აპრილის ბოლოს ვიწყებ ნაკვეთის მომზადებას ხახვის დასარგავად. დასათეს ხახვის ვრგავ მაისის დასაწყისში, როგორც ამას ბევრი მებოსტნე აკეთებს. პაპარაცის დღევანდელ სტატიაში უფრო ვრცლად განვიხილავთ, თუ როგორ უნდა მოვამზადოთ ნაკვეთი ხახვის დასარგავად და როგორ დავამუშაოთ სარგავი მასალა დარგვამდე.
ვირჩევთ ადგილს, ვამზადებთ რიგს და ვიყენებთ სასუქს
ხახვის დასარგავად აირჩიეთ მზიანი ადგილი, სადაც ჩრდილი არ არის და წყალი არ გუბდება. წინააღმდეგ შემთხვევაში, შეიძლება ვერ მიიღოთ კარგი მოსავალი.
შემდეგ უნდა გადავხედოთ წინამორბედებს. ანუ იმ კულტურებს, რომლებიც წინა წლებში იზრდებოდა ამ ადგილზე. ხახვისთვის კარგი წინამორბედებია – პომიდორი, კიტრი, პარკოსნები და კარტოფილი.
ხახვის დასარგავად ავირჩიე კარგად განათებული ადგილი, სადაც წინამორბედი იყო კიტრი.
რა სასუქი უნდა შევიტანოთ ნიადაგის დამუშავებისას
ნაკვეთის მომზადება შესაძლებელია შემოდგომაზე ან გაზაფხულზე. ნიადაგის გაფხვიერების დროს 1 კვადრატულ მეტრზე ვამატებ 1-2 სათლ კომპოსტს ან ჰუმუსს. ესენია საუკეთესო სასუქები ხახვისთვის.
ნიადაგის დეოქსიდიზაციისთვის ვიყენებ დოლომიტის ფქვილს 1 კვადრატულ მეტრზე – 2-3 ჭიქას. თუ ნაცარს ვიყენებ, მაშინ 1 კვადრატულ მეტრზე – 100-200 გრამი დასჭირდება.
ორგანული ნივთიერებების ნაცვლად, შეგიძლიათ გამოიყენოთ მინერალური გრანულები. მაგალითად, დაამატეთ აზოფოსკა 40 გრამი – 1 კვადრატულ მეტრზე.
ხახვის დამუშავება დარგვის წინ
დარგვის დაწყებამდე ვახარისხებ მასალას: ვყრი გარეგნულად დამჭკნარ, გამომშრალ და დამპალ ბოლქვებს. ბოლქვებს ზედა ნაწილს ვაჭრი. ეს უზრუნველყოფს თავების ერთნაირად გაზრდას. ამოსული ბოლქვები შეიძლება დაირგოს სამწვანილედ.
დარგვამდე ხახვს ყოველთვის ვამუშავებ კალიუმის პერმანგანატის ხსნარით. ვამზადებ გაჯერებულ ვარდისფერ ხსნარს და მასში ვათავსებ სარგავ მასალას ნახევარი საათით. შემდეგ ხახვს ვრეცხავ გამდინარე წყლის ქვეშ.
შემდეგ ხახვს მარილის ხსნარში ვათავსებ. დაგჭირდებათ 1 ს/კ კოვზი მარილი – 1 ლიტრ წყალზე. წყალი უნდა იყოს ცხელი, რათა მარილი კარგად გაიხსნას. სითხეს ვაციებ. ხახვს თბილ ხსნარში 2 საათის განმავლობაში ვაჩერებ. ეს კეთდება მოსავლის დასაცავად დაავადებებისგან (მაგალითად, ნაცრისფერი ლპობა, ჭრაქი) და მავნებლებისგან, როგორიცაა ტრიპსი, ხახვის ბუზი, ნემატოდები. ხსნარში გაჩერების შემდეგ ხახვს ვრეცხავ გამდინარე წყალში და ვაშრობ.
დარგვის სქემა
- ნაკვეთზე ვაკეთებ ღარებს ან ორმოებს სიღრმით 7-დან 10 სმ-მდე. რიგში ხახვებს შორის ვიცავ მანძილს დაახლოებით 10 სმ-ს. რიგებს შორის დაშორება 30 – 35 სმ-ია.
- ღარში ვყრი ნაცარს და ცოტას მიწაში ვურევ. ხახვს ვრგავ და 3-4 სმ-იან ფენად ვაყრი ნაყოფიერ მიწას.
- შემდეგ ნარგავებს კარგად ვრწყავ. ჩვეულებრივ, ერთი კვირის შემდეგ ხახვი დაიწყებს ამოსვლას.
