჩქარეზე და მისი ზომის ზრდაზე. ეს საშუალებას იძლევა მივიღოთ მეტი საზამთრო ერთი ბუჩქიდან, რაც მნიშვნელოვანია როგორც სახლში მოხმარებისთვის, ასევე კომერციული მიზნებისთვის.
რა სასუქი მივცეთ საზამთროს: 3 საუკეთესო საშუალება
კომპოსტი
ეს არის ალბათ ერთ-ერთი ყველაზე მრავალმხრივი და სასარგებლო სასუქის სახეობა. კომპოსტი მდიდარია ორგანული ნივთიერებით, რომელიც კვებავს ნიადაგს და ასტიმულირებს ფესვთა სისტემის განვითარებას. ამ სასუქის რეგულარულად შეტანა ნიადაგში თქვენს საზამთროს ყველა საჭირო საკვები ნივთიერებით უზრუნველყოფს. ეს ძალიან მნიშვნელოვანია ასეთი სწრაფად მზარდი მცენარეებისთვის. მათ ხომ დიდი ენერგია და სასარგებლო მიკროელემენტები სჭირდებათ მწვანე მასის ფორმირებისთვის, ყვავილობისთვის და, რა თქმა უნდა, ნაყოფიერებისთვის.
ნაკელი
ნაკელი აზოტის, კალიუმის და ფოსფორის შესანიშნავი წყაროა. ეს ნივთიერებები ხელს უწყობს ფესვთა სისტემის უფრო აქტიურ განვითარებას და ნაყოფის ფორმირებას. ასეთი მდიდარი შემადგენლობის შემცველი სასუქის შეტანა გავლენას მოახდენს საზამთროს ხარისხსა და გემოზე. ეს ძალიან მნიშვნელოვანია, რადგან გარკვეული საკვები ნივთიერებების ნაკლებობამ შეიძლება გამოიწვიოს ნელი ზრდა და ხილის დეფორმაციაც კი. ნაკელის შეტანა კი მცენარეს ყველა საჭირო მიკროელემენტით უზრუნველყოფს. ამის წყალობით, ხილი იქნება წვნიანი, ტკბილი და მსხვილი.
ხის ნაცარი
ხის ან მცენარის ნარჩენების დაწვის შემდეგ მიღებული ნაცარი შეიცავს ბევრ მიკროელემენტს, როგორიცაა კალიუმი, კალციუმი, მაგნიუმი და მრავალი სხვა. ამ ნივთიერების წყლით გაზავებით მიიღებთ პროდუქტს, რომელიც შესანიშნავია საზამთროს გამოსაკვებად. ნაცარი ეხმარება მცენარეს საკვები ნივთიერებების უკეთ შეთვისებაში. ასევე, ასეთი სასუქის შეტანა გაზრდის საზამთროს მედეგობას დაავადებებისა და მავნებლების მიმართ. საქმე ისაა, რომ კარგად გამოკვებილ მცენარეებს უფრო ძლიერი იმუნიტეტი აქვთ და უკეთ უმკლავდებიან გარე ფაქტორების უარყოფით ზემოქმედებას.
გაითვალისწინეთ, რომ ნებისმიერი სასუქის გამოყენებისას უნდა აკონტროლოთ მისი დოზა, რათა თავიდან აიცილოთ ნიადაგის გადაჭარბებული გაჯერება. ისეთი ნატურალური სასუქების რეგულარული და ზომიერი გამოყენება, როგორიცაა კომპოსტი, ნაკელი და ნაცარი, დაგეხმარებათ მოიყვანოთ შესანიშნავი საზამთრო, რის წყალობითაც შეძლებთ დატკბეთ მისი გემოთი და არომატით მთელი ზაფხულის განმავლობაში.
